Mathayo 6 - Lek Jot de Jecu Kritho 1940

¹ Yaka roth ŋem duɔke we bi luɔiduɔn lajik ya loi ne kɔc nhiim, bik ŋem; kɛlke ariop de Wuɔrduɔn tɔ nhial bi liu.

² Yen na ye miɔc tek, ke yin duk tuŋ ye cɔk koth ne yinom ci luɔi de dudhuum yiki loi ne luek ke gueer yic ku ne dhɔl yic. We ya yɔɔk neyic, Ya kaaci ariopden kap.

³ Na ye miɔc tek, ke yin duɔne ke ye ciɛn camdu loi ye cɔk nyic cuenydu:

⁴ bi miɔcdu ya kuaak: ku Wuɔrduɔn ye ke ci kuaak ŋem abi yin ya riɔp.

⁵ Ku na yaka lɔŋ, ke we duɔka ye ciɛt dudhuum, ne ke nhiɛr kek kɔɔc ku lɛŋki ne luek ke gueer yic ku ne ŋep ke dhɔl, bi ke ya ŋem ne kɔc. We ya yɔɔk neyic, Ya kaaci ariopden kap.

⁶ Ku yin, na ye lɔŋ, ke yin lɔ ɣot ne bian thin, ku na ca thok thiɛɛk, ke yin jal Wuur lɔŋ ne kuaakic, ku Wuur ye ke ci kuaak ŋem abi yin ya riɔp.

⁷ Na yaka lɔŋ, ke we duɔka lɔŋ pialic ye dhuɔkic, ci man de Juurkɔk: ayiki tak yi bi ke gam ne ror dit.

⁸ Yen duɔke ye ciɛt keek: Wuɔrduɔn ee ka yakake dak nyic, e kek kɛnkake guɔ thiec.

⁹ Yen yaka lɔŋ wuɔla; Awadan tɔ nhial, Rinku aabike ya riɛu.

¹⁰ Cɔk ceŋdu cɔk bɔ. Ye piɔndu cɔk loi piny nom ne cit piny nhial.

¹¹ Ye wɔ miɔc ne yekole buk ya cam.

¹² Ye wɔ puɔl ne kanykuɔ, ci man ye wɔ kanykuɔ pal kɔc.

¹³ Duɔne wɔ cɔk ye them, ku ye wɔ luɔk ne kerac: ceŋ ee kedu, riɛr ee kedu, nuɔm ee kedu athɛɛr. Amen.

¹⁴ Na yaka kɔc puɔl ne karɛcken, ke Wuɔrduɔn abi we ya puɔl eya.

¹⁵ Ku na cak kɔc ye puɔl ne karɛcken, ke Wuɔrduɔn ace we ye puɔl ne karɛckuɔn.

¹⁶ Ku dɛne eya, na yaka thieel, ke we duɔka nyiin ye kuany, ci man de dudhuum. Aaye kenyiin jiit, bi kɔc ke ŋem lan thiel kek. We ya yɔɔk neyic, Ya kaaci ariopden kap.

¹⁷ Ku yin, na yee thieel, ke yin ye yinom tɔc, ku yee yinyin piny;

¹⁸ bi kɔc cuɔk thieldu ye ŋem, aye Wuur man ye tɔ ne kuaakic. Ku Wuur ye ke ci kuaak ŋem, abi yin ya riɔp.

¹⁹ Duɔka weu ye tɔɔu ku muɔkka ke ne piny nom, te yee kek riak ne kɔm ku keth, ku te yee rueeny dhoŋ thin ku kuel;

²⁰ yaka weu tɔɔu ku muɔkka ke pan nhial, te yee kek ciɛk riak ne kɔm ku keth, ku te cii rueeny ye dhoŋ ku kuel.

²¹ Te de weuku, yenekee te de yipiɔu eya.

²² Lamba de guɔp, yenekee nyin. Yen na piath nyindu, ke guɔpdu ebɛn abi ya meer.

²³ Na rac nyindu, ke guɔpdu ebɛn abi ya cuɔl. Yen na col ɣɛɛrdu, ke cuɔldu ye kediit yinde!

²⁴ Acin ran ye ka ke bany keerou leu ne luɔi: abi tok ya maan ku nhiɛr tok, abi tok ya gam ku reec tok. We ce Nhialic leu ne lui ku weu.

²⁵ Yen we ya yɔɔk, Ya duɔka ye leeth ne piirduɔn ne ke bak cam ku ke bak dek; ku ne gupkuɔn ne ka ke ceŋ. Cie piir edit ne miɛth, ku guɔp ne ka ke ceŋ?

²⁶ Yaka diɛt nhial ŋem, kaacie pok, ku kaacie tem, ku kaacie jok guk; ku kaaye Wuɔrduɔn nhial ke miɛɛth. Cie we ewar keek?

²⁷ Yeŋa ne week ye ŋueny e dit bi kubit tok juak ne bɛɛrdeic?

²⁸ Yeŋo ye we leeth ne ka bakke ceŋ? Carka agurmiook roor, ne cil ye kek cil; aacie lui, ku kaacie lath:

²⁹ ku ɣan dhiac ka yook week, Ya Tholomon kene nuɔmde ebɛn ee cie pioth ci toŋ de keekake.

³⁰ Yen na ye Nhialic wɛl ke ror piɔth yela, ka ye tɔ ne yekole, alamiak e ke cuɛte mɛɛc, ke ci we bi ya piɔth ne pioth war yepiothe, week we kɔc koor gam ke.

³¹ Yen duɔka ye leeth, jamka, Wuɔ buk ŋo cam? ka, Buk ŋo dek? ka, Buk ŋo ya ceŋ?

³² Keekake kedhia aaye Juurkɔk ke kɔɔr; Wuɔrduɔn nhial anyic we lan ye we keekake dak kedhia.

³³ Yaka ceŋde kan kɔɔr ku lajiŋde; ku keekake kedhia aabike gam week.

³⁴ Yen duɔka ye leeth ne miak: miak abi leeth ne rɔt. Karɛc ke yekole aaye loi.