Welpiath ci Luk cithiei ke gɔɔr 15 - Lek Jot de Jecu Kritho 1940

¹ Ku mejueer kedhia ku kɔc rac aa roth cuɔt en bik bi piŋ.

² Go Parithai ku dugɛɛr goki ɣok, jamki, Yi yerane ee kɔc rac loom, ku rom kene keek.

³ Go ke jaam ne yeparabole, jiɛm,

⁴ Ye yeŋa de week, nɔŋ amɛl keethiɛrnyɛny, ku ci tok maar ne keyic, go thiɛrdheŋuan ku dheŋuan cuɔk nyiɛŋ roor, ku le ke ci maar kɔɔr, agut te yok en en?

⁵ Ela ku ci ye yok, e kajɔt ne yekɔu, cii piɔu jal miɛt.

⁶ Ana ye bii bei, ke cɔl mɛɛthke ku kɔc rɛɛr kene yen, jiɛm, Ye laka piɔth yum wene ɣɛn, ɣan ci amaldien ne ci maar yok.

⁷ We ya yɔɔk, Ya yenekee cɔɔk bene piɔth miɛt pan nhial ne ran rɛɛc toŋ ci yepiɔu wel, ne kɔc lajik keethiɛrdheŋuan ku dheŋuan ken kepiɔth wel.

⁸ Ka ye tiɛŋ ŋa, na nɔŋ riɛr keethiɛr, ku ci tok muɔr thin, ke ce mac deep, ku weec ɣotic, ku cool e kɔɔr agut te yok en en?

⁹ Ku na ci ye yok, ke ce nyiriɛcke cɔl ku kɔc rɛɛr kene yen, ku jiɛm, Ye mitku piɔth, an ci riardien waar ca muɔr aca yok.

¹⁰ Yen, we ya yɔɔk, Ya yum de piɔu ee tɔ ne malaikai ke Nhialic nyin ne toŋ rɛɛc ci yepiɔu bɛr wel.

¹¹ Ku jiɛm, Ye ran tok ee nɔŋ wat keerou:

¹² go wenthi wun yɔɔk, Ye Wudie, yiɛne ɣa baŋ ye baŋdie ne kaku yic. Go kake tɛk keek.

¹³ Ana ye thol nin diaak, ke kuut kake yic, ku kook leer piny mec: ku lee kake thiai wei ne ceŋ rac.

¹⁴ Na ci kake thol kedhia, go pawɛɛr go tuɔl yepinye; go kake jal dhal.

¹⁵ Go lɔ ku mɛt rɔt ran toŋ de pan de yepinye; go yerane ya cɔk lɔ roor bi kuɔlke ya lɔ biɔɔk.

¹⁶ Ku ye kɔɔr epiɔu bi yeyic ya thiɔŋ ne paat ye kuɔl ke cam: ke ye ciɛn randen ye ke yiɛn e.

¹⁷ Na ɣɔn ci bɛn tede yetok, ke jam, Ye aluɛk juec tɔ kene awa aanɔŋ monoi kueth ke ku bothki ke, ku ɣan ekee ke thook eenene ne cɔk!

¹⁸ Ɣan bi rɔt jɔt ku laar enɔŋ awa, ku kaba lɔ yɔɔk, Ya Awa, ɣan ci rɛɛc luɔi nhial, ku ne yinyin:

¹⁹ an ce piath, a ɣan ce bere ya cɔɔl wendu: cɔk ɣa cit ran toŋ de aluɛkku.

²⁰ Ku jɔt rɔt, ku bii enɔŋ wun. Na ŋoot ke mec, ke ŋem wun, go piɔu kac, ku kɛt, ku lee buɔr piny, ku ciim.

²¹ Go wa yɔɔk, Ye Wudie, ɣan ci rɛɛc luɔi nhial, ku ne yinyin: ɣan ce piath, a ɣan ce bere ya cɔɔl wendu.

²² Go wun aluɛkke yɔɔk, Ye dacka alanh piath bɛi, ku piɔthka ne yekɔu; ku taauka katim ne yeciin, ku piɔthka war ne yecok;

²³ ku bɛika miɔr atieke, ku nakka, buk cuet ku buk piɔth miɛt:

²⁴ yewendiene ee ci thou, ku kee bɛɛr piir, ee ci maar ku kee bɛɛr yok. Goki piɔth jal miɛt.

²⁵ Ku wendit ee tɔ domic: ana ye bii ku ye cooth baai, ke piŋ madhika ku diɛr.

²⁶ Go aluaŋ tok cɔɔl, ku thiec keekake.

²⁷ Go yɔɔk, Ye wanmuuth ee bɛn; ku wuur ee miɔr atieke nɔk, ne ke cen ɣeet enɔŋ en ke piɔl guɔp.

²⁸ Go ɣok, a cii lɔ bei: go wun bɛn ku lɛŋ.

²⁹ Go wun yɔɔk, Ye ŋem, yin ca luɔi ne keerunke kedhia, ku kacin loŋdun ca kan wuɔcic: ku cii ɣa kɔn yiɛn nyɔŋ thin e thɔk, ban piɔu miɛt wɔne wariɛccie:

³⁰ ela ku ye yewendune ye bii, man ci kaku thiai wei ne abɛɛl, ke nakne miɔr atieke.

³¹ Go wun yɔɔk, Ye Wendie, yin ye tɔ luut wene ɣɛn, ku kacie kedhia aye kaku.

³² Ku kee piath bi kɔc piɔth miɛt: ne ke cite yewanmuuthe ke e ci thou, ku beer piir, ku cit ke e ci maar, ku bere yok.