Romai 8 - Lek Jot de Jecu Kritho 1940

¹ Yen emane ee ciɛn lukwei enɔŋ keek kek kɔc ye tɔ ne Yecu Krithoic, kɔc cie cath ne ke de guɔp, ye ya ke de Jɔŋdit.

² Loŋ de Jɔŋdiit de piir ye tɔ ne Yecu Krithoic aci a luɔnybei ne loŋ de rɛɛcic ku de thuɔu.

³ Ke e cii loŋ ye leu ne luɔi, ne niɔpde ne guɔp, ee loi ne Nhialic, tuuc Wende ke thoŋ guɔp ke guɔp de rɛɛc ku ye ke de koc de rɛɛc, luk en rɛɛc wei ne guɔpic:

⁴ bi wɛt de loŋ bi jal ya yic ne wɔyic, wɔ kɔc cie cath ne ke de guɔp, ye ya ke de wei.

⁵ Kɔc ye cath ne ke de guɔp, aaye tak ne ka ke guɔp: ku kɔc ye cath ne ke de tiɛp aaye ka ke tiɛp loi.

⁶ Tɛŋ de ke de guɔp ee ya thuɔu; ku tɛŋ de ke de wei ee ya piir ku dɔɔr:

⁷ ne ke ye tɛŋ de ke de guɔp yen naŋ ater ke Nhialic; ne ke cen ye tɔ ne riɛr de loŋ de Nhialic, ku kace tɔ bi kan ya leu:

⁸ ku kɔc ye tɔ ne ke de guɔp aaci Nhialic ye leu ne yuɔm piɔu.

⁹ Ku we cie tɔ ne ke de guɔp, ee ya ke de tiɛp, na ye yenya ke Jɔŋdiit de Nhialic ee ceŋ ne weyic. Na ye ran ye ciɛn Jɔŋdiit de Kritho, e kace kɔn ya kede.

¹⁰ Ku na ye Kritho tɔ ne weyic, ke guɔp ee ya thou ne ke de rɛɛc, ku ye tiɛp ye piir ne ke de lajik.

¹¹ Ku na ye Jɔŋdiitde, yen yen man ci Kritho ci jɔt ne thouic, ye ceŋ ne weyic, ke yen, yen man ci Yecu Kritho jɔt ne thouic, abi gupkuɔn ye thou ya cɔk piir eya ne Jɔŋdiitden ye ceŋ ne weyic.

¹² Yen, mɛɛthcie, wɔ ye ciɛn kɛny de guɔp, bii wɔ ya piir ne ke de guɔp.

¹³ Na yaka piir ne ke de guɔp, ke we dhiil roth ne thouic; ku na yaka luɔi de guɔp cɔk thou ne Jɔŋdit, ke we bi ya piir.

¹⁴ Kɔc kedhia, kɔc ye Jɔŋdiit de Nhialic ke ɣɔm, aaye ya wɛɛt ke Nhialic.

¹⁵ We ce roth ber nyic ke we ye aluɛk bak ya riɔc; we nyic roth ke we ci dɔp bak ya cɔɔl, Wuɔ Abba, Awada.

¹⁶ Jɔŋdit mane ee wɔ yɔɔk ke tipkuɔ yi yeku mith ke Nhialic.

¹⁷ Ku na yuku mithke, ke wɔ bi ya ya adiit, adiit ke Nhialic, ku yuku mat wɔne Kritho yuku adiit; na yuku mat wɔne yen ne guɔmde, ke wɔ bi bɛr ya mat eya ne nuɔmde.

¹⁸ Aya tak ke ka yukuke guum emane ye yic ciɛn ke dɛ te thooŋe ke kene nuɔm bi nyuɔɔth ne wɔyic.

¹⁹ Ka ci cak aaye daai, aa ŋueny ne nyooth bene wɛɛt ke Nhialic nyuɔɔth.

