Tito 2 - Lek Jot de Jecu Kritho 1940

¹ Ye jam ne kaŋ ka ye piath ne pioc yic:

² bi kɔc ci dhiɔp bik ya lɔcap, ku yiki lɔ diu, ku cik nhiim ye liɔk, ku yiki naŋ gam yic, ne nhiɛr, ku ne liɛr de piɔu:

³ ku yene bi ya cɔɔk de diardit eya, bik ya naŋ rieu ne luɔiden, bik cuɔk ye ya kɔc ke alop, ku cik ye ya aluɛk ke piu juec ke abiɛi, yiki ya dupioc ke ke ye piath;

⁴ ku bik diar thii ya piɔc bik roorken ya nhiar, ku yiki mithken nhiar,

⁵ ku cik nhiim bi ya liɔk, ku yiki lɔcar, ku yiki ya diar ye lui ne bɛiken, ku yiki piɔth kac, ku ye ke dɔk ne roorken, bik wɛt de Nhialic bik ya cuɔk ye lat:

⁶ ku yene ye cɔɔk de rorthi eya ye ke yɔɔk cik nhiim bi ya liɔk:

⁷ ye rɔt nyuɔɔth ke yin ye ya kɛɛr de luɔi piath ne kaŋ yic kedhia; ye piocdu nyuɔɔth ke cinic riak, ku ye lɔ diu,

⁸ ku jam yic, cie leu ne lukwei; bi ran ye ran de bian waac kene yin bi yic ya liɛr, ne ciɛn kerɛɛc bi ya luel ne wɔɔk.

⁹ Ye aluɛk yɔɔk bik ya tɔ ne doŋ de banykenic, ku bik ya lɔyum enɔŋ keek ne kaŋ kedhia; ku cik ye naŋ ariir;

¹⁰ ku cik ye kual, yiki adot nyuɔɔth adon piath ebɛn; bik pioc de Nhialic Duluɛŋda bik ya dheeŋ ne kaŋ yic kedhia.

¹¹ Athiɛi de Nhialic ee tuɔl, ee luak bɛi enɔŋ raan ebɛn,

¹² ku ye wɔ pioc, buk luɔi rac ya jai kene kɔɔr rɛɛc de ka ke piny nom, ku buk ceŋ te cin miɔl, ku yuku lajik ku yuku Nhialic luɔi ne yepinye;

¹³ ku yuku ŋath cithiei kɔɔr kene tuɔl de nuɔm de Nhialinydiitda ku Duluɛk Yecu Kritho;

¹⁴ man ci rɔt gam ne wɔɔk, bi wɔ waar te de rɛɛc ebɛn, ku cɔk kɔc lɔcar kɔc ye kɔckeek ke ceŋde, ye kok ne luɔi piath.

¹⁵ Keekake ke e yin ke jam, ku yin ke yook, ku yin ke weei ne riɛr ebɛn. Ne ye ciɛn ran ye yi tɔɔn.