Nyooth 7 - Lek Jot de Jecu Kritho 1940

¹ Ɣɔn aci keekake thok, ka ŋem malaikai keeŋuan e ke kaac ne ŋep ŋuan ke piny, ku mukki yom ye yic ŋuan de tiɔp nom, bi ciɛn yom ye puɔt ne tiɔp nom, ku bɛɛr, ka ne tiim nhiim.

² Ku ŋɛm malaika dɛ ne lɔ nhial ciɛn, ne muk cin de Nhialiny ye piir: ku cɔɔl malaikai keeŋuan ne ror dit, cike yiɛn yɔŋ de piny ku bar,

³ jiɛm, Ye duɔka piny yɔŋ, ku bar, ku tiim, agut te ci wɔ ciit taau ne aluɛk ke Nhialinyda nhiim thook.

⁴ Guɔ ciinden piŋ kek ka ci yiɛn ciit, ne ye bianabur thiɛrnyɛny ku thierŋuan ku ŋuan ke dhien de mith ke Yithrael ebɛn.

⁵ Dhien de Juda ee cene ciit yiɛn bianabur thiɛr ku rou. Dhien de Ruben ee cene ciit yiɛn bianabur thiɛr ku rou. Dhien de Gad ee cene ciit yiɛn bianabur thiɛr ku rou.

⁶ Dhien de Acer ee cene ciit yiɛn bianabur thiɛr ku rou. Dhien de Naptali ee cene ciit yiɛn bianabur thiɛr ku rou. Dhien de Manathe ee cene ciit yiɛn bianabur thiɛr ku rou.

⁷ Dhien de Thimeon ee cene ciit yiɛn bianabur thiɛr ku rou. Dhien de Lebi ee cene ciit yiɛn bianabur thiɛr ku rou. Dhien de Yithakar ee cene ciit yiɛn bianabur thiɛr ku rou.

⁸ Dhien de Dhebulun ee cene ciit yiɛn bianabur thiɛr ku rou. Dhien de Jothep ee cene ciit yiɛn bianabur thiɛr ku rou. Dhien de Benjamin ee cene ciit yiɛn bianabur thiɛr ku rou.

⁹ Ɣɔn aci keekake thok, ka jɔt anyin, ku ŋɛmka, nɔŋ dun dit areet, cin ran leu e ne kuɛn, bɔ bei ne welic ebɛn, ku dhiɛɛnic ebɛn, ku ne juɔric ebɛn, ku ne thokic ebɛn, ne kaac ne thooc nom, ku ne Nyɔk nom, e ke ceŋ alɛth ɣer, ku akɔɔt ne kecin;

¹⁰ ku cotki ne rordit, yiki jam, Yi keewuubi luak ya tɔ ke Nhialinyda man ye reer ne thooc nom, ku tenɔŋ Nyɔk.

¹¹ Ku malaikai kedhia aakee kaac e ke yuil thooc ku yuilki roordit ku lai piir keeŋuan; ku cuɛtki roth piny ne thooc nom e ke tɔ nyiin piiny, ku dorki Nhialic,

¹² jamki, Yi Amen: Eewuubi athiɛi, ku nuɔm, ku nyic, ku lɛc, ku rieu, ku riɛr, ku aŋok, bik ya tɔ kene Nhialinyda athɛɛr wada. Amen.

¹³ Go toŋ de roordit dhuk, yook ɣa, Ye keeka ci roth piɔth ne alath ɣerka, yiki tenooi, ku biki eno?

¹⁴ Guɔ yɔɔk, Ya bɛnydie, anyic. Go ɣa yɔɔk, Ye keekake aake bɔ bei ne dhien diit de piɔuic, ku wakki alathken, ku cɔkki ke ɣer ne riɛm de Nyɔk.

¹⁵ Yen yeneka ye kek kɔɔc ne thooc nom thony de Nhialic; ku kayiki luɔi ne akɔl ku wɛɛr luaŋde: ku yen yen man ye reer ne thooc nom abi akemade ya pɛt ne kenhiim.

¹⁶ Aace beer ya cɔk, ku kaace beer ya yal; ku kaacii akɔl ke beer nyop, ku alɛɛth dɛ:

¹⁷ ne ke biie Nyɔŋ ye tɔ ne thooc ciɛlic ke ya biɔɔk, ku ye ke ŋaar te de awaŋgɛɛk ke piu ke piir: ku kaabii Nhialic ke piu ya wɛɛc wei ne kenyin.