Pilipoi 1 - Lek Jot de Jecu Kritho 1940

¹ Paulo kene Timotheo, awuut ke Yecu Kritho, aalek kɔc cithiei kedhia ne Yecu Krithoic tɔ ne Pilipoi, ku biceep kene dikoon:

² Eewuubi athiɛi ku dɔɔr ya tɔ kene week enɔŋ Nhialic Awada ku tenɔŋ Bɛnydiitda Yecu Kritho.

³ Ɣan ye Nhialinydie leec ne ciit yan anom ciɛt ne week,

⁴ ku te yan lɔŋ ne we wedhia, ke ɣan ye lɔŋ ne lɔyum de piɔu.

⁵ An ye piɔu lɔyum ne man ye we mat wene ɣan ne athiɛi de welpiath, ɣɔn ne acitnom agut ci yemane.

⁶ Aya cok nyic yekene, ke yen man e gɔl luɔi piath ne weyic bi dhiac ke cɔk piath agut kol de Yecu Kritho.

⁷ Ku kapiath ba ya cok tak yala ne we wedhia ne tɔ ye we tɔ ne ɣapiɔu; ku ne man ye we mat wene ɣɛn ne athiɛi ne manydie ku ne gel yan welpiath gel, ku cak ke rir.

⁸ Nhialic yenekee ya duleŋdie, yeneka nyic kɔr yan we kɔɔr wedhia ne kacdiit de piɔn de Yecu Kritho.

⁹ Ku yekene ayan lɔŋ ya bi nhiɛrduɔn ya lɔ ke dit ne nyicic ku ne ciit de keriɛc ebɛnic;

¹⁰ bak ka ye piath ya cok ne nyic kedhia, bak ya lɔjik ku cak ye kɔth agut kol de Kritho;

¹¹ ye we thiɔŋ ne ka ye luɔk ke lajik, ka ye tɔ ne Yecu Kritho, bi nuɔm ku piɔny de Nhialic ya nyuɔɔth.

¹² Eeyabak ya nyic, mɛɛthcie, ke ka ci ɣa lɔny ci roth cɔk ye athiɛipiny de welpiath;

¹³ ne ke cene manydie nyuɔɔth ne Krithoic thiɛi ne rem de dutiitic ebɛn, ku raan biak ebɛn;

¹⁴ ku kɔc juec ke mɛɛthkuɔ ne Bɛnyditic, ye manydie ke cɔk gei roth, aa ŋeeny areet ne luɛl de wet de Nhialic te cin riɔc.

¹⁵ Ye weet de kɔk ne Kritho ye yic naŋ tiɛl ku tɔŋ; ke kɔk ne piɔn piath:

¹⁶ aye keekɔcke loi ne nhiɛr, ne ke nyic kek ye ke ɣan ci taau ne gel de welpiath:

¹⁷ ku kaka aaye lek ne Kritho ne tɔŋ, te cin yic, ayiki cɔɔl yi bik yɔŋ de ɣɛn gɔɔc ne manydieic.

¹⁸ Jɔl ya ŋo? apiath abac ne ɣan kedhia, te yen ya adhuɔm ka te yen ya yic, ke Kritho ee ya thol ne luɛl; ku yeneka yan piɔu lɔyum, ee yic, an bi piɔu cok ya lɔyum.

¹⁹ Aya nyic ke yekene bi rɔt cɔk ye luaŋdie, ne lɔŋduɔn ku miɔc de Jɔŋdiit de Yecu Kritho,

²⁰ ne ke yan tiit ku ŋaath, ke cin ke ban yic ya liɛr thin, ku an bi ya ŋeeny emane ci man thɛɛrdie, ba Kritho ya cɔk dit ne ɣaguɔp, te yan piir, ka te thuɔu ɣan.

²¹ Piir ee ya Kritho enɔŋ ɣɛn, ku thou ee ya jop.

²² Ku na ye piir de ka ke guɔp, — yene ye ya luɔk de luɔidie, ke ke ba jal loi akuɔc.

²³ Ku an tɔ ne kɛmken keerou, ɣan ye piɔu naŋ jal lar ba lɔ tɔ wɔne Kritho; yeneka ŋuan areet:

²⁴ ku piir de guɔp abeer dit ne keduɔn.

²⁵ Na cak rɔt ya gɛi yala, e kanyiɛc ke ɣan bi ya ceŋ, ee yic, ku an bi ya reer wɔne week wedhia, ne lɔ tueŋduɔn ku yumduɔn de piɔu ne gamic;

²⁶ bi dheŋduɔn ya dit ne Yecu Kritho ne ɣɛn ne tɔ ban bɛɛr tɔ wɔne week.

²⁷ Yen ne piirduɔn ye piath ne welpiɛth ke Kritho: a guɔ kakuɔn ya piŋ, te bɛi ɣan ba we bɛɛr ŋem, ka te yan liu, ke we ye kɔɔc necap ne piɔn tokic, ku yaka ɣeet ci tiɛp tok ne gam de welpiath;

²⁸ ku cin ke yene we riac yic ne kɔc ke aterduɔn: cuɔk riɔcduɔn ee ya nyoothden de riak, ku kee ya nyooth de luaŋduɔn, ku kee bɛn enɔŋ Nhialic;

²⁹ ne ke cene ye miɔc week ne ke de Kritho, ku kacie ya gamde nyin, ee bak ya gum ne kede eya:

³⁰ ku bak ya teer ci man cii we ye ya ŋem enɔŋ ɣɛn, ku yaka piŋ.