Nyooth 6 - Lek Jot de Jecu Kritho 1940

¹ Guɔ Nyɔk ŋem ne kuek adoŋ toŋ de dherou bei, ku piɛŋ toŋ de lai keeŋuan ye piir ne jam ci mar de deŋ, Ye bar.

² Guɔ anyin jɔt, ke ajɔŋkoor ɣer tul, ku ran ci nyuc ne yekɔu ee muk dhaaŋ; ku ci yiɛn gol: go bɛn bei ke tiɛm, ku bi lɔ tiam.

³ Ana ye ci adoŋ de rou kuek, ka piŋ lan ye piir de rou ne jam, Ye bar.

⁴ Go ajɔŋkoor dɛ go bɛn bei, ajɔŋkoor thith: ku ran ci nyuc ne yekɔu ee ci yiɛn nyiɛi de dɔɔr ne piny nom, bi ŋɛk ŋɛk ya nɔk: ku kee ci yiɛn them gokdit.

⁵ Ana ye ci adoŋ de diak kuek, ka piŋ lan ye piir de diak ne jam, Ye bar. Guɔ anyin jɔt, ke ajɔŋkoor col tul; ku ran ci nyuc ne yekɔu ee muk medhan yeciin.

⁶ Ku piɛŋ ror cit ke bɔ bei ne kaam de lai ye piir keeŋuan ne jam, Ye riem de rap ee ya denariɔn tok, ku ye riɛm keediak ke barli ya denariɔn tok, ku duɔne miok kene piukeabiɛi duɔne ke ye riɔk.

⁷ Ana ye ci adoŋ de ŋuan kuek, ka piŋ ror de lan ye piir de ŋuan ne jam, Ye bar.

⁸ Guɔ anyin jɔt, ke ajɔŋkoor ŋok tul: ku ran ci nyuc ne yekɔu, ee cɔɔle rinke Thou; ku biɔth pan de atip ke kɔc cok. Ku cike yiɛn riɛr ne biak de ŋuan de tiɔp, bik ya nɛk ne theep, ku ne pawɛɛr, ku ne thuɔu, ku ne lai roor ke tiɔp nom.

⁹ Ana ye ci adoŋ de dhiec kuek, ka ŋem tiip ke kɔc ne kan de koc thar, kɔc ci nɔk ne wɛt de Nhialic, ku ne lek cik ya luel:

¹⁰ ku yiki coot ne cɔtdit, jamki, Yi ye anana, Yin Dupioc, yin man lajik ku ye yic, bin kɔc ceŋ tiɔp nom luk, ku ye na bin riɛmda guɔr?

¹¹ Go ŋɛk ne keek go ya yiɛn alanh ɣeer tok; ku yooke keek, ya bik yok e ke lɔŋ emaath, agut te bene aluɛk kɔk ye lui kene keek eya ku watmathken, kɔc bike nɔk ci keek, kan dhiɛl piny.

¹² Guɔ anyin jɔt wen kuek en adoŋ de dhetem, go naŋ aluɛkluɛk dit; ku col akɔl ecut a bi ciɛt alanh de cual de nhim col, ku wel pɛɛi rɔt ne cit riɛm;

¹³ ku loony kuel nhial loonyki piny, ci lony ye ŋaap lony ke ken guɔ luɔk, te yire yen ne yomdit.

¹⁴ Go kanhial wuɔc wei e ke duɔl ci man de kitam duɔl; ku kuur dit ebɛn kene tuur ebɛn aake ci wuɔc wei ne ɣɔnken.

¹⁵ Go meleek ke tiɔp nom, ku wɛɛt ke meleek, ku banydit, ku acibaany, ku meriir, ku aluaak ebɛn kene kɔc laau, goki roth lɔ thian ne ɣar ke kur yic ku ne kur ke kur dit yic;

¹⁶ ku yookki kur dit ku kur thii, Yi matka wɔɔk, ku thianka wɔɔk ne yenyin yen man ye reer ne thooc nom, ku ne ɣok de Nyɔk:

¹⁷ akol diitden de ɣok ee bɛn; ku yeŋa bi kɔɔc ya leu?