Mathayo 13 - Lek Jot de Jecu Kritho 1940

¹ Yekole aci Yecu lɔ biyic ɣot, ku nyuuc ne bar yɔu.

² Go dun dit guɛɛr, go lɔ ne riaiic, ku nyuuc; ku kaac duut ebɛn wath thok.

³ Go ke jaam ne kajuec ne parabool, jiɛm, Ye ŋɛmka, ŋadi ee lɔ pok,

⁴ ana ye puk, ke kɔth kɔk loony ne dhol kec, go diɛt bɛn ku kuanyeke:

⁵ ku loony kɔk te nɔŋ kur, koor e tiɔp: goki dac kul ne ke cin en tiɔp;

⁶ ana ye akɔl ye ruer, e ke biɔl, yomki ne ke cin kek mei.

⁷ Ku loony kɔk ne kuɔth yic; go kuɔth cil, ku nhiɛceke.

⁸ Ku loony kɔk ne tiɔm piathic, goki luɔk, ye kɔk ya thiɛrnyiɛny, ku ye kɔk thiɛrdhetem, ku ye kake thiɛrdiak.

⁹ Ran nɔŋ yith, ke neke piŋ keek.

¹⁰ Go kɔcpiocke bɛn ku yookki, Yi yeŋo yin jam we keek ne parabool?

¹¹ Go dhuk yook keek, Ye we eka ci yiɛn kacikum ke ceŋ de pan nhial bak ke nyic, ku kakene yiɛn keek.

¹² Raan ebɛn ran ye naŋ kaŋ, aake yineke ye, ku kabi ya naŋ kajuec kɔk. Raan ebɛn ran ye ciɛn kaŋ, e kabi nyaai enɔŋ en, agut ke tɔ ke ye.

¹³ Yenekee jaam an wɔ keek ne parabool, ne ke yee kek ye ŋem, ku cik ŋem, ku ne ke yee kek ye piŋ, ku cik piŋ, ku cik ye muk.

¹⁴ Ku ke cii Yithaya lɛk keek ee ya yic, jiɛm, Ye na ye piŋ, e kabak ya piŋ, ku kacak kɔn muk; Na ye ŋem, e kabak ya ŋem, ku cakka kɔn dot.

¹⁵ Ne ke ci keekɔcke piɔth cuai, Yithken aa lɔ tac ne piŋ, Aa kenyiin niɛn, Kɛlke bik ya ŋem ne kenyiin, Ku yiki piŋ ne keyith, Ku yiki dot ne kepiɔth, Ku beerki dhuk, Ku ba ke cɔk dem.

¹⁶ Nyiinkuɔn aa thiei, ne ke ye kek yin; ku yithkuɔn, ne ke ye kek piŋ.

¹⁷ We ya yɔɔk neyic, Ya nebii juec ku kɔc lajik aake ye piɔth naŋ bik ka yakake ŋem ya ŋem, ku cik ke ye ŋem; ku yiki ka yakake piŋ kɔɔr bik ke piŋ, ku cik ke ye piŋ.

¹⁸ Yen piɛŋka parabol de dupuk.

¹⁹ Ya na ye raan ye wɛt de ceŋ piŋ, ku cii ye dot, ke kerac ee bɛn, ku yee ke ci puɔk ne yepiɔu nyaai. Yenekee ke ci puɔk ne dhol kec.

²⁰ Ku ke ci puɔk te nɔŋ kur, yenekee yen man ye wɛt piŋ, ku yee dac piŋ ne piɔn lɔyum;

²¹ ku ye ciɛn mei, yee yuul emaath; na ye kerac ye bii, ka ŋet ne wɛt, ke dɔc ya kɔth.

²² Ku ke ci puɔk ne kuɔth yic ee yen man ye wɛt piŋ; ke ŋueny de kapiiny, ku dhuɔm de naŋ kaŋ aaye wɛt nhiac, ku ci ye luɔk.

²³ Ku ke ci puɔk ne tiɔm piathice ee yen man ye wɛt piŋ, ku ye dot; yenekee luɔk ye kɔk ya thiɛrnyiɛny, ku ye kɔk thiɛrdhetem, ku ye kake thiɛrdiak.

²⁴ Go ke ciɛr parabol dɛ, jiɛm, Ye ceŋ de pan nhial acit ran ci kɔth piath pok domde.

²⁵ Ana ye kɔc yi ninki, ke ran nɔŋ ater kene yen bɔ, ku pok wɛl roor ne kɛm ke rap eya, ku jiɛl.

²⁶ Ana yi kulki, ku yi loki, ke wɛl roor tul eya.

²⁷ Go awuutke bɛn, yen ran de baai, ku yookki, Yi bɛny, kɛne kɔth piath puɔk domdu? cik ben ya wɛl roor teno?

²⁸ Go ke yɔɔk, Ye kee ran de ater yene loi en. Go awuut yɔɔk, Yi nɔŋ piɔu buk ke lɔ nyuɛth wei?

