Mathayo 28 - Lek Jot de Jecu Kritho 1940

¹ Ɣɔn ne wɛɛr de kol de thabath, ne nyaany de run e piny de kol tueŋ de wik, go Mari Magdalene bɛn kene Mari dɛ bik raŋ ben ŋem.

² Ku tɔ aluɛkluɛk dit eeti; ku ci malaika de Bɛnydit bɛn piny nhial, bii leer kuur wei, ku nyuuc ne yenom.

³ Tuɔlden e tul en ee cit yuil e deŋ, ku ci alanhde ɣɛɛr ci kɔɔi:

⁴ ku dutiit aa lath riɔɔcki ne yen, ku jɔlki ciɛt ka ci thou.

⁵ Go malaika dhuk yook diar, Ye duɔke riɔc, we nyiɛcke ke we kɔr Yecu man ci piat.

⁶ Aliu eene; ee rɔt jɔt, ci luɛl cen e luel. Baka, ŋɛmka tee cene Bɛnydit kan thin.

⁷ Dacka lɔ, la lɛkka kɔcpiocke, Wuɔ kee rɔt jɔt ne thouic; ku kee we ŋaar Galili; abak lɔ ŋem thin; aca lɛk week.

⁸ Goki dac jal te de raŋ e ke riɔc ku cik piɔth lɔyum areet, riiŋki thok enɔŋ kɔckek piocke.

⁹ Ana yi lek kɔckek piocke lɛk, ke Yecu ram ke ke, ku jiɛm, Ye mathe. Goki bɛn, ku dɔmki cok, ku dorki.

¹⁰ Go Yecu ke yɔɔk, Ye duɔke riɔc: laka la lɛkka watmɛthcie, wuɔ ya laka Galili, ku kabak lɔ ŋem thin.

¹¹ Te ŋoot kek e ke cath, ke kɔc kɔk ke dutiit ci ɣet bei, ku lek kaŋ kedhia lɛk bany dit ke ka ke Nhialic ka cike loi.

¹² Na cik gueer kene roordit, ku cik roth jaam, e ke yin lathkeer weu juec ci kut,

¹³ ku jamki, Yi yaka luel, Wuɔ kɔckek piocke aa lueer wakɔu, ku nyiɛiki ke wɔ nin.

¹⁴ Ku na piŋ gabana yen, e kabuk kuɛm nom, ku jotku bei ne weyeth.

¹⁵ Goki weu loom, ku loiki ci man cik kek ye piŋ: ku yethoŋe ee thiɛi ne Judai yic, ku dhiɛɛc thin agut ci yekole.

¹⁶ Go kɔcpiocke keethiɛr ku tok goki lɔ Galili, leki ne kuur ci Yecu lɛk ke nom.

¹⁷ Ɣɔn acik ye ŋem, ke dorki, ku gɛi kɔk.

¹⁸ Go Yecu lɔ enɔŋ keek, ku yook keek, jiɛm, Ye riɛr ebɛn ee yiɛn ɣa nhial ku piiny.

¹⁹ Yen laka, ku yaka juɔɔr ebɛn cɔk ye kɔcpiɔcke; yaka ke baptith ne rin ke Wun, ku Wa, ku Jɔŋdiit Lajik:

²⁰ ku yaka ke piɔc bik kaŋ kedhia ka cake lɛk we ya loi: ku an bi ya tɔ wɔ we ne nyindhia, agut thok de piny. Amen.