Nyooth 20 - Lek Jot de Jecu Kritho 1940

¹ Guɔ malaika ŋem ne bɔ bei nhial, ke muk muktar de abith ku jonh dit ne yeciin.

² Ku kuɛk darakon piny, keroor thɛɛr, man ye Durieth ku Catan, ku rek ne run keebianabur,

³ ku cuɛt ne abithic, ku thiek, ku nuet thok, bi wɛl cuɔk beer ya dhoom, agut te cii ruɔn bianabur thok: na re e kabi jal lony ku bi yuul.

⁴ Guɔ thoc ŋem, ku kɔc rɛɛr ne kenhiim, ku ci ke yiɛn luɔk: ku ŋem tip ke kɔc ci tɛɛm nhiim wei ne lek de Yecu, ku ne wɛt de Nhialic, ka ken lɛi ya door, ku kecithɔɔŋde, ku kenki ciit loom ne kenhiim thook ku ne kecin; goki ya ceŋ, ku yiki dɔk kene Kritho ne run keebianabur.

⁵ Ku ci biak dɛ ci thoune cii go piir agut thok de run keebianabur. Yekene yenekee jon de rɔt tueŋ.

⁶ Raan ee thiei ku ye lajik ran nɔŋ biakde ne jon de rɔt tueŋic: keekake acine thon de rou ke riɛr; aabi ya bany ke ka ke Nhialic ku ka ke Kritho, ku kaabi ya dɔk kene yen ne run keebianabur.

⁷ Ku na ci run keebianabur thok, ke Catan abi jal lony ne macic,

⁸ ku bi bɛn bei bi wɛl ya dhoom ne ŋep keeŋuan ke tiɔp nom, Gɔk ku Magɔk, aabi kuɔt tɔɔŋ: kɔc cite ciinden ke liɛt de bar.

⁹ Goki piny tebaar teek, ku yuilki pan de kɔc cithiei, ku pan nhiar: go mac go bɛn piny pan nhial ku liek keek.

¹⁰ Ku cuɛte durienh ye keek dhoom cuɛte ne baric bar de mac ku thulpur, te tɔe lɛi thin eya kene nebii ke adhuɔm; ku kaabi ya lɛɛrwei ne akɔl ku wɛɛr athɛɛr wada.

¹¹ Guɔ thony diit ɣer ŋem, ku ke rɛɛr ne yenom, ke cii tiɔp nom kene pan nhial kɛt wei ne yenyin; ku cin teden de reer beere yok.

¹² Guɔ kɔc ci thou ŋem, kɔc thii ku kɔc dit, e kee kaac ne thooc nom; ku ci kitaap liep yic: go kitam dɛ liepic, kitam de piir: ku luuke kɔc ci thou ne ka ci gaar ne kitaap yic, ci man de luɔiden.

¹³ Ku gɛm bar kɔc ci thou ne yeyic; ku gɛm thou kene pan de atip ke kɔc gɛmki ka tɔ ne keyic, go ke luɔɔk ŋɛk ci man de ke e ye loi.

¹⁴ Ku cuɛte thou kene pan de atip ke kɔc cuɛteke bar de mac. Yekene yenekee thon de rou, ye bar de mac.

¹⁵ Ku ran kene yok rin ne kitam de piiric ee ci cuat bar de mac.