Welpiath ci Mak cithiei ke gɔɔr 4 - Lek Jot de Jecu Kritho 1940

¹ Go ke bɛɛr gɔl ne weet ne bar lɔɔm. Ku ci dun dit gueer enɔŋ en, go lɔ ne riaiic, ku reer thin bɛɛr; ku ci duut ebɛn nyuc ne agor nom.

² Go ke wɛɛt ne kajuec ne parabool, pioc ke jiɛm,

³ Ye piɛŋka: ku ŋɛmka, dupuk ee lɔ lee pok:

⁴ na re, te puk en, ke kɔth kɔk loony ne dhol kec, go diɛt bɛn ku kuanyki ke.

⁵ Ku loony kɔk piny de kur, te cin tiɔm dit thin; goki dai kul, ne ke koore tiɔp:

⁶ na wen ye akɔl ye ruer, e ke biɔŋ; ne ke cin kek mei, goki rir wei.

⁷ Ku loony kɔk ne kuɔth yic, go kuɔth cil kene keek, ku nhiɛɛcki keek, a cik kɔn luɔk.

⁸ Ku loony kɔk ne tiɔm piathic, goki joŋ, cilki ku jɔpki roth; yiki luɔk, kene ne nyiin keethiɛrdiak, ku dɛ ne thiɛrdhetem, ku dɛ ne thiɛrnyɛny.

⁹ Neke piŋ ran nɔŋ yith keek.

¹⁰ Na wen ci doŋ yetok, go kɔc eke rɛɛr kene yen ku kɔcpiocke goki thiɛc parabool.

¹¹ Go ke yɔɔk, Ye we ci yiɛn nyiny de kecikum de ceŋ de Nhialic: ku ke keekɔc kecka, kaŋ kedhia aaye loi ne parabool:

¹² bik ya yin ŋemki, ku cik ye dot, ku bik yith ya ɣɔɔr piŋki, ku cik ye muk; kɛlke ke bi roth bɛɛr wel, ku bi ke puɔl.

¹³ Go ke thiec, Ye kuɔcka yeparabole? a bak parabool kedhia ya nyic wuɔde?

¹⁴ Dupuk ee wel pok.

¹⁵ Ku keekake aaye tɔ ne dhol kec te yene wɛt pok; ku na yi piŋki ye, ke Catan dɔc bɛn, ku nyiɛi wel cike puɔk ne kepiɔth.

¹⁶ Ku yene ye cɔɔk de ka ci puɔk piny de kur, man ye na yi piŋki wɛt, ke dɔcki muk ne miɛt de piɔu;

¹⁷ ku yiki ciɛn mei ne keyic, yiki yuul emath; ela ye kadhal ke yi biki ku ŋet, e ke jɔl guɔ kɔth.

¹⁸ Ku kɔk aaye ka cike puɔk ne kuɔth yic; aa wɛt piŋ,

¹⁹ go ŋueny de kapiiny, ku them de baany de kaŋ, ku kɔr rɛɛc de kɔk lɔ thin, ku nhiɛɛcki wɛt, jɔl yɔc.

²⁰ Ku ka cike puɔk piny piath; aapiŋ wɛt, ku yiki muk, yiki luɔk, kene ne nyiin keethiɛrdiak, ku dɛ ne thiɛrdhetem, ku dɛ ne thiɛrnyɛny.

²¹ Go ke thiec, Ye ye lamba bɛi ku kume piny ne akook, ka ye kan ne agen thar, cie taau nhial?

²² Acin ke ye thian, ku ci bi ya ŋem; ku kacin ke ci moony, ku cii bi tic.

²³ Neke piŋ ran nɔŋ yith keek.

²⁴ Go ke yɔɔk, Ye ŋɛmka roth ne ke yaka piŋ: alem yaka them yeneka bi ya thɛm we: ku juek abi ya yiɛn week.

²⁵ Ran ye naŋ kede, abi ya miɔc, ku ran ye ciɛn kede, abene ke ye tɔ ke yen ya loom.

²⁶ Go ke yɔɔk, Ye ceŋ de Nhialic ee yenla, ee ciɛt man ye raan kɔth puɔk piny;

²⁷ ku ye tɛc ku ye rɔt jɔt wɔkɔu ku akol, ku kulki, ku kuc lan e cil kek yide.

²⁸ Piny yenekee kaŋ bɛi ne guɔpde; ee kan ya yaar, ku lee luur, ku beer ya raau nom.

²⁹ Ku te ci raau luɔk, ke wɛl e tem alom, ci jal ya ruel.

³⁰ Ku yook keek, Ye yeku ceŋ de Nhialic thɔŋ ŋo? ku ye parabol yinde bi wɔ ye luel?

³¹ Acit nyin de muthada, man ye na ci ye puɔk piny, te cɔk en kuur ne nyin ke kɔth ke piny nom yic,

³² ku na ci ye pok, e kacil, ku jɔl ya tim diit war tiim kedhia, ku ye rɔt pet ne ker dit; ku jol diɛt nhial ya nyuc ne tiɛpde yic.

³³ Ku ye ke lɛk ne parabool juec yinya, ci man leu kek keek ne piŋ:

³⁴ ee ye ciɛn ke e ye luel te cin parabol: ku ye keriɛc jal lɛk kɔcpiocke neluɔɔŋ.

³⁵ Ku yekole, ɣɔn thei, go ke yɔɔk, Ye loku lɔŋti.

³⁶ Goki duut waan, ku leki kene yen, ke dhiac ne reerde yic. Ku riɛth kɔk aake tɔ kene yen.

³⁷ Go yom dit rɔt jɔt, ku lɔ atitiak ne riaiic, go riai lɔ ke thiaŋ.

³⁸ Ku yen ne guɔpde ee tɔ ne riai thar, niin ke ci yenom kan: goki puɔc, ku yookki, Yi Bɛny, kuc lan thou wɔ?

³⁹ Go puɔc, ku wɛɛi yom, ku yook bar, Ye ne dɔɔr ye tɔ, kaace. Go yom lɔ diu, ku jɔl piu lɔ duk.

⁴⁰ Go Yecu ke yɔɔk, Ye yeŋo riɔc we? Ciɛnka gam ŋuɔɔtka?

⁴¹ Goki riɔc areet, ku jamki ne roth, Yi yeŋa ekene, man ye yom kene piu gam?