Nyooth 22 - Lek Jot de Jecu Kritho 1940

¹ Go ɣa nyuɔth ciir de piu ke piir, keɣer ci kuruthalo, ne bɔ bei ne thony de Nhialicic ku de Nyɔkic,

² ne dholde ciɛlic. Ku nɔŋ tim de piir ne agore ku agorti, ke ye luɔk ne ka ye yic thiɛr ku rou, ku ye luɔk ne pɛɛi ebɛn: ku ye yith ke tim ya ka yeneke kɔc cɔk dem.

³ Ace beer kan ya naŋ aciɛn, ku thony de Nhialic kene thony de Nyɔk aabi ya tɔ thin: ku kabii aluɛkke ya luɔi;

⁴ ku kabik ya ŋem nyin, ku rinke aabi ya tɔ ne kenhiim thook.

⁵ Ku kaci bi bɛɛr kan ya naŋ kau; ku kaace ɣɛɛr de lamba beer ya ŋaŋ, ku ruɛr de akɔl; ne ke bii Bɛnydit Nhialic ke ya yiɛn ɣɛɛr: ku kaabi ya dɔk athɛɛr wada.

⁶ Go ɣa yɔɔk, Ye keewelke aaye wel adoc ku kaaye yith: ku Bɛnydit, Nhialiny de tiip ke nebii, ee malaikade tuɔɔc bi aluɛkke lɔ nyuɔth ka bi dai bɛn.

⁷ Ŋɛmka, ɣan bi dai bɛn. Raan ee thiei ran ye wel ke nyooth tɔ ne yekitameic muk.

⁸ Ku ɣɛn, an Jɔn, ɣan ekee piŋ keekake ku ŋɛm keek. Ana wen cake piŋ ku ŋɛm ke, ka cuɛt rɔt piny ne malaika ci ɣa nyuɔth keekake nom ba door.

⁹ Go ɣa yɔɔk, Ye duk loi wuya: ɣan ye aluaŋ mɛt wɔne yin ku mɛɛthkuk ye nebii, ku kɔc ye wel ke yekitame dot: Nhialic yene dor.

¹⁰ Go ɣa yɔɔk, Ye duɔne wel ke nyooth ke yekitame duɔne ke nuet thook; akɔl ee ɣeet.

¹¹ Ne ran ce lajik, ne ye dhiac ke ce lajik; ku ne ran col, ne ye dhiac ke cɔk col: ku ne ran lajik, ye dhiac ke loi lajik: ku ne ran lɔcar, ne ye dhiac ke cɔk lɔcar.

¹² Ŋɛmka, ɣan bi dai bɛn; ku ariɔmdie atɔ kene ɣɛn, ŋɛk aba riɔp ci man de luɔide.

¹³ Ɣan ye Alpa ku ya Omega, ya tueŋ ku ya can, ya gɔc ku ya thok.

¹⁴ Kɔc aaye thiei kɔc ye alɛthken waak, bik ya naŋ bɛn te de tim de piir, ku bik lɔ bei ne thook.

¹⁵ Ku kɔc biyic aaye jɔk, ku tit, ku abɛɛl, ku atiir, ku kɔc ye duur ne eidool, ku kɔc nhiar lueth yikike toor.

¹⁶ Ɣan Yecu ɣan ekee toc malaikadie bi keekake lɔ lɛk week ne kanithaai yic. Ɣan ye meei de Dabid ku ɣan ye kuande, ɣan ye ɣɛɛr, ku ya ciɛr de run de piny.

¹⁷ Ku Jɔŋdit kene nyan thiak aaye jam, Yi baka. Ku ne ran ye piŋ, ne ye jam, Ye baka. Ku ne ran ci yal, ne ye bɛn: ku ne raan ebɛn, ran tɔ en ne yepiɔu, ye piu ke piir loom ne nompaal.

¹⁸ Ɣan lek raan ebɛn ran ye wel ke nyooth ke yekitame piŋ, Ya na ye naŋ ran ye dɛ mat thin, e kabii Nhialic mat anuɛn cike gɔɔr ne yekitameic:

¹⁹ ku na nɔŋ ran nɔŋ ke nyiɛɛi ne wel ke kitam de yenyoothe, ke Nhialic abi biakde nyaai ne tim de piiric, ku ne pan lajikic, ka ci gɔɔr ne yekitameic.

²⁰ Ke ye lek ne keekake ee jam, Ye neyic, ɣan dɔc bɛn. Amen: bar, Bɛnydit Yecu.

²¹ Eeyabi athiɛi de Bɛnydit Yecu bi ya tɔ kene kɔc cithiei. Amen.