²⁹ Go jam, Ye aa; na nyuɛthka wɛl roor wei, ke we miit mei ke rap bei.

³⁰ Ne ke cil netok agut luɔk. Ku na ye kol e tem, ke an bi duteem yɔɔk, Ya kanke wɛl roor wuɔth bei, ku duɔtka ke bi ke nyop: ku tɛmka rap guŋdie.

³¹ Go ke ciɛr parabol dɛ, jiɛm, Ye ceŋ de pan nhial acit nyin toŋ de muthada, cii raan loom, ku com domde.

³² Ke ye ke koor ne nyin kedhia; ela ciil, ke ye ke gok wɛr wal, ku jɔl ya tim, aye diɛt nhial bɛn nyucki ne kerke.

³³ Go ke lɛk ne parabol dɛ, Ye ceŋ de pan nhial acit awuro, ci tiik loom, ku liɛp ne akuɔp ke cuinic keediak, agut te bik kek ya awuro kedhia.

³⁴ Keekake kedhia aaci Yecu ke duut jaam ne parabool; ku kacin ke ci lɛk keek te cin parabol:

³⁵ bi ke ci luel ne nebi bi ya yic, jiɛm, Ye ɣan bi athok ya kuek ne parabol; An bi kaŋ ya luel ka ci thian ɣɔn gɔɔce piny.

³⁶ Go duut waan ku leer ɣot. Go kɔcpiocke bɛn enɔŋ en, ku jamki, Yi nyuɔthe wɔɔk parabol de wɛl roor ke dom.

³⁷ Go dhuk jiɛm, Ye ran ye kɔth piath pok ee Wen de raan;

³⁸ ku dom ee piny; ku kɔth piath aaye ya wɛɛt ke ceŋ; ku wɛl roor aaye ya wɛɛt ke rɛɛc;

³⁹ ku ran de ater ci ke pok ee durieth; ku luɔkden ee kol ciɛn de piny; ku duteem aaye malaikai.

⁴⁰ Acit man yene wɛl roor kuany, ku nyop keek; yeneka bi ya cɔɔk de kol ciɛn.

⁴¹ Wen de raan abi malaikaike tuɔc, ku bik ke kuɛny bei ne ceŋdeic kedhia kek ka ye kɔc cɔk kɔth, ku kɔc ye awac loi,

⁴² ku bik ke cuat many dit: te bi ya te de dhieu ku nyii de lec.

⁴³ Ku kɔc lajik aabi ɣɛɛr ci akɔl ne ceŋ de Wuɔndenic. Nɛke piŋ ran nɔŋ yith.

⁴⁴ Ceŋ de pan nhial acit wenh ci thian domic; cii raan yok ku thiɛn; ku ɣɛɛc ka tɔ kene yen kedhia, ku jɔl dom ɣɔɔc.

⁴⁵ Ceŋ de pan nhial abeer ciɛt thujar ye margariti piath kɔɔr:

⁴⁶ te cen margariti toŋ de weu juec yok, ke lɔ ku ɣɛɛc kaŋ kedhia ka tɔ kene ye, ku ɣɔɔc.

⁴⁷ Ceŋ de pan nhial abeer ciɛt alau, alan ci cuat bɛɛr, go keriɛc wai.

⁴⁸ Ana ci thiaŋ, ke miite wath thok. Ku nyuucki kuɛnyki kapiath toony, ku cuɛtki karac wei.

⁴⁹ Yeneka bi ya cɔɔkde ne kol ciɛn. Malaikai aabi bɛn, ku tekki kɔc rac wei ne kɔc lajik yic,

⁵⁰ ku kaabike cuat many dit: te bi ya te de dhieu ku nyii de lec.

⁵¹ Go Yecu ke thiec, Ye cak keekake piŋ kedhia? Goki yɔɔk, Yi ee, Bɛny.

⁵² Go ke yɔɔk, Ye yen dugɛɛr kedhia, cike cɔk ye kɔcpiɔcke ke ceŋ de pan nhial, aacit man de ran de baai, man ye loom ne weuke, kathɛɛr ku kajot.

⁵³ Na ci Yecu keeparaboolke thol, ke jiɛl etɛɛn.

⁵⁴ Ku bii panden, ku weet keek luaŋden de gueer, agut te gɛi kek, jamki, Yi ne yerane yok nyiny de kaŋ teno, ku kadit yeeke loi?

⁵⁵ Ci ye wen de aten de tiim yekene? ci man ye cɔɔl Mari? ku watmɛthken, yi Jakob, ku Jothep, ku Thimon, ku Judath?

⁵⁶ Ku nyirakɛcke, cik tɔ kene wɔ kedhia? ne yerane yok keekake kedhia teno?

⁵⁷ Ku cik kɔth ne yen. Go Yecu ke yɔɔk, Ye nebi acie ciɛn dheeŋ, ee pinyden ku panden kepɛc.

⁵⁸ Ee ken kadit juec loi eeti ne ke ken kek ye gam.