Nyooth 8 - Lek Jot de Jecu Kritho 1940

¹ Ana ye ci adoŋ de dherou kuek, go piny lɔ diu pan nhial ne cit nhunh de thaa.

² Guɔ malaikai ŋem keedherou ka ye kɔɔc ne Nhialic nom; ku cike yiɛn tuŋ ke kuɔth keedherou.

³ Go malaika dɛ go bɛn ku kɛɛc ne kan de koc kɔu, ke muk aleny de wɛnhjini; ku kee ci yiɛn wɛl nyiir juec, bi ke mat kene lɔŋ de kɔc cithiei kedhia, ne kan de koc de wɛnhjini nom ne thooc nom.

⁴ Go tol de wal nyir, kene lɔŋ de kɔc cithiei, go lɔ nhial enɔŋ Nhialic ne malaika ciin.

⁵ Go malaika alɛc loom ku thiɛŋ ne atiɛɛp ke mac de kan de koc, ku cuɛt ne tiɔp nom: go mar de deŋ tuɔl, ku rot, ku yuil e deŋ, ku aluɛkluɛk.

⁶ Go malaikai keedherou nɔŋ tuŋ ke kuɔth keedherou goki roth juir bik kuth.

⁷ Go ketueŋ go kuth, go kɔi lony kene mac, ku cik roth liap kene riɛm, go ke cuat ne tiɔp nom: go biak de diak de tiɔp nom go nyop, ku nyuɔp biak de diak de tiim, ku nuɔn ŋok ebɛn ee ci nyop.

⁸ Go malaika de rou go kuth, go ke cit kuur diit dɛp ne mac go cuat bɛɛr: go biak toŋ de diak de bar go ya riɛm;

⁹ ku thou biak toŋ de diak de ka ye piir ye tɔ bɛɛr, ka eke ye piir; ku riak biak de diak de riɛthdit.

¹⁰ Go malaika de diak go kuth, go cieer dit go loony piny nhial, ke dɛp ci mac, ku loony ne ciir biak de diak, ku awaŋgɛɛk ke piau;

¹¹ ku cieer ee ye cɔɔl Tiɛmakɛc, a go biak de diak de piau a go ya akɛc; ku thou juaac ne piu, ne kee cene ke cɔk kec.

¹² Go malaika de ŋuan go kuth, go biak de diak de akɔl go riak, ku biak de diak de pɛɛi, ku biak de diak de kuel, ye biakden de diak ye cɔk col, a go akɔl cuɔk ye ruɛɛr ne biakden de diak, ku yene ye cɔɔk de wɛɛr eya.

¹³ Guɔ anyin jɔt, ku piɛŋ cuɔɔr, ne gɔr ne nhial ciɛlic, ler ke jam ne ror dit, Ye dhieu, dhieu, dhieu, enɔŋ keek kek kɔc ceŋ tiɔp nom, ne ke de kuɔth de tuŋ kɔk ke malaikai keediak, malaikai ŋoot e ke ken guɔ kuth.