Romai 12 - Lek Jot de Jecu Kritho 1940

¹ Yen we yake lɔŋ areet, watmathcie, ne kac de piɔu de Nhialic, ya bak gupkuɔn miac, bik ya kapiir ke kɔɔc, ku yiki lajik, ku yiki ka mit ke Nhialic, yenekee duɔr piɛthduɔn.

² Ku duɔka ka ke yepinye nom ye loi ne keeakolke: yaka wath ne jon ye nyinhduɔn jɔt, bak Nhialic a nyic piɔu ne them, piɔnden piath, ku piɔnden mit, ku piɔnden lajik.

³ We lɛk keek ne athiɛi ci yiɛn an, we raan ebɛn, ce raan cii rɔt ye cɔk ŋuan; ne ye rɔt cɔk koor acit man ci Nhialic ŋɛk ya miɔc ne gam.

⁴ Acit man nɔŋ wɔ biɔk juec ke guɔp tok, ku biɔk kedhia aacii luɔi ke thoŋ,

⁵ yen wɔ ye juec, ku yuku naŋ guɔp tok ne Krithoic, ku wɔɔk wɔdhia wɔ ye biak de ŋɛk ke ya biak de nɛk.

⁶ Na yuku naŋ miɔc kuɔtic ne athiɛi ci yiɛn wɔɔk, te yen lek, ke yuku luel ci man de dit de gamda; ku te yen luɔi,

⁷ ke wɔ yuku roth gam luɔida; ku te yen ran ye pioc, ke ne ye tɔ ne piocdeic;

⁸ ku te yen ran ye weet, ke ne ye tɔ ne weetdeic; ku te yen ran ye miooc, ke ne ye mioc ne awaiic; ku te yen ran ye dɔk, ke ne ye dɔk te cin adhar; ku te yen ran ye piɔu kac, ke ne ye ye yuum piɔu.

⁹ Yaka nhiɛr cɔk cinic adhuɔm. Yaka rɛɛc maan; ku yaka lɔ nuat ne piathic.

¹⁰ Yaka kok ne roth ne nhiɛr de maath; ye ŋɛk ŋɛk cɔk ŋaar ne rieu;

¹¹ duɔka roth ye dak ne luɔi; yaka lɛth ne weikuɔn; yaka Bɛnydit luɔi;

¹² yaka piɔth lɔyum ne ŋath; yaka gum te ye we tɔ ne rɛɛcic; yaka dhiac ke we laŋ;

¹³ yaka kɔc cithiei yiɛn ke cik ya ŋaŋ; yaka gooŋ.

¹⁴ Yaka kɔc ye we ŋet thiei; yaka thiei ku duɔka ye cieen.

¹⁵ Yaka piɔth lɔyum wene kɔc lɔ piɔth yum, ku yaka dhiau wene kɔc dhiau.

¹⁶ Yaka piɔth thoŋ ne roth. Duɔka piɔth ye naŋ ka ke bany; yaka piɔth kuur. Duɔka nhiimkuɔn ye cɔk dit ne nyiny de kaŋ.

¹⁷ Duɔka rɛɛc ye raan luɔi we ye dhuk ne rɛɛc. Yaka kaŋ tak ka ye lɔcap ne kɔc nyin kedhia.

¹⁸ Te ye we ye leu, ne biakduɔn, ke we ye naŋ dɔɔr ne kɔc kedhia.

¹⁹ Duɔka roth ye guɔr, kɔc nhiarke, ku yaka ɣok pat nom: ee gɔɔr, Ya guur ee kedie, aba cool, yenekee luel Bɛnydit.

²⁰ Na cɔk ran nɔŋ we ater, ke miɔc ne ke ciɛm; ye ci yal, ke cɔk dek: na yaka ye loi wuɔya, ke we bi cool ke mac ya kuɔt e enom.

²¹ Duɔka rɛɛc ye cɔk tiam we; yaka rɛɛc tiam ne piath.