Welpiath ci Luk cithiei ke gɔɔr 10 - Lek Jot de Jecu Kritho 1940

¹ Na ɣɔn aci keekake thok, go Bɛnydit thiɛrdheren kɔk lɔc, ku tooc ke rou ku rou, bik ye ŋaar ne bɛi kedhia ku ne ɣan kedhia, ben ke lɔ thin ne guɔpde.

² Go ke yɔɔk, Ye ka ci luɔk aajuec, ku kɔc tem ke aalik: yen laŋka Bɛnydiit de ka ye luɔk, bi kɔc ke luɔi tuɔc ne kakeek ci luɔk yic.

³ Lak ɣɔu dholduɔn: ŋɛmka, we ya tooc ci dɛɛu ke amɛl ne baŋbaar yic.

⁴ Duɔke weu luɛth, ku boon, ku war: ku duɔka raan muɔth dholic.

⁵ Ku na yaka lɔ ɣon ye we lɔ thin, ke we yaka kan jam, Wuɔ keewuubi dɔɔr ya tɔ yeɣone.

⁶ Ku na nɔŋ ran de dɔɔr tɔ thin, ke dɔɔrduɔn abi reer ke yen: ku na liiu, ke ne dɔɔrduɔn dhuk ke we.

⁷ Ku dhiacka yeɣone, ku camka ku dɛkka ne ka ci miɔc we: apiath bi ran ye lui ya naŋ riopde. Duɔka ye lɔ ɣone ku lak ɣone.

⁸ Ku bɛi kedhia ye we ke lɔ thin, ku ye we loor, ke we ye ka ci kan ne wenhiim cam:

⁹ ku cɔk we kɔc bec dem thin, ku yɔɔkka ke, Wuɔ ceŋ de Nhialic ee we cooth.

¹⁰ Ku pan ler we thin, ku cene we lor, ke we laka ne dhɔɔl yic ku jamka:

¹¹ Wuɔ tur de panduɔn, ci lɔ nuat ne wɔcok, ateeŋku wei ne week: ku nyiɛcka kene, ceŋ de Nhialic ee ɣeet.

¹² We ya yɔɔk, Ya yepane abii Thɔdom ŋuɛɛn.

¹³ Yin bi naŋ dhieu, yin Koradhin! yin bi naŋ dhieu, yin Bethaida, nee kadit loike ne Turo ku Thidon, ci man loie ke ne weyic, ee te cik kepiɔth wel thɛɛr, ku yiki reer ne alanh de cualic ku ne ŋethic.

¹⁴ Abi ŋuɛɛn enɔŋ Turo ku Thidon ne yin ne kol e luk.

¹⁵ Ku yin, Kapernaum, bi yi jat nhial? yin bi bɛi piny pan de tip ke kɔc.

¹⁶ Ran ye we piŋ ee ɣa piŋ; ku ran ye we jai ee ɣa jai; ku ran ye ɣa jai ee ye jai yen man ci ɣa tuɔc.

¹⁷ Go kɔc wen keethiɛrdherou goki dhuk ne piɔth mit, jamki, Yii Bɛnydit, agut jak rac aa wɔ gam ne rinku.

¹⁸ Go ke yɔɔk, Ye ɣan ci Catan ŋem, ne loony piny nhial ke cit yuil e deŋ.

¹⁹ Yen ŋɛmka, we ca yiɛn riɛr bii we karuɔr ku ciɛth ya kac yic, ku riɛr bii we kɔc nɔŋ we ke ater ya tiam: ku kacin kethin bi we kan ya nɔk.

²⁰ Ku duɔka piɔth ye miɛt ne yekene, ne gam ci jak rac we ya gam; yaka piɔth miɛt ne gaar cene rinkuɔn gɔɔr pan nhial.

²¹ Ku yethane ee cen piɔu miɛt ne Jɔŋdiit Lajik, go jam, Ye yin lɛɛc, Yin Wudie, Bɛnydiit nhial ku piny, ne ke cin keekake muɔny kɔc nɔŋ nyic ku nɔŋki adot, ku nyuɔthe ke miththii thuet: ee yic, Wudie; ne ke len yuum ne yenyin areet.

