Mathayo 24 - Lek Jot de Jecu Kritho 1940

¹ Go Yecu jaal ne yekalu, cith yenom wei, go kɔckek piocke lɔ enɔŋ en, bik lɔ nyuɔth buth cene yekalu buth.

² Go dhuk yook keek, Ye cak keekake ŋem kedhia? we ya yɔɔk neyic, Ya kacin kuur toŋ bi doŋ ne kuure nom yetene, ke ci bi thuɔr piny.

³ Ana ye nyuuc ne kuur de Olip nom, ke kɔcpiocke lueŋ roth en, jamki, Yi lɛke wɔ te bi keekake bɛn, ku bi ŋo bɛndu nyuɔɔth? ku kol ciɛn de piny nom?

⁴ Go Yecu dhuk yook keek, Ye ŋɛmka roth kɛlke raan bi we yiɛc wei.

⁵ Juaac abi bɛn ne rincie, ku ye jam, Ye ɣan ye Kritho; ku bi juaac ya yiɛc wei.

⁶ Ku we bi tɔɔŋ ya piŋ, ku thook ke tɔɔŋ; ŋɛmka roth kɛlke we bi nhiim ya liap; keekake aabi bɛn dhiil; ku kol ciɛn aŋoot.

⁷ Jure ke jure abi ɣeet, ku ceŋ ke ceŋ: ku kabi naŋ pawɛɛr ku aluɛkluɛk tɛɛn ku tɛɛn.

⁸ Ku keekake kedhia aaye gɔc de dhieu.

⁹ Ku kaabi we ya yiɛn dhieu, ku yiki we nɔk bak thou: ku we bi ya maan ne juɔɔr ebɛn ne rincie.

¹⁰ Ku juaac abi ya kɔth, ku yiki roth gam, ku yiki roth maan.

¹¹ Ku nebii juec ke adhuɔɔm aabi ya tuɔl, ku yiki juaac yiɛc wei.

¹² Ku nhiɛr de juaac abi ya liɛr ne kut bi karac kut.

¹³ Ku ran ye kɔɔc agut kol ciɛn, yeneka bi luɔk.

¹⁴ Ku keewelpiɛth ke ceŋke aabi lɛk piny nom ebɛn, bi juɔɔr ebɛn bi nyuɔɔth; ku jɔl kol ciɛn bɛn.

¹⁵ Yen na ŋɛmka rɛɛc de riaŋdit, ne luɛl ɣɔn ci nebi Daniel ye luel, ke kaac te lajik, (ne yee raan nyic ran ye ye ciir),

¹⁶ ke ne kɔc tɔ ne Judaya neke riŋ ne kur nhiim.

¹⁷ Ne ran tɔ ne ɣot nom ne ce lɔ piny bi kake lɔ nap bei ɣot:

¹⁸ ku ne ran tɔ domic ne ce dhuk ɣot bi alanhde lɔ loom.

¹⁹ Abi naŋ dhieu enɔŋ diar liac ku diar tiakke ne keeakolke!

²⁰ Ku yaka lɔŋ kɛlke miootduɔn bi bɛn muɔi, ku cii tɔ ne kol e thabath.

²¹ Jiɛth diit de piɔu abi tɔ, ke ken kan bɛn ɣɔn ciɛke piny agut ci yemane, ku kaci bi kan bɛɛr tɔ.

²² Ku ne keeakolke ken yic ciɛk, ee te cin ran ci luɔk: ee bian de kɔc cike lɔc yeneka cɔk ke ciek.

²³ Yen na yook raan week, Ye ŋɛmka, Kritho eke, ka tɛɛn; ke duɔke ye gam.

²⁴ Krithoi ke adhuɔɔm ku nebii ke adhuɔɔm aabi tuɔl, ku kaabi cit dit ku kagɛiyeke nyuɔɔth; bik kɔc yiɛc wei, aɣet kɔc cike lɔc.

²⁵ We cake lɛk ke ŋoot wei.

