Mathayo 18 - Lek Jot de Jecu Kritho 1940

¹ Yekole aci kɔcpiocke lɔ enɔŋ Yecu, ku thiecki, Yi yeŋa dit ne ceŋ de pan nhialic?

² Go mɛnhthi cɔɔl, ku tɛɛu ne keciɛl yic.

³ Ku jiɛm, Ye we ya yɔɔk neyic, ya na cak roth beer wel, ku bak ya ciɛt miththii, ke we ci kɔn lɔ ne ceŋ de pan nhialic.

⁴ Yen raan ebɛn ran bi rɔt cɔk ye kuur ci man de yemɛnhthine, yenekee dit de ceŋ de pan nhial.

⁵ Ku ran ye mɛnhthin cit yekene loor ne rincie, e kee ɣa loor.

⁶ Ku ran bi toŋ de keekathii ye ɣa gamke cɔk ye kɔth, e kee ŋuɛɛn ete cene kuur diit de guɛr duɔt e eyeth, bi diir ne bar kolic.

⁷ Piny abi naŋ riaak ne ka yeneke kɔth! ka ke kɔth aabi roth aa dhiɛɛl; ku ran ye ke bɛi abi naŋ riaak!

⁸ Na cɔk ciindu ka cok yi kɔth, ke tɛɛme wei ku cuate wei: aŋuan te leer yin ne piiric wene ɣɔn ci tɛm ka cike ŋoot, ne cuɛt cuɛte yin many ye dhiac wene ciɛn rou ku cok rou.

⁹ Na cɔk nyindu yi kɔth, ke tuk bei, ku cuate wei: aŋuan te leer yin ne piiric wene nyin tok, ne cuɛt cuɛte yin ne giɛna de macic wene nyiin keerou.

¹⁰ Ŋɛmka roth, kɛlke we bi ya tak arac ne toŋ de keekathiike. We ya yɔɔk, Ya malaikaiken tɔ pan nhial aaye Awa man tɔ nhial ɣoi nyin ne nyindhia.

¹¹ Wen de raan ee bɔ bi ke ci maar luɔk.

¹² Yaka tak wuɔde? te nɔŋe raan amɛl keethiɛrnyiɛny, ku mɛr tok, ke ce thiɛrdheŋuan ku dheŋuan wan, ku leer ne kuur nom, le ke ci maar kɔɔr?

¹³ Na ci ye yok, we ya yɔɔk neyic, e kee piɔu lɔ yum ne yen awɛr thiɛrdheŋuan ku dheŋuan ken maar.

¹⁴ Yenekee cɔɔkde acie piɔn de Wuɔrduɔn tɔ nhial bi toŋ de keekathiike maar bi liu.

¹⁵ Na ye wanmuuth kerac luɔi yin, ke yin lɔ nyuɔthe awanyde ne gupkuɔn wepɛc: na ci yi piŋ, ke yin ci naŋ wanmuuth.

¹⁶ Na cii yi piŋ, ke yin lɔ we ran tok ka rou, bi wɛt ebɛn bi kɔɔc ne thook ke duleek keerou ka diak.

¹⁷ Ku te reec en keek, ke lɛke kanitha; ku na reec kanitha, ke ne tɔ ke yin ci ran de Juurkɔk ku mejueer.

¹⁸ We ya yɔɔk neyic, Ya ke dɛ ebɛn ke bak ya deer piiny, abi ya deer pan nhial: ku ke dɛ ebɛn ke bak ya lony piiny, abi ya lony pan nhial.

¹⁹ We bɛɛrke yɔɔk, Ya na mɛt ren de week piiny ne ke dɛ ebɛn ke bak ya thiec, e kabi luɔi keek ne Awa tɔ pan nhial.

²⁰ Te ye kɔc mat keerou ka keediak ne rincie, ke ɣan ye tɔ ne keciɛl yic.

²¹ Ɣɔn ke Petero bɔ, ku thiec, Ye Bɛnydit, bi wanmaath ɣa luɔi kerac ku ba pal en naade? yee agut naadherou?

²² Go Yecu yɔɔk, Ye yin caa yook, Ya kacie agut naadherou: ee, naa agut dherou naathiɛrdherou.

²³ Yen ceŋ de pan nhial ee cit meleŋti, ee nɔŋ piɔu kuɛn de kany kene aluɛkke.

²⁴ Ɣɔn ye gɔl kuɛn, ke ran tok cuut en, ran ne ci ye yuɛt ne bianabur thiɛr de talantɔɔn.

²⁵ Ku te cin en ke cut en, go bɛnyde jam ye bi ɣaac, ke tiŋde, ku mithke, ku ka tɔ kene yen kedhia, ku bi cuut loi.

²⁶ Go aluak piny ciim, ku lɛŋ, ku jiɛm, Ye duk leeth, aabake cuɔl yin kedhia.

²⁷ Go bɛny de yealuaŋe go piɔu kac, ku lony, ku pɛl kɛny.

²⁸ Ela ke yealuaŋe lɔ biyic, ku le aluaŋ toŋ ye kek lui ke ye yok, ne ci e yuɛt denariɔɔn keethiɛrnyiɛny: ku kuɛk piny, ku dɔm ror, jiɛm, Ye col ka ca yuit.

²⁹ Go yealuaŋe go piny ciim, ku lɛŋ, jiɛm, Ye duk leeth aabake cuɔl yin.

³⁰ Go ciɛk gam, ela ke le taau ɣon de dom, agut te ben ke ci yuit cool.

³¹ Na ci aluɛk tɔ kene yen yeluɔine ŋem, e ke dhiau piɔth areet, ku lek bɛnyden lɛk ke ci loi ebɛn.

³² Go bɛnyde cɔɔl, ku yook, Ye yin ye aluaŋ rac, yin ca pal kɛny wen ebɛn, ne lɔŋ cin ɣa lɔŋ:

³³ ku yin eya, cii piath ba piɔu kac ne aluaŋ tɔ ke yi, ci man can piɔu kac enɔŋ yin?

³⁴ Ku ɣok bɛnyde, ku yin duluuc, agut te ben ke ci yuit cool ebɛn.

³⁵ Yenekee cɔɔk bii Awa tɔ nhial ye ya luɔi week eya, te ci ŋɛk ne week manhe ye puɔl ne yepiɔu.