Welpiath ci Luk cithiei ke gɔɔr 2 - Lek Jot de Jecu Kritho 1940

¹ Na ɣɔn ne keeakolke, ke loŋ bɔ enɔŋ Kaithar Augoutho, ye bi rin ke kɔc kedhia bi ke gɔɔr.

² (Ku yekene yenekee gɔc de kuɛn, ku Kurenio ee ye gabana de Thuria.)

³ Go raan ebɛn lɔ, ye ŋɛk lɔ panden bi rinke cɔk leke gɔɔr.

⁴ Go Jothep go jaal eya piny de Galili, pan cɔl Nadhareth, leer Judaya, pan de Dabid, cɔl Bethlekem; ne kee kɛɛr en kene Dabid;

⁵ lee rinken gɔɔr kene Mari nyanden thiɛk, kee cii liec dit.

⁶ Na ɣɔn atɔki eeti, ke pɛikeek ke liec thok.

⁷ Go kaai ne wenden tueŋ; ku kuɛth ne alath, ku tɛɛc ne ke ye akaja cam; ne kee cin en kaam de reer ɣon de abakeeny.

⁸ Ku abiok ake tɔ rokic tethiɔk yepinye, ake biook thoken wakɔu.

⁹ Ku kaac malaika de Bɛnydit ne kelɔm, ku riar keek ne nuɔm de Nhialic, goki riɔc areet.

¹⁰ Go malaika ke yɔɔk, Ye duɔka riɔc; ŋɛmka, an yin we thoŋ piɛth de miɛt diit de piɔu, bi ya tɔ kene raan ebɛn:

¹¹ we ceneke Duluɛk dhieth ekole pan de Dabid, man ye Kritho Bɛnydit.

¹² Ke bi we nyuɔth eke; We bi meth yok mɛnh ci kuɔth ne alath ku ci taac ne ke ye akaja cam.

¹³ Go remdiit de pan nhial tuɔl kene malaika elantoŋtɛi, ku lecki Nhialic, jamki,

¹⁴ Yii keewuubi nuɔm ya tɔ nhialic ke Nhialic, Ku keewuubi dɔɔr ya tɔ ne kɔc yic, ke keek man mit en ke piɔu.

¹⁵ Na ɣɔn aci malaikai jaal cik dhuk nhial, go abiok goki roth yɔɔk, Yii loku Bethlekem, buk yeke ci tuɔle lɔ ŋem, ke ci Bɛnydit lɛk wɔ.

¹⁶ Goki dai lɔ, goki Mari yok kene Jothep, ku meth ne ci taac ne ke ye akaja cam.

¹⁷ Na wen cik ye ŋem, goki wel wen lɛk raan ebɛn wel ci pial ke ne yemɛnhe.

¹⁸ Ku raan ebɛn ran ci keewelke piŋ ee gai ne wel ke abiok ke thok.

¹⁹ Ku dhiac Mari ke dot ejame ebɛn, ye ke ciɛɛt ne yepiɔu.

²⁰ Go abiok dhuk, e ke nom Nhialic ku lecki ne keriɛc cik piŋ ku ŋemki, ci man e cen e lɛk keek.

²¹ Na ɣɔn aci akol keebɛt thok ke ŋuɔt de yen, goki jal cak cɔkki ye Yecu, rin eke goke luel ne malaika ke ŋoot ke kene guɔ dhieth.

²² Ɣɔn ye ninken ke tɛm de guɔp yi cik thok ci man de loŋ de Mothe, ke leerke Jeruthalem, bi lɔ cuɔk Bɛnydit;

²³ (ci man cene ye gɔɔr ne loŋ de Bɛnyditic, Ya mɛnh moc ebɛn ye dhieth abi ya cɔɔl kelajik enɔŋ Bɛnydit;)

²⁴ ku bik ke de koc ya gam ci luɛl de loŋ de Bɛnydit, Ya kureei keerou ka ajiɛl keerou ke kure baai.

²⁵ Ku raan ee tɔ ne Jeruthalem, cɔl Thimeon; ku yerane ee ye ran piath ku leejik, ne tit luaŋ de Yithrael: ku Jɔŋdiit Lajik ee tɔ kene yen.

