Romai 16 - Lek Jot de Jecu Kritho 1940

¹ WE yiɛnke Poibe nyankɛida, ku ye awun de kanitha de Kenkurea:

² bak loor ne Bɛnyditic, ne piath de kɔc cithiei, ku yaka kuɔny ne keriɛc ebɛn ye ŋaŋ enɔŋ week: ne kee yen ya mekuny de juaac, agut an eya ne guɔpdie.

³ Mathka Pirithika ku Akula kɔc ye wɔ ke lui ne Yecu Krithoic,

⁴ kɔc eke ci piirden gam ne weicie; ku kacie ɣɛn e ye ke leec ne guɔpdie, aaye kanithai ke leec eya kanithai ke Juurkɔk kedhia:

⁵ ku mathka kanitha ye tɔ ɣonden. Mathka Epaineto randien nhiar, yen man ye akɔŋ de Athia enɔŋ Kritho.

⁶ Mathka Mari, man ye yene ye we luɔi areet.

⁷ Mathka Andoroniko ku Junia, kɔc kaar kene ɣɛn, ku ne wɔ tɔ ne macic netok, kɔc dit ke dutuuc yic, ku kek eke kɔn Kritho yok ne ɣɛn.

⁸ Mathka Ampiliato randien nhiar ne Bɛnyditic.

⁹ Mathka Urbano randɛn ye lui ke wɔɔk ne Krithoic, ku Thataku randien nhiar.

¹⁰ Mathka Apele ci ya them ne luɔi ne Krithoic. Mathka kɔc ke dhien de Arithobolo.

¹¹ Mathka Kerodion ran kɛɛr wɔ. Mathka kɔc ke dhien de Narkitho, kɔc ye tɔ ne Bɛnyditic.

¹² Mathka Turupaina kene Turupotha, man ye lui ne Bɛnyditic. Mathka Perthi ran nhiar, ran ci ya lui areet ne Bɛnyditic.

¹³ Mathka Rupo ci lac ne Bɛnyditic, ku man man ye ama eya.

¹⁴ Mathka Athunkiritho, ku Pelogon, ku Kerme, ku Pataroba, ku Kerma, kene mɛɛth tɔ kene keek.

¹⁵ Mathka Pilologo ku Julia, ku Nereu kene nyankene, ku Olumpa, kene kɔc cithiei kedhia tɔ kene keek.

¹⁶ Mathka roth ne ciɛm lajik. Kanithai ke Kritho kedhia aaye we muɔth.

¹⁷ Emane we laŋke, mɛɛthcie, ya bak kɔc ya ŋem kɔc ye piɔth naŋ teŋ de roth ku tɛɛu de ka yeneke kɔth, waac kene pioc yene we piɔc: ku yaka roth muɔk wei ne keyic.

¹⁸ Kɔc yinya aace Bɛnydiitda Kritho acik ye luɔi, ee ya yanyden e yiki luɔi; ku kaaye kɔc cin piɔth awac dhoom ne jam piɛthden lɔ cai.

¹⁹ Gamduɔn de wel ee thiɛi enɔŋ raan ebɛn. Yen an ye piɔu lɔyum ne week: ku keeyabak kaŋ ya nyic agut ke ye ya kepiath, ku yaka piɔth kuur ne ke ye ya kerac.

²⁰ Ku Nhialiny de dɔɔr abi Catan duɔi piny ne wecok ne keenin likka. Eeyabi athiɛi de Bɛnydiitda Yecu Kritho bi ya tɔ kene week.

²¹ Timotheo ran ye lui kene an ee we muɔth; ku Lukio ku Jathon kene Thothipataro, kɔc kaar kene ɣɛn.

²² Ɣɛn an Tertio, an ran gɔɔr thon, an ye we muɔth ne Bɛnyditic.

²³ Gayo rɛɛr ɣɛn, ku ye kanitha reer ebɛn, ee we muɔth. Erathato meŋem de weu ke baai ee we muɔth kene Kuarto wanmaathda.

²⁴ Eeyabi athiɛi de Bɛnydiitda Yecu Kritho bi ya tɔ kene week wedhia. Amen.

²⁵ Eeyabi nuɔm bi ya tɔ kene yen, yen man ye we cɔk leu kɔɔc ci man de welpiɛthcie, ku weet de Yecu Kritho, ci man cene kecikum nyuɔɔth, ke e ci thian ye moony ne run,

²⁶ ku kee jal tic emane, ku kee jal cɔk nyic juɔr ebɛn, agut piɛŋ gam, ne kacigɔɔr ke nebii, ci man de loŋ de Nhialiny ye ceŋ;

²⁷ eeyabi nuɔm bi ya tɔ kene Nhialiny anyiɛc kaŋ yetok ne Yecu Kritho athɛɛr wada. Amen.