²⁶ Yen na yooki week, Yi katɔ roor; ke we duɔke lɔ: ku, Yi katɔ ne bian ɣot; ke we duɔke ye gam.

²⁷ Acit man ye yuil e deŋ bɛn ciɛn, ku ye ŋem agut tueŋ; yenekee cɔɔk de bɛn de Wen de raan.

²⁸ Te de lai ye thou yeneka ye coor guɛɛr.

²⁹ Ne jiɛth de piɔu cok ne keeakolke, ke akɔl abi maar, ku pɛɛi aci bi ruɛr, ku kuel aabi lony nhial, ku riir nhial aabi met.

³⁰ Ku jɔl cin de Wen de raan tuɔl nhial: ku juɔɔr ebɛn de tiɔp nom abi piɔu dhiau, ku kabi Wen de raan ŋem ne bɔ ne pioolic nhial kene riɛr ku nuɔm dit.

³¹ Ku kabi malaikaike tooc ne awuɔɔu dit de tuŋ, ku bik kɔckek cike lɔc kuɔɔt yic ne yom ye yic ŋuan, ciɛk ne nhial ŋeep lee guɔt ŋeme.

³² Piɔcka ne parabol de ŋaap. Te ci kerke kac ku nyook yith, e kanyiɛcka lan ci ruer thiɔk.

³³ Yenekee cɔɔkde eya, na yaka keekake kedhia ŋem, ke nyiɛcka lan yen thiɔk, atɔɔ ɣot thok.

³⁴ We ya yɔɔk neyic, Ya yekuane aci bi jaal aŋoot keekake kedhia e ke ken thok.

³⁵ Pan nhial ku piny aabi nyaai, ku welcie aaci bi nyaai.

³⁶ Acin ran toŋ nyic yekole ku thaa, acin malaikai ke pan nhial, ku acin Wa, ee Awa yetok.

³⁷ Caŋ de akol ke Noa, yeneka bi ya cɔɔk de bɛn de Wen de raan.

³⁸ Ɣɔn ŋot aboor wei aake ye cam, ku dekki, ku thiekki, ku mɛk nyiirken, agut kol leere Noa ne rian ditic,

³⁹ ku kucki, agut te biiye piau nyiɛɛi ke; yeneka bi ya caŋ de bɛn de Wen de raan.

⁴⁰ Yekole abii kɔc keerou tɔ domic; tok abi laar, ku dɔŋ tok.

⁴¹ Diar keerou diar guɛɛr aabi tɔ; tok abi laar, ku nyiɛŋe tok piny.

⁴² Yen yaka tiit: we kuc kol bi Bɛnyduɔn bɛn.

⁴³ Ku muɔkke yekene, na ne wun e ɣot nyic thaa bi rueeny bɛn, e kee te ci tiit, a kee te kene ɣonde thur.

⁴⁴ Yen yaka roth juiir eya; Wen de raan abi bɛn ne thaa kuɔcke.

⁴⁵ Yen yeŋa ye aluaŋ nɔŋ adot ku nyic kaŋ, ci bɛnyde taau ne pande nom, bi ke ya miɛɛth ne ɣan ke ciɛm?

⁴⁶ Yealuaŋe ee thiei, yen man na bɔ bɛnyde, ke yok ne lui yeya.

⁴⁷ We ya yɔɔk neyic, Ya kabi taau ne ka ye tɔ kene yen nhiim kedhia.

⁴⁸ Ku na ye yealuaŋe ye rɛɛc ye tak ne yepiɔu, Ye Bɛnydie kagaau,

⁴⁹ ku ye aluɛk kɔk lui kene yen gɔl ne dui, ku ye cam ku ye dek kene kɔc ye miɔl;

⁵⁰ ke bɛny de yealuaŋe bɔ ne kol ken tak, ku ne thaa e kuc en bɛnde,

⁵¹ kabii bɛnyde tɛɛm wei, ku tɛɛu ne biak de kɔc ke adhuɔɔm; te bi ya te de dhieu ku nyii de lec.