²⁶ Ku ci lɛk ne Jɔŋdiit Lajik, ya cii kɔn thou, ke ŋoot ke ken Kritho de Bɛnydit kan ŋem.

²⁷ Go lɔ luaŋ de Nhialic ne wɛt de Jɔŋdit: na wen ya biye Yecu ne kɔcken, bik bi loi ci man cene ye gɔɔr,

²⁸ ke koom Thimeon, ku leec Nhialic, jiɛm, Ye

²⁹ Bɛnydit, cɔk awundu cɔk jiɛl kene dɔɔr, Ci luɛl e cin e luel ɣɔn;

³⁰ Luaŋdu aca ŋem ne anyin:

³¹ Luaŋ ca juir ne kɔc nyiin kedhia.

³² Bi ya ɣɛɛr bi Juurkɔk a nyuɔɔth, Ku bi ya nuɔm de jurdu Yithrael.

³³ Go yi Jothep kene man goki gai ne wel cike luel ne meth.

³⁴ Go Thimeon ke thiei, ku jiɛm yook Mari man, Ye ŋem, yemɛnhe ee bɛi bi juaac cɔk yuɛɛk ku jot juaac rɔt ne Yithraelic; ku bi ya cin ye luum.

³⁵ Anda, ku theep abi yi gut piɔu eya; bi taŋ de piɔth kuɔt bi nyuɔɔth.

³⁶ Ku kee nɔŋ tiŋ toŋ cɔl Ana, tiɛŋ nebi, nyan de Panuɛl, de dhien de Acer: (ci run juec taau, ku ne ci tɔ ke monyde ne run keedherou eke thiɛke ke yen,

³⁷ ku jɔl ceŋ ke ye tiŋjɔɔk ne run keethiɛrbɛt ku ŋuan,) ku cii ye ɣoc ne yekaluic, ye duur ke thiel ku lɔŋ wakɔu ku akol.

³⁸ Go ɣeet bii emanthine ku leec Nhialic, ku lek kɔc ne yen kɔc eke ye luaŋ de Jeruthalem ŋɔɔth.

³⁹ Na ɣɔn acik kaŋ loi kedhia ci man de looŋ ke Bɛnydit, goki jal dhuk Galili; lek panden Nadhareth.

⁴⁰ Go meth dit, ku leer ke rir piɔu, ku ci thiɔŋ ne nyic: ku ye athiɛi de Nhialic tɔ ke yen.

⁴¹ Ku ye wun ku man yiki lɔ Jeruthalem ne run kedhia ne miɛth de ret.

⁴² Ɣɔn aci runkeek ke dit ya thiɛr ku rou, e ke lɔ ne lɔ thɛɛr te de miɛth;

⁴³ ɣɔn ye ninken yi thokki, ku yi dhukki, ke dhuk Yecu ke dɔŋ ciɛn Jeruthalem; ku kuc kɔcken;

⁴⁴ colki yi ciɛth ne duutic, tholki kol tok dholic; ku kɔrki ne kɔc kaar kene keek yic, ku kɔc nyiɛc kene keek.

⁴⁵ Ɣɔn yi kenki yok, e ke dhuk Jeruthalem, lek kɔɔr.

⁴⁶ Na ɣɔn aci nin ya diak, ke jɔlki yok ne yekaluic, ne rɛɛr ne kɛm ke dupiooc, piŋ welken ku thiec keek:

⁴⁷ wen acik nyinyde piŋ ku welke, e ke gɛi kedhia.

⁴⁸ Wen yi ŋemki ye, e ke gɛi: ku yooke man, Ye Wendie, yeŋo jɔl loi wula enɔŋ wɔɔk? ŋem, wur ku ɣɛn yin cuk kɔɔr ke wɔ dhiau.

⁴⁹ Go ke yɔɔk, Ye yeŋo yaka kɔɔr ɣa? kuɔcka ke ɣan bi tɔ ɣon de Awa dhiil?

⁵⁰ Goki ke ci lɛk keek cuɔk muk.

⁵¹ Go lɔ kene keek, biki Nadhareth; ku ye welken piŋ: ku ye man keewelke muk kedhia ne yepiɔu.

⁵² Ku Yecu ee dit ku diit ke nyic, ku le yum ne Nhialic piɔu, ku ne raan piɔu.