Nyooth 21 - Lek Jot de Jecu Kritho 1940

¹ Guɔ nhial jot ŋem kene piny jot; ne ke cene nhial tueŋ kene piny tueŋ ɣooc; ku cin bar beer tɔ.

² Guɔ pan lajik ŋem, Jeruthalem jot, ne bɔ bei nhial enɔŋ Nhialic, ke ci juir ci nyan lɔ pan de monyde.

³ Ku piɛŋ ror dit ne thoocic ne jam, Ye ŋɛmka, akema de Nhialic atɔ ke kɔc, ku kabi ya ceŋ kene keek, ku kaabi ya ya kɔcke, ku Nhialic ne guɔpde abi ya tɔ kene keek, bi ya ya Nhialinyden:

⁴ ku kabi piau ebɛn ya wɛɛc wei ne kenyin; ku kaci bi kan bɛɛr naŋ thou; ku kaci bi kan bɛɛr naŋ dhieu, ku duɔt, ku tɔɔk, alɔgut: katueŋ aa wɛn wei.

⁵ Go ke rɛɛr ne thooc nom go jam, Ye ŋɛmka, ɣan ye keriɛc ebɛn cɔk ye jɔt. Ku jiɛm, Ye gar, ne ke ye keewelka wel adoc ku yiki yith.

⁶ Ku yook ɣa, Ye kaa tuɔm. Ɣan ye Alpa ku ya Omega, ya gɔc ku ya thok. Ran ye yal aba ya yiɛn awaŋgaak de piu ke piir ne nompaal.

⁷ Ran ye tiam abi ya ya dit de keekake; ku ɣan bi ya ya Nhialinyde, ku ye ya wendie.

⁸ Ku ariɔc, kene kɔc cie gam, ku kɔc rac, ku atiir, ku abɛɛl, ku tit, ku kɔc ke eidool, ku kɔc ye alueth kedhia, aabi naŋ biak de bar ye dep ne mac ku thulpur; ke ye thon de rou.

⁹ Go toŋ de malaikai keedherou nɔŋ aduuk keedherou go bɛn, ka ekee ɣɛɛc anuɛn ciɛn keedherou; ku yook ɣa, jiɛm, Ye bar eene, Yin ba nyuɔth nya, nyan ye tiŋ de Nyɔk.

¹⁰ Go ɣa jat ne kuur diit baar nom ne Jɔŋdit, ku nyuth ɣa Jeruthalem pan lajik, ke bɔ piny pan nhial enɔŋ Nhialic,

¹¹ ke nɔŋ nuɔm de Nhialic: ku cit ɣɛrde kuur piath areet, cit kuur de jathpi, le car ci kuruthalo:

¹² ku nɔŋ pany diit baar; ku nɔŋ thook keethiɛr ku rou, ku tɔ malaikai keethiɛr ku rou ne thook, ku ci ke gar thook rin, rin ke dhiɛn ke Yithrael keethiɛr ku rou:

¹³ ye thook diak ciɛɛn; ku diak cuec; ku diak ciɛm; ku diak tueŋ.

¹⁴ Ku ci pany de baai wɛc ne cok keethiɛr ku rou, ku gar rin ne kekɔth rin ke dutuuc ke Nyɔk keethiɛr ku rou.

¹⁵ Ku ke e jam kene ɣan ee nɔŋ aruɔr de wɛnhjini ben baai them, kene thookke, ku panyde.

¹⁶ Ku ye baai ŋep keeŋuan, ku thoŋ them de cam lɔ cuec kene them de can lɔ tueŋ: go baai them ne aruɔr, go themde ya mail bianabur ku thiɛrnyɛny dhiec: ku thoŋ bɛɛrde kene them ciɛn lɔ tueŋ ku them ciɛm lɔ cuec.

¹⁷ Ku them panyde, go ya kubiit keethiɛrnyɛny ku thiɛrŋuan ku ŋuan, ci man de them de raan, man ye malaika.

¹⁸ Ku pany ee ci buth ne jathpi: ku ye baai ye wɛnhjini lɔcar, cit mandar lɔcar.

¹⁹ Ku ci cok ke pany ci ke kuɛm ne kuur piɛth de weu juec ebɛn. Cook tueŋ ee ye jathpi; ku ye ke de rou, ye thapeiro; ku ye ke de diak, ye kalkedon; ku ye ke de ŋuan, ye thamaragdo;

²⁰ ku ye ke de dhiec, ye thardonuk; ku ye ke de dhetem, ye thardiɔn; ku ye ke de dherou, ye kurutholitho; ku ye ke de bɛt, ye berilo; ku ye ke de dheŋuan, ye topadhiɔn; ku ye ke de thiɛr, ye kuruparatho; ku ye ke de thiɛr ku tok, ye wakintho; ku ye ke de thiɛr ku rou, ye amethuthuto.

²¹ Ku ye thook keethiɛr ku rou, yiki margaritii keethiɛr ku rou; toŋ de keek ee ye ya margariti tok: ku ye dhol baai ye wɛnhjini lɔcar, ye ciɛt mandar yene kaŋ ŋem.

²² Ku cin luaŋ ŋɛm thin: ne ke yen ya Bɛnydit Nhialiny Nɔŋ Riɛr Ebɛn, ku Nyɔk, kek ye ya luak thin.

²³ Ku ci baai akɔl beer ŋaŋ, ku pɛɛi, bik ya ruɛr: ne ke ye nuɔm de Nhialic ye meer, ku ye Nyɔk ye lambade.

²⁴ Ku wɛl aabi ya cath ne ɣɛrde ciɛlic; ku ye meleek ke tiɔp nom nuɔmden bɛi thin.

²⁵ Ku thookke aaci bi ya thiɛk akol (ne ke ben ya ciɛn wɛɛr eeti):

²⁶ ku kaabi nuɔm ku rieu de wɛl ya bɛi thin:

²⁷ ku kacin ke thin cool bi kan ya lɔ thin, ku ran ye karac loi ku ye lueth toor: ye ya kɔc ci gaar ne kitam de Nyɔk de piiric.