Pilipoi 2 - Lek Jot de Jecu Kritho 1940

¹ Yen na ye naŋ cɔt ne Krithoic, ku na ye naŋ duɔt de piɔu de nhiɛr, ku te yen naŋ man de Jɔŋdit, ka te yen naŋ kac de piɔu ku nyinkuɛɛny,

² ke we yaka yumdien de piɔu cɔk ye ya yic, bak ya naŋ taŋ thoŋ, ku yaka naŋ nhiɛr thoŋ, yaka mat ne tok, yaka naŋ piɔn tok,

³ duɔka luɔi ye cɔk nɔŋic tɔŋ, ka dit de piɔu, ee bak piɔth ya kuur, ye ŋɛk ŋɛk thiekic ne yen;

⁴ ku ci ŋɛk kake ye dot kepɛc, ye ŋɛk ka ke ŋɛk dot eya.

⁵ Cakka yetɛŋe cɔk ye tɔ ne weyic, ke e ye tɔ ne Yecu Krithoic eya:

⁶ yen man e kɔn ya tok ke Nhialic, ku ken bi ciɛt Nhialic tak ne ye pɛc:

⁷ ku puc rɔt bei, ku loi rɔt ke ye aluak, ku ci cak ne ye raan.

⁸ Ɣɔn ye ci rɔt yok ne ye raan, ke cɔk yepiɔu cɔk koor, ku gɛm rɔt thuɔu, ee yic, thou ne tiɛm ageer.

⁹ Yen acii Nhialic piɛth nom nhial areet, ku ciɛk rin war rin kedhia:

¹⁰ bi kɔc kenhiɔl ya tuk kedhia ne rin ke Yecu, kanhial ku ka tɔ ne piny nom, ku ka tɔ ne pinyic;

¹¹ ku bi liep ke kɔc kedhia ya gam, ya Yecu Kritho ee Bɛnydit, ne nuɔm de Nhialic Wun.

¹² Yen, kɔcciek nhiar keek, acit man ye we wel gam ne nyindhia, ku kacie tɔ yan tɔ thin yetok, ayaka jal loi areet te yan liu, yaka luaŋduɔn loi ne riɔc ku ne lɛth;

¹³ Nhialic yenekee lui ne weyic bak ya naŋ piɔth ku luɔi, ne keden ye lɔyum ne yepiɔu.

¹⁴ Yaka keriɛc ebɛn loi te cin luɔm ku ateere;

¹⁵ bak ya ciɛn awac ku yaka lɔcai, ku yaka mith ke Nhialic ye ciɛn acuɔl ne kuat ciɛlic kuan ŋɔl ku ye areecwel, bi we ya ŋem ke we ye ya ɣɛɛr de piny nom ne keyic,

¹⁶ ku yaka wɛt de piir muɔk nhial, ba naŋ ke bene ɣa lɛc nom ne kol de Kritho, ya kɛn ya riŋ ne ciɛlic ku kɛn ya lui ne ciɛlic.

¹⁷ Ee yic, ku na ci ɣa gam ne ke de koc nom ku ne luɔi de gamduɔn, e kanhiaar, ku ya piɔu miɛt wɔne week wedhia:

¹⁸ ku we wedhia eya yaka nhiaar, ku yaka piɔth lɔyum wene ɣɛn.

¹⁹ Ku kaŋaath ne Bɛnydit Yecuic ya ba Timotheo dai tuɔc enɔŋ week, ba ya naŋ duɔt piɛth de piɔu eya, te can ceŋduɔn piŋ.

²⁰ Acin ran dɛ cite yen, bi diɛr areet ne ceŋduɔn ci yen.

²¹ Keek kedhia aaye ka ke gupken kɔɔr, ke cie ka ke Yecu Kritho.

²² Ku we ci luɔiden yen loi acak yok, ee ciɛt man ye meth wun luɔi, yenekee cɔɔk cen lui kene ɣɛn ne thiai de welpiath.

²³ Yen aŋaath ke ba guɔ tuɔc week, elantoŋ ban ke bi luɔi ɣɛn ŋem:

²⁴ ku ɣan ye rɔt gɛi ne Bɛnydit ke ɣan bi dai lɔ enɔŋ week eya ne guɔpdie.

²⁵ Ku kaca yok ne piath ba Epaprodito tuɔc week, man ye wanmaath ku ye lui kene ɣɛn ku yuku lathkeer netok, ku ye atocduɔn ku ye melui de ka yaeke dak;

²⁶ ee we ŋaŋ wedhia, ku kee dhiau piɔu areet, ne piŋ cii we ye piŋ ke bec:

²⁷ ku kee ci cok duɔr thou neyic ne bec: go Nhialic piɔu kac ne yen; ku kacie tenɔŋ yen yetok, ee tenɔŋ ɣɛn eya, kɛlke ɣan bi dhieu nuɛɛt cok.

²⁸ Yen an ci ŋueny ne tooc de yen, a na wuɔ bɛɛrka ye ŋem, ke we lɔ piɔth yum, ku ye dhiendien de ɣapiɔu jal liɛr.

²⁹ Yen luɔrka ne Bɛnyditic ne miɛt de piɔu ebɛn; ku yaka kɔc yinla riɛu:

³⁰ ee luɔi de Kritho yenekee duur e cɔk thou, ku cii diɛɛr ne weike, bi luɔiduɔn e ci dak bi cuɔl ɣɛn.