²⁰ Ka ci cak aake ye tɔ e ke ye ka ke ciɛlic, ku kacie kek ke cɔk roth ye ka ke ciɛlic, ee ye piɔnde yen man e tɛɛu ke piny,

²¹ ku ye ŋɔth ke ka ci cak bike nyaai ne luɛɛkic luɛɛk de keyeluɛl ku tɛɛue ke ne nompalic de mith ke Nhialic.

²² Ayeku nyic ke ka cike cak kedhia ye keŋ ne tɔɔk de rɔp agut ci yemane.

²³ Ku kacie keek kepɛc, aaye wɔɔk eya, wɔ kɔc nɔŋ akɔŋ ke Jɔŋdit, wɔ ye keŋ ne wɔyic eya, titku dopda, ke ya ye wɛɛr de guɔpda.

²⁴ Wɔ cike luɔk ne ŋath: ku ŋath ye ŋem acie ya ŋath: yeŋa ye ke ye ŋem ŋɔɔth?

²⁵ Ku na yuku ke cuk ye ŋem ŋɔɔth, e kabuk ya tiit ne piɔn lir.

²⁶ Yenekee cɔɔk ye Jɔŋdit wɔ kony ne nioopda: wɔ ye lɔŋ ete yuku dhiil kuc; a kee Jɔŋdit ne guɔpde yenekee lɔŋ ne wɔɔk ne keŋ ce leu ne luɛl;

²⁷ ku yen man ye piɔth kɔɔr yic yeneka nyic tɛŋ de Jɔŋdit, ne ke yen lɔŋ ne kɔc cithiei ci man de piɔn de Nhialic.

²⁸ Ku kayuku nyic ke kaŋ kedhia ci jal ya diik enɔŋ kɔc ye Nhialic nhiar, agut kɔc cike cɔɔl ne piɔnde.

²⁹ Kɔc eke kɔnke nyic, aacike kan cɔk kɛɛr guɔp de Wende, bi ya wenkaai ne watmɛthken juec yic:

³⁰ ku kɔc cike kan lɔc, aacike cɔɔl eya: ku kɔc cike cɔɔl: aacike cɔk lajik eya: ku kɔc cike cɔk lajik, aacike noom eya.

³¹ Buk keekake jal ya dhuk wuude? Na ye Nhialic ye tɔ ke wɔɔk, ke yeŋa bi rɔt ya jɔt wɔɔk?

³² Nhialic man ken Wende peen, gɛm ne wɔɔk wɔdhia, cii wɔ bi ya miɔc ne kaŋ kedhia kene yen?

³³ Yeŋa bi lɔɔc ke Nhialic ya guɛɛl? Cie ya Nhialic man ye ke cɔk lajik?

³⁴ yeŋa bi ya lukwei? Cie Yecu Kritho man ci thou? ee yic, ee yen yen man ci jɔt ne thouic, ye tɔ ne ciɛn cueny de Nhialic, ku ye lɔŋ ne wɔɔk eya.

³⁵ Yeŋa bi wɔ ya week ne nhiɛr de Krithoic? ye ka ye wɔ dhal, ka ye muɔn de wei, ka ye ŋet, ka ye pawɛɛr, ka ye tat, ka ye rɔɔr, ka ye theep?

³⁶ Acit man cene ye gɔɔr, Ya wɔ yeke nɔk ne kedu ne akɔlic ebɛn; Wɔ yeke cɔk ye amɛl ke nɛk.

³⁷ Ee yic, wɔ ye kɔc ye tiam wuɔr ne keekake kedhia ne yen yen man ye wɔ nhiar.

³⁸ Aya cok nyic ke thou, ka piir, ka malaikai, ka bany, ka ka ke yemane, kene ka bi bɛn, ka riir,

³⁹ ka bɛɛr, ka thuɔɔth, ka toŋ dɛ de ka cike cak, aace wɔ bi ya leu ne wɛk ne nhiɛr de Nhialicic, nhiɛr ye tɔ ne Yecu Kritho Bɛnydiitdaic.