Romai 6 - Lek Jot de Jecu Kritho 1940

¹ Buk ŋo jal ya luel? Buk ya dhiac ne rɛɛcic, bi athiɛi ya dit?

² Acie yen. Wɔɔk, wɔ kɔc ci thou ne rɛɛc, buk bɛɛr ya dhiac ke wɔ ye ceŋ thin wuude?

³ Kuɔcka ke wɔ, wɔ kɔc ci baptithke ne Yecu Kritho, ke wɔ ci baptith ne thon cen thou?

⁴ Yen wɔ ci thiɔk wɔne yen ne thouic ne baptith; buk bɛr ya cath apiath ne piir jotic, ci man cene Kritho jɔt ne thouic ne nuɔm de Wun.

⁵ Na cuk mat wɔne yen ne man de thon cen thou, ke wɔ bi bɛr mat wɔne yen ne man de jon cen rɔt jɔt;

⁶ anyicku yekene, guɔp thɛɛrda ee piaat ne tiɛm ageer kɔu kene yen, bi guɔp de rɛɛc nyaai, duɔke wɔ bi bɛr ya aluɛk ke rɛɛc.

⁷ Ran ci thou ee waac ke rɛɛc.

⁸ Na cuk thou wɔne Kritho, e kanyicku ke wɔ bi bɛr ya piir wɔne yen.

⁹ Anyicku Kritho, man ci rɔt bɛr jɔt ne thouic, ace thou ber leu; thou aci ber ya riɛr ne yen.

¹⁰ Ee thou thol naatok ne rɛɛc ne thon cen thou, ku kee piir enɔŋ Nhialic ne piir yen piir.

¹¹ Ne ekene eya, nyiɛcka we ci thou ne rɛɛc, ku we piir nenɔŋ Nhialic ne tɔ tɔ we ne Yecu Krithoic.

¹² Yen duɔka rɛɛc ye cɔk nɔŋ riɛr ne wegup, bak kɔr rɛɛcde ya gam:

¹³ ku duɔka gupkuɔn ye gam rɛɛc ci ka ke luɔi de rɛɛc; yaka roth yiɛn Nhialic, ci man de kɔc ci roth jɔt ne thouic, ku yaka gupkuɔn yiɛn e ci ka ke luɔi de lajik ke Nhialic.

¹⁴ Rɛɛc ace we beer ya dɔk, ne ke cii we ye tɔ ne loŋic, we ye tɔ ne athiɛiic.

¹⁵ Jɔl ya ŋo? buk rɛɛc ya loi, ne ke cii wɔ ye tɔ ne loŋic, ku yuku tɔ ne athiɛiic? Acie yen.

¹⁶ Yaka kuc, ke na yaka roth yiɛn raan ke we ye aluɛk ye piŋ ne welke, ke we ye ya aluɛkke ye ran yaka gam wel; ka te yen ya rɛɛc agut thou, ka te yen ya gam de wel agut lajik?

¹⁷ Yen keeyabi lɛc ya tɔ kene Nhialic, te e cii we kan cak ya aluɛk ke rɛɛc, ke we ci pioc cene we piɔc jal gam ne wepiɔth;

¹⁸ ku na ci we luɔk ne rɛɛcic, ke we ci jal ya aluɛk ke lajik.

¹⁹ An ye jam ci jam de kɔc, ne niop de wegup. Acit man cii we wegup ya gam ci aluɛk mɛt kene acuɔl, ku ne rɛɛc mat ke rɛɛc, yenekee cɔɔkde emane yaka gupkuɔn gam ke we ye aluɛk ke piath ku agut luɔi lajik.

²⁰ Ɣɔn ye we aluɛk ke rɛɛc, ke we eke ci nhiim pal ne luɔi piath.

²¹ Ye kepiɛth ŋo cak yok ɣɔn ne keekake yic ye we ke nyin riɔc emane? Thok de keekake ee thuɔu.

²² Ku emane, te cii we nhiim pal ne rɛɛcic, ku cak ya aluɛk ke Nhialic, ke we ye naŋ kɔth lajik, ku thokdu abi ya piir athɛɛr.

²³ Ariɔm de rɛɛc yenekee ya thou, ku miɔc de Nhialic yenekee ya piir athɛɛr ne Yecu Kritho Bɛnydiitda.