Romai 11 - Lek Jot de Jecu Kritho 1940

¹ Yen an jɔl thiec, Ya ci Nhialic kɔcke cuat wei? Acie yen. Ɣɛn eya an ye muɔny Yithrael, de kuan de Abraɣam, de dhien de Benjamin.

² Nhialic aken kɔcke cuat wei kɔckeek cike kan ya nyic. Ka kuɔcka ke cii kecigɔɔr luel ne Elija? ɣɔn lɛŋ en Nhialic ne ke de Yithrael,

³ Ye Bɛnydit, aa nebiiku nɔk, ku kaaci kɛɛtku ke koc thuɔr piny, ku an ci jal doŋ atok, kaakɔr weicie.

⁴ Cii Nhialic ben dhuɔk en yede? Ee jam, Ye an ci rɔt buɔth bianabur dherou de kɔc, kɔc ken kenhiɔl tuɔk Baal.

⁵ Yenekee cɔɔkde ne yeman cit emane anɔŋ ka ci doŋ ka cike lɔc ke athiɛi.

⁶ Ku na ye ya ke de athiɛi, e kace beer ya ya ke de luɔi: na cii yinya, ke athiɛi ace beer ya ya athiɛi. Ku na ye ya ke de luɔi, e kace beer ya ya ke de athiɛi: na cii yinya, ke luɔi ace beer ya ya luɔi.

⁷ Jɔl yaŋo? Ke ye Yithrael kɔɔr aken yok, ku kee yok ne kɔc cike lɔc, ku biakne ee cɔk rir piɔu:

⁸ ci man cene ye gɔɔr, Ya kaaci Nhialic ke niɛn, bik cuɔk ye ŋem ne kenyin, ku bik cuɔk ye piŋ ne keyith, agut ci emane.

⁹ Ku jam Dabid, Ye ne agenden de miɛth jɔl ya thindik, ku ne ya aguur, Ku ne ye ya ke yene kɔth, ku ye keden de guur.

¹⁰ Ne ke ye nyin cuɔl, bik cuɔk ye yin, Ku ye ke gooŋ kɔth riarriar.

¹¹ Yen an thiec, Ya ne kek kɔth bik yuik? Acie yen: ee ci yuikden ya luak enɔŋ Juurkɔk, bi ke ya cuɔth piɔth tiɛl.

¹² Ku na ye yuikden ya baany ne tiɔp nom, ku ye maarden ya baany enɔŋ Juurkɔk; ete cii piath te ye kek naŋ kaŋ?

¹³ Ku ɣan ye jam wɔ week we Juurkɔk. Na ca jal ya metuny de Juurkɔk, ke an ye luɔidie dheeŋ:

¹⁴ lan na re ke ɣan bi kɔccie ya cuɔth piɔth tiɛl kɔcciek ke guɔp, ku ba kɔk ke keek yen luɔk.

¹⁵ Na ci cuɛt weiden ya mɛɛt de piny nom kene Nhialic, ke loom de keek bi yaŋo, cii bi ya piir ne thouic?

¹⁶ Ku na ye ke ci kan ŋuany ye lajik, ke yenekee cɔɔk de ke dɛ ebɛn: ku na ye meei ye lajik, ke yenekee cɔɔk de ker.

¹⁷ Ku na ci ker kɔk dhuɔŋ wei, ku ci yin, yin keer de olim roor, cii nuɛɛt ne keyic, ku ca pian de tim de olip rɔm wene keek ne mei;

¹⁸ ke yin duk rɔt ye leec ne ker nhiim: ku na ye rɔt leec, e kacie yin e ye mei cɔk kul, aaye mei keeka ye yin cɔk kul.

¹⁹ Aba yen luel, Wu ker aake dhoŋeke wei, ku bi ɣa nuɛɛt thin.

²⁰ Ee yic, aake dhoŋeke wei ne cuɔk gamden, ku yin ye kɔɔc ne gamdu. Duɔne nom ye dit, ye riɔc:

²¹ na ne Nhialic ken ker thɛɛr cɔk tɔ, e kace yi bi bɛr ya cɔk tɔ eya.

²² Yaka piath de Nhialic ŋem ku wɛide: kɔc ye yuik aayeke waai, ku kee piath ne yin, te yin dhiac ne piathdeic; na cii yinya, ke yin teeme wei eya.

²³ Ku keek eya, te cik kek ye dhiac ne cuɔk gamdenic, e kaabi bɛr nuɛɛt thin: aaleu Nhialic ke ne nueet thin.

²⁴ Na ne yin ci tɛɛm wei ne ke ci cɔk ye tim de olim roor, ku nueete yi ne tim piɛth de olipic ke cie cɔɔkdu, ke keeker thɛɛrke ci we bi wuɔr ne nueet bene ke nuɛɛt ne olim thɛɛrden kɔu?

²⁵ Eeyabak yekecikume ya cuɔk ye kuc, mɛɛthcie, kɛlke we bi roth ya dhoom ne nyinyduɔn de kaŋ, ya biak dɛ de akak ee Yithrael lɔny, agut bɛn de kuɛth de Juurkɔk;

²⁶ a yeneka bene Yithrael luɔk ebɛn: ci man cene ye gɔɔr, Ya Duluɛk abi bɛn bei ne Dhiɔn; Ku kabi kerac wɛl wei enɔŋ Jakob:

²⁷ Ku yekene yenekee mandie wɔne keek, Ban rɛɛcden ya nyaai.

²⁸ Ke de welpiath, ee rɔt cɔk ye ater enɔŋ keek ne keduɔn: ku ke de loc, aaye kek ya kɔc nhiarke ne ke de kuarken.

²⁹ Miɔc de Nhialic ku cɔtde aacenke yepiɔu ye dhuk.

³⁰ Acit man ɣɔn ye we areecwel enɔŋ Nhialic, ku cak kac de piɔu jal guɔ loom ne reecden de welic,

³¹ yenekee cɔɔk cik keekɔcke ya areecwel emane eya, bi kac de piɔu ne ci nyuɔth week bik kek ya naŋ kac de piɔu eya.

³² Nhialic ee raan ebɛn thiɛk ne cuɔk gamic, ben piɔu ya kac ne raan ebɛn.

³³ Anda thuɔɔth de baany de yic adot kene nyiny de Nhialic! Anda luŋden cie yok thok, ku dhɔlkeek cie kuany yic!

³⁴ Yeŋa e ye tɛŋ de Nhialic nyic? ka yeŋa ne ye ya mejuirden de wel?

³⁵ yeŋa ne ci ye kan miɔc, ku bi bɛɛr cuɔt?

³⁶ Kaŋ kedhia, aaye ya kake, aaye bɛn ne yen, ku kaaye lɔ ne yen. Eeyabi nuɔm ya tɔ kene yen athɛɛr. Amen.