2 Sáaŋ 1 - Nomaande

Bitéŋíti

¹ Yaŋɔ́, *mukendisi belumitinine *Kilís, ɛ ŋa mɛ́ ɔ́ɔ́ŋɛ́na Kiliya nufule eenu ; wáŋa ooci awɔ́ *Bandɔ́mɛsɛ́ ŋɔɔ́ lɔ́tɔ́. Ɛ ŋa mɛ́ ɔ́ɔ́ŋɛ́na tɔ́na bááyɛ́ baáná ebé i ŋeé mi léne bɔmbányɛ bɔmbányɛ. Tɛ́ cáŋa yaŋɔ́ bímuócí ɛ ŋa mɛ́ banɔ́ léne, baacɔ bekime e bé ŋe bú ményi taaká ŋa bɔ́ banɔ́ léne tɔ́na

² a asana na taaká a cɛ́áŋa náánɔ́ ; ciíci cɛ káá bá náánɔ́ aáná bikúlú bikime.

³ Ne Síkíne Bandɔ́mɛsɛ́ ne uuyé Ɔɔ́nɔ́ *Yésus Kilís á basɔ́ sáyábákɛ́na, bá basɔ́ bɛ́cámáka mahana, mbá bá basɔ́ iínjíékíne mbuumu ɛ ɛtɛ́má na aá taaká ne e nulénéne noómi.

Túé lénékénéne

⁴ Ɛ ŋa mɛ́ bá háyɛ nyitíne nyí bilúŋe a nyiámɛ nyɛlɛca anyía bɔ́ɔ́wɔ baáná a bɔ́mɔtɛ́ ŋa bɔ́ kánda aá taaká noómi háyɛ okotí ayɛ́ Bandɔ́mɛsɛ́ ŋaá basɔ́ iínjie.

⁵ Ɛ́ná aámbáya, Kiliya, asana ayɛ́ ɛ ŋɔ mɛ́ ɔ bata áŋa anyía tu ŋa sɔ́ nyɛmána tú o búle lénéne basɔ́ na basɔ́ ; tɛ́ cáŋa yɔɔ́sɔɔ́sɔ yí okotí ɛ ŋa mɛ́ ɔwɔɔ́ŋɛ́na aaha, mbá okotí yɛ́ buáyá ayɛ́ tu ŋa sɔ́ lɔ́kɔ́máka o otúme e nyitúme nyí uúsu olumitinine.

⁶ Taaká ci nulénéne áŋa o búle látɛ́na *bikotí bɛ́ Bandɔ́mɛsɛ́ ; okotí ayɛ́ nu ŋa nɔ́ lɔ́kɔ́máká e nyitúme áŋa anyía énu búle lénéne.

⁷ Ɛ ŋaá mɛ kɔɔna aáná anyía baacɔ beéŋí ma bɔ́ hála haála hekime. Bé ŋe bú néŋe baacɔ ; bé ti lumítíníne anyía Yésus *Kilís ŋeé bíbíéné ɔɔcɔ aaha ɔ ɔmɛsɛ́. Nyɛnamá nyɛ́ ɔɔcɔ a nyɛ́ ŋá táŋa aáná áŋa munéŋe baacɔ, wuúci tɔ́na munuusi Kilís.

⁸ Yaátɛ́ asana, énu bíkékényi banɔ́ bɛ́muátá, anyía búánɔ́ buólí bukime abɔ́ nu ŋa nɔ́ nyiɔ́kɔ ti wé etémbí ne etémbí, mbá nu bɔ́ŋgɔ́na bíánɔ́ bɛnamá.

⁹ Énu menyi anyía ɔɔcɔ okime awɔ́ u náŋa u tɛ á látɛ́na nyiékúnyi nyí Kilís, mbá u sólikinyi ɔkɛla bíáyɛ́ bɛsana bɛ́ bɛ́muátá ma nána ohónyí, u tɛ á bá e nyimónjóló na Bandɔ́mɛsɛ́. Mbá ɔɔcɔ okime awɔ́ u naŋa waá látákɛ́na nyiékúnyi nyí Kilís áŋa e nyimónjóló na na ciasɔ́ Síkíne Bandɔ́mɛsɛ́ ne ne uuyé Ɔɔ́nɔ́ áyá.

¹⁰ Aáná mbɔ́kɔ ɔɔcɔ a wɔmɔtɛ́ ŋaá fááya náánɔ́ ne nyiékúnyi nyí etémbí, nuti wuúci káha e úúnú ooki, te o wuúci laana anyía « hɔɔ́ɔʼ »,

¹¹ anyía ɔɔcɔ ewú é wuúci téŋíti ŋeé lumitine yááyɛ́ aabɛ́ yɛ́ nyɛbɛ́kɛ́lɛ́na.

¹² Ya mɛ́ŋa na bɛsana biéŋí bɛ́ ɔ banɔ́ láakɛna, mbá i ti ŋé mi léne o biíbi ɔ́ɔ́ŋɔ e nufule ; i ŋeé mi bíkéti ɔkɔfáaya náánɔ́ ɔ ɔkɔɔ́ banɔ́ lɛca, mbá tu táŋátáŋa tu lɛcákána anyía tuásɔ́ bámɔ́kɔ́nɛ́na háyɛ nyitíne nyí bilúŋe.

¹³ Baáná bá ɔnɔ́ɔnyia e woónjú awɔ́ Bandɔ́mɛsɛ́ ŋɔɔ́ lɔ́tɔ ŋe bú o téŋi.