Mathayo 1 - Lek Jot de Jecu Kritho 1940

¹ Kitap de kuat ke Yecu Kritho, wen e Dabid, Dabid e Abraɣam.

² Abraɣam ee Yithak dhieth; ku dhieth Yithak Jakob; ku dhieth Jakob Juda ku watmathken;

³ ku dhieth Juda Peredh ku Dhera de Tamar; ku dhieth Peredh Kedhron; ku dhieth Kedhron Aram;

⁴ ku dhieth Aram Aminadap; ku dhieth Aminadap Nacɔn; ku dhieth Nacɔn Thalmon;

⁵ ku dhieth Thalmon Boadh de Rakab; ku dhieth Boadh Obed de Ruth; ku dhieth Obed Jethe;

⁶ ku dhieth Jethe Dabid melek. Ku dhieth Dabid Tholomon ne tiŋ ne ci kan ya tiŋ de Uria;

⁷ ku dhieth Tholomon Rekoboam; ku dhieth Rekoboam Abija; ku dhieth Abija Atha;

⁸ ku dhieth Atha Jekocapat; ku dhieth Jekocapat Joram; ku dhieth Joram Udhia;

⁹ ku dhieth Udhia Jotham; ku dhieth Jotham Akadh; ku dhieth Akadh Kedhekia;

¹⁰ ku dhieth Kedhekia Manathe; ku dhieth Manathe Amon; ku dhieth Amon Jothia;

¹¹ ku dhieth Jothia Jekonia; ku watmathken, ne run e lere kɔc Babulon.

¹² Ku na ci kɔc laar Babulon, ke Jekonia dhieth Calathiel; ku dhieth Calathiel Dhorobabel;

¹³ ku dhieth Dhorobabel Abiud; ku dhieth Abiud Eliakim; ku dhieth Eliakim Adhor;

¹⁴ ku dhieth Adhor Thadok; ku dhieth Thadok Acim; ku dhieth Acim Eliud;

¹⁵ ku dhieth Eliud Eleadhar; ku dhieth Eleadhar Mathan; ku dhieth Mathan Jakob;

¹⁶ ku dhieth Jakob Jothep mony de Mari, man ci Yecu dhieth, ci cɔɔl Kritho.

¹⁷ Yen kuat kedhia ne Abraɣam agut Dabid aaye thiɛr ku ŋuan; ku ne Dabid agut leer de kɔc Babulon aaye thiɛr ku ŋuan; ku ne leer de kɔc Babulon agut Kritho aaye thiɛr ku ŋuan.

¹⁸ Dhiɛth de Yecu Kritho ee yinla: na ci man Mari koot ne Jothep, aŋootki e ke ken guɔ reer, go yok ke liac ne meth ne Jɔŋdiit Lajik.

¹⁹ Ku Jothep monyde, ee ye ran piath, ku cin piɔu bi caath guɔp, nɔŋ piɔu bi nyaai neluɔɔŋ.

²⁰ Ku te tɛk en keekake, ŋɛmka, go malaika de Bɛnydit tuɔl enɔŋ en ne nyuɔth, jiɛm, Ye Jothep, wen de Dabid, duɔne riɔc ne leer de tiŋdu Mari: ke liɛc en ee ke de Jɔŋdiit Lajik.

²¹ Kabi wa dhieth, ku kabin rinke cak cɔk ye Yecu: yeneka bi kɔcke luɔk ne karɛcken.

²² Keekake kedhia aa loi bi ke ci luel ne Nhialic ne thoŋ de nebi bi ya yic, jiɛm,

²³ Ye ŋɛmka, dhueny ken thɔny ke roor abi liac, ku kabi wa dhieth, Ku kabik cak cɔkki ye Emanuel; te luele yen ne thoŋda, ke ye, Nhialic ee tɔ ke wɔ.

²⁴ Go Jothep rɔt jɔt ne ninic, ku loi ci man cene ye lɛk e ne malaika de Bɛnydit, loom tiŋde;

²⁵ ku cik thɔny agut te dhieth en wa: ku jɔl rinke cɔɔl Yecu.