Nyooth 14 - Lek Jot de Jecu Kritho 1940

¹ Guɔ anyin jɔt, ku ŋɛmka, Nyɔk ee kaac ne kuur e Dhiɔn nom, ku ŋɛm bianabur thiɛrnyɛny ku thiɛrŋuan ku ŋuan, e ke kaac e ke ci gar nhiim thook rinke ku rin ke Wun.

² Ku piɛŋ ror nhial, ci man de apuɔu de piau, ku ci man de mar diit de deŋ: ku yeror e piɛŋe ee cit man de ror ke kɔc ye thom gut:

³ ku ketki din cit din jot ne thooc nom, ku ne lai ye piir nhiim keeŋuan, ku ne roordit nhiim: ku cin ran leu dit ne nyic, aye bianbur thiɛrnyɛny ku thiɛrŋuan ku ŋuan, keek kek ka ci ɣɔɔc bei ne piny nom.

⁴ Kek ka ken yuik ne diar; ne ke ken kek thɔny kene diar. Keekake keeka ye Nyɔk biɔɔth ne ɣan kedhia ɣɔn yen ke lɔ thin. Aake ɣɔɔcke ne kɔc yic, bik ya akɔŋ enɔŋ Nhialic ku tenɔŋ Nyɔk.

⁵ Ku kee cin luenh e ye yok ne kethook: ne ke cin kek awac ne thony de Nhialic nom.

⁶ Guɔ malaika dɛ ŋem ne gɔr ne nhial ciɛlic, ku muk welpiɛth ke awɛdɛ bi ke ya lɔ lɛk kɔc ceŋ tiɔp nom, ku wel ebɛn, ku dhien ebɛn, ku thok ebɛn kene juɔr ebɛn;

⁷ ku jiɛm ne ror gok, Ye yaka riɔc ne Nhialic, ku yaka noom; kol de luŋde ee ɣeet: ku yaka door ye ke e cak nhial ku piny ku bar ku awaŋɛɛk ke piu.

⁸ Ku biɔth malaika dɛ, ke de rou, ke lɔ ke jam, Ye kee yuik, Babulon dit ee yuik, pan ci wel ebɛn cɔk dek ne piukeabiɛi ke ɣok de balde.

⁹ Ku biɔth malaika dɛ keek, ke de diak, ke jam ne ror gok, Ye na nɔŋ ran ye lɛi kene kecithɔɔŋde door, ku loom ciit ne yenom thok, ka ne yeciin,

¹⁰ ke kabi dek eya ne piukeabiɛi ke ɣok de Nhialic, ci juir ke kene liap ne abinyden de tɔŋdeic; ku kabi lɛɛrwei ne mac ku thulpur ne malaikai lajik nhiim, ku ne Nyɔk nom:

¹¹ ku tol de leerden de wei abi ya lɔ nhial athɛɛr wada; ku kaabi ya ciɛn lɔŋ ne akɔl ku wɛɛr, kek kɔc ye lɛi door kene kecithɔɔŋde, ku kɔc ye cin de rinke loom.

¹² Liɛr de piɔu de kɔc cithiei eke, kɔc ye looŋ ke Nhialic muk, ku gam de Yecu.

¹³ Guɔ ror piŋ nhial ne jam, Ye gar, Wu ya kɔc aaye thiei kɔc ye thou ne Bɛnyditic ne yemane alɔgut: ee yic, aluel Jɔŋdit, ye ne ke ye lɔŋ ne luɔiden; luɔiden ee ke biɔɔth.

¹⁴ Guɔ anyin jɔt, ku ŋɛmka, nɔŋ piool ɣer; ku tɔ ke cit wen de raan rɛɛr ne pioolic, ke ceŋ gol de wɛnhjini ne yenom, ku muk wɛl moth ne yeciin.

¹⁵ Ku bɔ malaika dɛ bei luaak, ku cɔɔl ke rɛɛr ne pioolic ne ror dit, Ye bɛie wɛldu bei, ku tɛme: kol de tem ee bɛn; rɛp piiny aa luɔk.

¹⁶ Go ke rɛɛr ne pioolic go wɛlde cuat piny, go piny tem.

¹⁷ Ku bɔ malaika dɛ bei luaŋ de pan nhial, ke muk wɛl moth eya.

¹⁸ Go malaika dɛ go bɛn bei te de kan de koc, ke nɔŋ riɛr ne mac; ku cɔɔl ke nɔŋ wɛl moth ne ror dit, jiɛm, Ye bɛie wɛl mothdu bei, ku tɛme nɔl de abiɛi de tiɔp nom; aa thok ne luɔk.

¹⁹ Go malaika go wɛlde cuat piny, ku tem abiny de tiɔp nomic, ku cuɛt ke ne ke de nhiecic, ke diit de nhieny de piukeabiɛi, de ɣok de Nhialic.

²⁰ Go lɔ nhiac biyic ne baai thok, go riɛm bɛn bei ne ke de nhiecic, go riɛm cɔp a bi pek ajɔŋkoor thok, thiɛŋ piny agut mail keethiɛrnyɛny rou.