Nyooth 12 - Lek Jot de Jecu Kritho 1940

¹ Go cin dit ŋem pan nhial; nɔŋ tiŋ ci rɔt piɔth ne akɔl, ku pɛɛi ne yecok, ku ceŋ gol de kuel keethiɛr ku rou ne yenom;

² ku kee liac: go dhiau, ne rɔp, ku ne tɔɔk de dhieth.

³ Go cin dɛ go ŋem pan nhial, ŋɛmka, nɔŋ darakon diit thith, ke nɔŋ nhiim keedherou ku tuŋ keethiɛr, ku ceŋ gol keedherou nom tok ne golde.

⁴ Ku thel biak de diak de kuel nhial ne yeyɔl, ku cuɛt ke ne piny nom: go darakon kɔɔc ne tiik nom tiŋ wen kɔr bi dhieth, bi na ye ci dhieth, ke bi meth liek.

⁵ Go wa dhieth, ye mɛnh mɔc, mɛnh bi juɔr ebɛn dɔk ne wan weeth: go mɛnhde gap enɔŋ Nhialic, agut te de thonyde.

⁶ Ku kɛt tiik roor, tenɔŋ te ci juɛr en ne Nhialic, bene yen ya miɛɛth thin ne nin keebianabur tok ku thiɛrnyɛny rou ku thiɛrdhetem.

⁷ Ku tɔŋ ee tɔ pan nhial: go Mikael kene malaikaike lɔ thɔr kene darakon; go darakon thɔr kene malaikaike;

⁸ goki cuɔk tiɛm, ku cin piny berki yok pan nhial.

⁹ Ku cuɛte darakondit piny, keroor thɛɛr, man ye cɔɔl Durieth ku Catan, medhum de tiɔp nom ebɛn; cuɛte e piny nom, ku cuɛte malaikaike piny kene yen.

¹⁰ Ku piɛŋ ror dit pan nhial, jiɛm, Ye luak ee bɛn emane kene riɛr, ku ceŋ de Nhialinyda, ku rir de Krithode: ne ke cene durienh de watmathkuɔ cuat piny, yen man ye ke riɛth ne Nhialinyda nom ne akol yic ku wer yic.

¹¹ Ku kee tiamki ne riɛm de Nyɔk ku ne wɛt de lekden; ku cik piirden ye nhiar agut thou.

¹² Yen yaka piɔth lɔyum, we kanhial, ku we ka ye ceŋ thin. Piny abi naŋ dhieu, ku bar, ne ke cii durieth lɔ piny enɔŋ we ke cii tɔŋ thiɔŋic, ne ke nyic en e ke akolke ci lik.

¹³ Na ɣɔn ci darakon rɔt ŋem ne ci cuat piny, ke ŋet tiŋ ɣɔn dhieth mɛnh moc.

¹⁴ Ku tiik ee ci yiɛn wuɔk keerou ke cuɔr dit, benke pɛɛr roor, ler tede, te yene yen miɛɛth thin ne kaam de run, ke ne kɛm ke run, ku ne nhunh de kaam, te mec ke keroor.

¹⁵ Go keroor piau ŋak ne tiik cok ci ciir, bi cɔk nyiɛie piu.

¹⁶ Go piny go tiik kony, ku liep rɔt, ku liek wɛr cii darakon ŋɔk bei ne yethok.

¹⁷ Go darakon go ɣok kene tiik, ku jiɛl bi lɔ ɣeet kene mith ke tiik, mith ye looŋ ke Nhialic muk, ku lek de Kritho: