Romai 15 - Lek Jot de Jecu Kritho 1940

¹ Wɔ kɔc ye riɛr wɔ bi kathiek ke kɔc ye niɔp ya dhiil ne guɔm, ku dukku wɔpiɔth ye yuum wɔpɛc.

² Ne ŋɛk ne wɔɔk ne ye ran ye reer ke yen yuum piɔu ne kepiath agut yiik nhial.

³ Kritho eya ee ken ye piɔu ya yuum yetok; ku, kacit man cene e gɔɔr, Ya yɔŋ de kɔc eke ye yi yɔŋ ee loony ne ɣayeth.

⁴ Kaŋ kedhia ka cike gɔɔr ɣɔn aake gɔɔr bik wɔ ya piɔc, buk ya naŋ ŋath ne liɛr de wɔpiɔth ku ne duɔt ye kacigɔɔr wɔ duut piɔth.

⁵ Nhialiny de liɛr de piɔu ku duɔt de piɔu abi we ya cɔk thoŋ piɔth ne roth ne Yecu Kritho:

⁶ bak Nhialic ya noom netok ne thoŋ tok, Nhialic Wun de Yecu Kritho Bɛnydiitda.

⁷ Yen yaka roth loor, ci man ci Kritho we loor eya, ne nuɔm de Nhialic.

⁸ An jam ya Kritho ee cɔk ye awun de ŋuɛlɛɛi ne yic de Nhialic, bi wel cike kan lɛk kuɛɛr bi ke cɔk rir:

⁹ ku bi Juurkɔk bik Nhialic ya noom ne kacden de piɔu; ci man cene ye gɔɔr, Ya yen yin ba ya leec ne Juurkɔk, Ku ya rinku piɔny.

¹⁰ Ku ber jam, Ye yaka piɔth lɔyum, we Juurkɔk, wene kɔcke;

¹¹ Ku ber ye, Yaka Bɛnydit piɔny, we Juurkɔk wedhia; Ku ne ye juɔr ebɛn piɔny.

¹² Ku beere Yithaya luel, Ye meei de Jethe abi tɔ, Ku yen yen man bi rɔt jɔt bi Juurkɔk ya dɔk; Abii Juurkɔk roth ya gɛi ye.

¹³ Eeyabi Nhialiny de ŋɔth bi we ya thiɔŋ ne yum de piɔu ku dɔɔr ne gam ye we gam, bak ya dit ne ŋathic, ne riɛr de Jɔŋdiit Lajik.

¹⁴ Ku ɣɛn eya we yake cok nyic, mɛɛthcie, ke we ci piath ke thiɔŋ, ku cak thiaŋ ne nyic ebɛn, ku yaka wɛi de roth leu.

¹⁵ Ku we gar keek ne ŋeeny koor, ci man yan we cɔk ciit wenhiim, ne athiɛi ci yiɛn ɣɛn ne Nhialic,

¹⁶ ban ya ya awun de Yecu Kritho enɔŋ Juurkɔk, ne luɔi yan welpiɛth ke Nhialic loi, bi yin de Juurkɔk Nhialic, e ke ye ka ke koc, bi ya diik, ye koc ci cɔk lɔcar ne Jɔŋdiit Lajik.

¹⁷ Yen an ye anom leu ne lec ne Yecu Krithoic ne ka ye ya ka ke Nhialic.

¹⁸ Acin kɔk bake ya ŋɛɛny ne luɛl a kaaye ka cii Kritho ke loi ne ɣɛn kepɛc, ba Juurkɔk ya cɔk gam, ne luɔi ku wɛt,

¹⁹ ne riɛr de ciit ku kagɛiyeke, ku ne riɛr de Jɔŋdiit Lajikic; a guɔ Jeruthalem ku bɛi yuil en alɔ gut Yilurikon, a guɔ ke thiɔŋ ne lek de welpiɛth ke Kritho;

²⁰ ee yic, cak weet de welpiath yene e ye ke ya ɣoi, ku kee cie ɣan ceneke Kritho thol ne nyic thin, kɛlke ɣan bi ya ke yik ɣon cii ran dɛ wɛc;

²¹ ci man cene ye gɔɔr, Ya kabik ya ŋem, yeke kene thoŋde guɔ ɣeet, Ku kabik ya dot kek kɔc ken e ya guɔ piŋ.

²² Yen ɣan e ye dai peen ne lɔ enɔŋ week:

²³ ku yemane, ɣan ci ciɛn ɣan kɔk eene, ku lɔ enɔŋ week ee ca ŋaŋ ne keerun juecka.

²⁴ Yen na yen lɔ Thipania, (ke an ŋath bar de week dholic, ku bak ɣa lɔ kuɔny dhol, te can ɣapiɔu kan yuum ne yuul wɔne week) —

²⁵ ku emane, ɣan lɔ Jeruthalem, ba ke de kɔc cithiei lɔ loi.

²⁶ Ee piathden de yum de piɔu, kek kɔc ke Makedonia ku kɔc ke Akaya bik kɔc ye ŋɔŋ ne kɔc cithiei yic bik ke miɔc kɔc tɔ ne Jeruthalem.

²⁷ Ee yic, ee piathden de yum de piɔu; ku kee ya kɛny. Na ci Juurkɔk cɔk ye mat kene keek ne ka ke wei, e kee ya kɛny enɔŋ keek eya bik ke ya luɔi ne kapiiny.

²⁸ Yen na ca yeluɔine thol, ku ca keeka ye luɔkka dhiɛl ne kecin, ke we ba bar ne lɔdie Thipania.

²⁹ Ku kene eka nyiɛc, na lar enɔŋ week, ke an bi lɔ ke ɣan ci thiaŋ ne athiɛi de Kritho.

³⁰ Yen we yake lɔŋ, mɛɛthcie, ne Bɛnydiitda Yecu Kritho, ku ne nhiɛr de Jɔŋdit, ya bak Nhialic ya lɔŋ areet wene ɣɛn ne kedie;

³¹ bi ɣa luɔk enɔŋ kɔc areecwel tɔ ne Judaya, ku bi luɔidien luɔi ne kɔc ke Jeruthalem bi loom ne kɔc cithiei ne yum de piɔu;

³² ba lɔ enɔŋ week ne yum de piɔu ne piɔn de Nhialic, ku jal lɔŋ wɔ week netok.

³³ Eeyabi Nhialiny de dɔɔr ya tɔ kene week wedhia. Amen.