Mathayo 22 - Lek Jot de Jecu Kritho 1940

¹ Go Yecu dhuk, beer ke yɔɔk ne parabool, jiɛm,

² Ye ceŋ de pan nhial acit meleŋ ɣɔn, ci miɛth de thieŋ de wende loi,

³ ku tooc aluɛkke bik kɔc eke ci lɛk ne miɛth de thiek lɔ cɔɔl: goki cuɔk lɔ bɛn.

⁴ Go aluɛkkeek kɔk bɛɛr tooc, jiɛm, Ye yɔɔkka ke kek kɔc ci lɛk, Wuɔ ŋɛmka, miɛthdie aca juiir: mioorcie ku korekootcie aa nɔk, ku kaŋ kedhia aa loi: yen baka te de miɛth de thiek.

⁵ Goki lɔ cɔk ye kepiɛlic, ku leki ne ɣɔnken, lɔ ŋɛk te de domde, ku lɔ ŋɛk ne thuŋdeic,

⁶ ku dɔm kɔc ci doŋ dɔmki aluɛkke, ku yɔŋki keek, ku nɛkki keek.

⁷ Go melek go ɣok: ku tooc rɛmke, ku nɛk ke kek kɔc ke tir, ku nyop panden.

⁸ Ku yook aluɛkke, Ye thiek ee loi, ku kɔc cike lɛk aace piath.

⁹ Yen laka ne apuɔkdhɔl ku cɔɔlka kɔc kedhia kɔc bakke yok bik bɛn te de miɛth.

¹⁰ Go kealuɛkke lɔ ne apuɔkdhɔl, ku lek kɔc kuɔt yic kedhia kɔc cikke yok, kɔc rac ku kɔc piath: a go luak jal thiaŋ ne kamaan.

¹¹ Ɣɔn ye melek ye bii luɛɛk bi kamaan bi ŋem, ke ŋem ran tok ne cin alanh de thiek ceŋ:

¹² go thiec, Ye math, yeŋo bii yin eene ke cin alanh de thiek ceŋ? Go ciɛn ke dhuk.

¹³ Go melek aluɛkke yɔɔk, Ye dɛrka cin ku yecok, ku cuatka biyic ne cuɔlic; te bi ya te de dhieu ku nyii de lec.

¹⁴ Juaac aye cɔɔl, ku kalik keeka ye lɔc bei thin.

¹⁵ Go Parithai roth lɔ jaam ne ke bik kek ye waai ne jamde.

¹⁶ Ku tocki kɔcken piocki kene kɔc ke Kerod toocki ke enɔŋ en, jamki, Yi Dupioc, yin yuku nyic ke yin ye yic, ku ye kɔc wɛɛt ne dhol de Nhialic neyic, ku cii ye riɔc ne ran dɛ: ku yin ci lɛc de kɔc acii ye thieekic.

¹⁷ Yen lɛke wɔɔk, Ye tak wude? Piɛth buk Kaithar ya juɛr, ka cii piath?

¹⁸ Go Yecu go rɛɛcden nyic, ku jiɛm, Ye yeŋo yaka thɛm ɣa, we kɔc ke adhuɔɔm?

¹⁹ Nyuɔthka ɣa weu ke juɛr. Goki yiɛn denariɔn tok.

²⁰ Go ke thiec, Ye yeŋa yeke ci gaar thine?

²¹ Goki yɔɔk, Yi kee Kaithar. Go ke yɔɔk, Ye yaka Kaithar yiɛn ka ye ya kake, ku yiɛnka Nhialic ka ye kake.

²² Na cik ye piŋ, e ke gɛi, ku pɛlki, ku jiɛlki.

²³ Yekole aci Thadokai bɛn enɔŋ en, kɔc ye jam yi cin jon de rɔt, ku thiecki,

²⁴ jamki, Yi Dupioc, Mothe ee jam, Ye na ye raan thou, ku cin mith, ke manhe lɔ ɣot ne tiŋde, bi manhe kɔɔc.

²⁵ Yen wɔ nɔŋ wat keedherou: wen tueŋ ee thiek ku thou, ke cin meth, a go tiŋde nyaŋ manhe.

²⁶ Go bɛɛr yenya ne wen de rou, ku wen de diak, agut ke keedherou.

²⁷ Ku jɔl tiik thou ne kecok kedhia.

²⁸ Yen na ye akol ke jon de rɔt, ke bi ya tiŋ de ŋa ne ke keedherou? Ee ya keden kedhia.

²⁹ Go Yecu dhuk yook keek, Ye kayaka wuɔc, ne ke kuc we kacigɔɔr, ku riɛr de Nhialic.

³⁰ Ku akol ke jon de roth aceneke bi ya thiek, ku ci diar beere thiak; aaye ciɛt malaikai pan nhial.

³¹ Ku na ye jon de roth, ke we ken ke cii Nhialic lɛk we piŋ, ɣɔn jiɛm en,

³² Ye ɣan ye Nhialiny de Abraɣam, ku ya Nhialiny de Yithak, ku ya Nhialiny de Jakob? Yen Nhialic acie Nhialiny de kɔc ci thou, ee ke de kɔc ye piir.

³³ Na ci duut ye piŋ, e ke gɛi ne piocde.

³⁴ Na ci Parithai ye piŋ ke ci Thadokai cɔk mim, e ke kuut kenhiim.

³⁵ Ku ran toŋ de keek, ye dukuny de luɔk, aci ye thiec, them,

³⁶ Ye Dupioc, ye loŋo dit ne looŋ yic?

³⁷ Go yɔɔk, Ye ye Nhialic Bɛnydiitdu nhiar ne yipiɔu ebɛn, ku ne tiɛpdu ebɛn, ku ne tɛŋdu ebɛn.

³⁸ Yenekee loŋ tueŋ ku kee loŋ dit.

³⁹ Ku dɛ cit en eke, Ye ran ye reer ke yi nhiar ci man de yiguɔp.

⁴⁰ Loŋ ebɛn ku nebii aaye kɔɔc ne keelooŋke keerou.

⁴¹ Na ŋoot Parithai e ke kuɔt nhiim, e ke thiec Yecu ke,

⁴² jiɛm, Ye yaka tak wuɔde ne Kritho? yee wen de ŋa? Goki yɔɔk, Yi kee wen e Dabid.

⁴³ Go ke yɔɔk, Ye yeŋo e yee Dabid ye cɔɔl Bɛnydit ne Jɔŋdiit Lajik, jiɛm,

⁴⁴ Ye Bɛnydit ee Bɛnydiitdie yɔɔk, Ye nyuɔɔce ne ciin cuecdie, Aɣet kol ban yi cɔk kɛc kɔc nɔŋ ater kene yin kɔth?

⁴⁵ Yen na ne yee Dabid cɔɔl Bɛnydit, ke ye ya wende yede?

⁴⁶ Go ciɛn ran toŋ leu en ne dhuk wɛt, riɔɔcki ne yekole acin ran beer ye ya thiec.