3 Sáaŋ 1 - Nomaande

Bitéŋíti

¹ Yaŋɔ́, *mukendisi belumitinine *Kilís, ɛ ŋa mɛ́ ɔ́ɔ́ŋɛ́na Káyus nufule eenu. Wáŋa aláamɛ yɛ́ ɔtɛ́má aá taaká noómi.

² Hiála, i ŋeé mi léne anyía bíɔ́wɔ bɛsana bikime á bámɔ́kɔ́na bɛmbányɛ, mbá á bámɔ́kɔ́na tɔ́na ɔmbányɛ i imehú háyɛ ɔ ɔ́ŋa ɔmbányɛ e elilé.

Nyɛbɛ́kɛ́lɛ́na nyɛ́ Káyus

³ Ɛ náŋa yámɛ bá háyɛ nyitíne nyí bilúŋe ekúlú eyí belumitinine a bɔ́mɔtɛ́ náŋa bábɔ́ fáákɔ́na aaha, bé mi bíkétíkínyi anyána ɔ naŋa ɔɔ́ látákɛ́na bɛsana aá taaká. Yááŋa anyía ɔ naŋa oó líhéke olíhe ú taaká.

⁴ Yaátɛ́ asana ya mɛ́ŋa ne obíléne weéŋí ɔ ɔhɔla, ekúlú ayɛ́ ɛ ŋa mɛ́ lɔ́kɔ́ma anyía báámɛ baáná ŋeé líhe olíhe ú taaká.

⁵ Hiála, ɔ naŋa oó nyióyísíkínyi *bikotí bí mulumitinine *Kilís ekúlú ayɛ́ ɔ naŋa ɔɔ́ wɔɔ́lɔ́kɔ belumitinine bé etémbí te eebe a bá bɔ́ŋa bekenyí oówo eé buúse.

⁶ Bé ŋe bú o lémbiki aaha ɛ ɛkatɛ́katɛ́ ci hiɔ́bɔ hí belumitinine Kilís anyía o ŋoó beébe léne buéŋí. Ɛ ŋɔ mɛ́ ɔ bɛ́cɔ́kɔ́lɛ́na anyía ɔ́ɔ cɔbá ne buúse o o búle beébe ɔɔ́lɔ́ a asana ne úúbú ɔkanda a nyɛnamá e nyí ŋé bíléníne *Bandɔ́mɛsɛ́.

⁷ Yááŋa anyía bá ŋa bɔ́ kánda ɔkanda oócí a asana ne buólí bú Otéŋí a Waáŋá *Yésus Kilís, bá tɛ ŋá bɔ́ báta ta bɔkɔ né be-ti-lumítíníne.

⁸ Ɛ́ɛhɛ́ basɔ́ belumitinine túásɔ́ nyɛ́mana tú ɔwɔɔ́lɔ́kɔ nyɛnamá nyɛ́ baacɔ eényí, ananyía tuásɔ́ látána ne beébe ɔ ɔnyiɔ taaká ci buólí eébú.

⁹ Yaŋɔ́ ɛ ŋa mɛ́ ɔ́ɔ́ŋɔ́kɛ́na hiɔ́bɔ hí belumitinine nufule ; mbá Tiotɛ́lɛ́f tɛ ŋá yáamba ɔlɔ́kɔ́ma bɔkɔ abɔ́ ɛ́ ŋa mɛ́ kɔɔna anyía u ŋeé léne buéŋí obíhíite háyɛ mukendisi bɛsana bikime.

¹⁰ Ekúlú ayɛ́ ɛ ká mɛ́ faaya aáhá náánɔ́, ɛ ká mɛ́ banɔ́ hémbulekine bɛɛbɛ́ bɛ́ bɛsana bikime abɛ́ ú ŋa kɛ́láka, na bɛfala bikime abɛ́ u ŋaá mɛ sɔ́mbákɛ́ná. U tɛ ŋɔ́ lɔ́bɔ hí a nyɛkɛla eényí, u naŋa u tɛ á káha belumitinine Kilís ; aáná baacɔ a bɔ́mɔtɛ́ a bá ŋa bɔ́ áamba o beébe káha u ŋeé beébe léke, mbá u beébe ɔ́ɔ́ŋɔ́kɛ́na aá hiɔ́bɔ hí belumitinine.

¹¹ Aláamɛ, eti kétíkínyínyi nyɛbɛ́kɛ́lɛ́na a nyɛɛbɛ́, mbá látákɛ́na a nyɛmbányɛ, anyía ɔɔcɔ awɔ́ u náŋa waá kɛ́laka bɛmbányɛ bɛ́ bɛsana áŋa ɔɔ́nɔ́ u Bandɔ́mɛsɛ́. Mbá ɔɔcɔ awɔ́ u náŋa waá kɛ́laka bɛɛbɛ́ bɛ́ bɛsana ti ŋé ményi Bandɔ́mɛsɛ́.

¹² A aháŋá ne Temetilíyus, baacɔ bekime ŋe bú wuúci lémbi ; bɛsana bɛ́ Bandɔ́mɛsɛ́ ebí u ŋé húlinyi baacɔ ŋo tóŋínyi tɔ́na anyía nyíáyɛ́ nyɛbɛ́kɛ́lɛ́na áŋa nyɛmbányɛ. Ta basɔ́ tɔ́na tu ŋe sú wuúci lémbi, o ŋoó menyi anyía tu ŋa sɔ́ kɔɔna taaká.

¹³ Ya mɛ́ŋa na bɛsana biéŋí bɛ́ ɔ kuɔŋɔ́ láakɛna, mbá i ti ŋé mi léne o biíbi ɔ́ɔ́ŋɔ́kɔ e nufule.

¹⁴ I ŋeé mi bíkéti ɔkɔfáaya nɔ́ɔ́wɔ hikúlúkúlú ɔ ɔkɔɔ́ kuɔŋɔ́ lɛca ; aaha tu ká sɔ́ táŋatáŋa bɔmbányɛ, tu lɛcákána.

¹⁵ Bandɔ́mɛsɛ́ ó wiínjie mbuumu ɔ ɔtɛ́má. Bɔlɔ́ɔwɔ bekime bá aaha ŋe bú o téŋi. Téŋíki bíásɔ́ bikendinyi ɔmɔtɛ́ ɔmɔtɛ́.