Romai 1 - Lek Jot de Jecu Kritho 1940

¹ Ɣan Paulo, aluaŋ de Yecu Kritho, ɣan man ci cɔɔl ba ya metuc, ku ci a wɛk welpiɛth ke Nhialic,

² ka eke ci kan luel ne nebiike ne ka lajiik cike gɔɔr,

³ ne Wende man ci dhieth ne kuan de Dabid ne biak de guɔp,

⁴ ke ci luel ya ye Wen de Nhialic ne riɛr, ne weei de lajik, ne ke cen rɔt jɔt ne thouic; ye Yecu Kritho Bɛnydiitda,

⁵ ran ci wɔ cɔk nɔŋ athiɛi kene tuɔc, bi juɔr ebɛn cɔk ye gam ne ke de rinke.

⁶ Ku we cike mat ne keekɔc ye gamke yic eya, ku ci we cɔɔl ke we ye ka ke Yecu Kritho:

⁷ we yake yɔɔk, we raan ebɛn tɔ ne Roma, kɔc nhiar Nhialic keek, cike cɔɔl bik ya kɔc cithiei: Eeyabak ya naŋ athiɛi ku dɔɔr de Nhialic Awada, ku Bɛnydiitda Yecu Kritho.

⁸ Ketueŋ, ee ya Nhialinydie leec ne Yecu Kritho ne week wedhia, ne luɛl yene gamduɔn luel ne piny nom ebɛn.

⁹ Nhialic ekee ɣa nyic, yen man ya luɔi ne tiɛpdie ne welpiɛth ke Wende yic, ne luɔt yan we luut ne luɛl ne lɔŋdieyic ne nyindhia,

¹⁰ ya thiec, lan bene ɣɛn cɔk lɔ nenɔŋ week emane ne piɔn de Nhialic.

¹¹ An ŋɛŋ ŋem de week, ba we lɔ yiɛn miɔc de wei, bi we ya cɔk kaac;

¹² ee bi ɣa ya duut piɔu ne weyic wɔne week, ŋɛk ne gam de ŋɛk, keduɔn ku kedie.

¹³ Eeyabak ya cuɔk ye kuc, mɛɛthcie, ye lɔ yan lɔ enɔŋ week dai kɔɔr (an ee ye peen aɣet ci emane), ba ya naŋ luɔk ne weyic eya, ci man de Juurkɔk.

¹⁴ Ɣan nɔŋ kɔu kany enɔŋ Girikii, ku Bɛɛr, ku tenɔŋ kɔc nyic kaŋ kene acibeel.

¹⁵ Yen, ci man lɛu ɣan en, acan leeth ne weet de week eya ne welpiath we kɔc ceŋ Roma.

¹⁶ Ɣan ci yic ye liɛr ne welpiɛth ke Kritho: ne ke yen ya riɛr de Nhialic ne luak enɔŋ raan ebɛn ran ye gam; ee kan ya muɔny Juda, ku jɔl ya muɔny Giriki eya.

¹⁷ Ne ke yene lajiŋ de Nhialic nyuɔɔth ne keyic ne gam agut gam: ci man cene ye gɔɔr, Ya kɔc lajik aabi ya piir ne gam.

¹⁸ Ɣok de Nhialic ee nyuɔth nhial ne cuɔk piath de raan ebɛn, ku ne cuɔk lajik; kek keek man ye yic muɔk ne awacic;

¹⁹ ne ke cene ke ye nyic de Nhialic nyuɔɔth ne keyic; ee cii Nhialic nyuɔth keek.

²⁰ Ka kee kuc nyin ke elan e ciɛkne piny aaya ŋem egek, aaya nyic ne kacike cak, agut riɛr athɛɛrde ku yic yen Nhialic; yen keekɔcke aabi ya ciɛn kuny:

²¹ ne ke ye kek Nhialic nyic, ku cik ye noom ci man de Nhialic, ku cik ye leec. Aacii tɛŋden ke ya ya ciɛlic, ku ci piɔthken cuɔl piɔth ci not.

²² Aaye roth cɔk ye kɔc nyic kaŋ, e kee ci bel,

²³ ku kaa nuɔm de Nhialiny cieluɛl waar ne kɛɛr de guɔp de ran ye luɛl, ku ke de diɛt, ku ke de lai ye cok ŋuan, ku ke de ka ye mol piiny.

²⁴ Yen aacii Nhialic ke koon ne kɔɔr rɛɛc de piɔthken agut acuɔl, bi gupken ya yuur ne keyic:

²⁵ ne ke cik kek yic de Nhialic ya waar ne lueth, ku yiki ke ci cak door ku luiki awɛɛr Duciɛk, man cithiei athɛɛr. Amen.

²⁶ Yekene acii Nhialic ke kuɔn kɔɔr rɛɛc de guɔp: diarken aaye ke ci cak keek waar ne ke kene cak keek:

²⁷ ku yene ye cɔɔk de roor eya, pɛlki ke ci cak diar, yiki leeth ne kɔɔr rac yi ŋɛk ke ŋɛk, moc ee ke wac rɔt loi ke moc, ku kaye ariop de ke yiki wuɔc loom ke ye ya kepiɛthden.

²⁸ Reec cik kek nyiny de Nhialic rɛɛc acen ke kuɔn tɛŋ piɔlic, bik keeka ce piathke ya loi;

²⁹ aaci keriɛc ce lajik ebɛn ke thiɔŋ, bɛɛl, rɛɛc, wek, guur; aa thiaŋ ne tiɛl, ku tiɛr, teer, adhuɔm, aman, luɔm,

³⁰ aa kɔc ye kɔc luɛɛl, cike maan ne Nhialic, kɔc ye jam arac, dit piɔth, aaye roth leec, aaye karac cak, cik wel ke kɔcken ye gam,

³¹ kɔc cin nyic, kɔc ye mɛt riɔk, kɔc cin yic nhiɛr ci cak kɔc, kɔc cin kac de piɔu,

³² kɔc na cakki luŋ de Nhialic nyic, (ke kek kɔc ye keekake loi cike luɔk thou,) e kee ye keekake loi, ku yiki roth mat ne kɔc ye keekake loi yic.