²² Keriɛc ee yiɛn ɣa ne Awa; ku kacin ran nyic Wa lan yen ŋa, aye Awa yetok, ku kacin ran nyic Wun lan yen ŋa, ee Wa yetok, ku ran yee Wa kɔɔr bi nyuɔth Wun.

²³ Ku wel rɔt kɔcpiocke, ku jiɛm ke muny, Ye nyiin aa thiei nyiin ŋem keeka ŋɛmekeka:

²⁴ we yɔɔkke, Ya nebii juec ku meleek aake kɔr bik ka ŋɛmeke ya ŋem, ku cik ke ye ŋem; ku kɔrki piŋ de ka yakake piŋ, ku cik ke ye piŋ.

²⁵ Ŋem, dukuny toŋ de luɔk ee rɔt jɔt ku them, jiɛm, Ye Dupioc, yeŋo ba ya loi ba piir athɛɛr loom?

²⁶ Go yɔɔk, Ye yeŋo ci gɔɔr ne loŋic? Ye ciir wude?

²⁷ Go dhuk jiɛm, Ye yin bi Bɛnydit Nhialinydu ya nhiar ne piɔndu ebɛn, ku ne tiɛpdu ebɛn, ku ne riɛrdu ebɛn, ku ne tɛŋdu ebɛn; ku ye ran rɛɛr ke yi nhiar ci man de yiguɔp.

²⁸ Go yɔɔk, Ye kaca dhuk apiath: ye loi wuya, ku yin bi ya piir.

²⁹ Go raan, nɔŋ piɔu bi rɔt kony, go Yecu yɔɔk, Ye ku yeŋa ye ran rɛɛr ke ɣa?

³⁰ Go Yecu dhuɔk e jiɛm, Ye raan ee jiɛl ne Jeruthalem leer Jeriko; go mɛɛr ne kɔc ye peec yic, goki alɛthke piɔth bei ku duiki ku leuki wei, nyiɛŋki piny ke ci duɔr thou.

³¹ Go bɛny de ka ke Nhialic go keny yedhole: go ŋem go yiɛc.

³² Ku yene ye cɔɔk de muɔny Lebi, wen ye ɣeet te de raan, ke ŋem, go yiɛc.

³³ Go ran toŋ de Thamaria go keny yedhole, go ɣeet te e tɔ raan thin: go ye ŋem, go nyin kuany ne yen,

³⁴ ku ɣeet enɔŋ en, ku duut ɣɔntookke, ku wɛl keyic miok, ku piukeabiɛi; ku jɔt ne lande kɔu, ku bii ɣon de akeeny, ku ŋem apiath.

³⁵ Ɣɔn miak ke bii denariɔɔn bei keerou, ku yin ke ran de ɣot, ku jiɛm, Ye ye nyin tiit ne yen; ku na ca weuku ya gam ne kede, miak ku laa bɛn ke yin ba bɛɛr cuɔt.

³⁶ Yeŋa de keekɔcka keediak ye tak wu yene ci ya mɛthe de ran ci mɛɛr ne kɔc ye peec yic?

³⁷ Go jam, Ye kee ran ci ye nyuɔth kac de piɔu. Go Yecu yɔɔk, Ye lɔɔr, ku ye loi wuya.

³⁸ Na wen akuanyki dholdenic, goki lɔ panthin dɛ: go tiŋ toŋ cɔl Martha go loor leer ɣonde.

³⁹ Ku kee nɔŋ nyankene cɔl Mari, man e ci nyuc ne Bɛnydit cok, ku piŋ wɛtde.

⁴⁰ Ku ci Martha nuan areet ne luɔi; go bɛn enɔŋ Yecu, ku jiɛm, Ye Bɛnydit, ci ye tak yeke ci nyankɛi ɣɛn pal luɔi atok? yɔɔke bi ɣa kony.

⁴¹ Go Bɛnydit dhuk yook, Ye Martha, Martha, yin ci piɔu dit ku ca ŋueny ne kajuec:

⁴² ku kee tok erir yeneka dak: Mari ee baŋ piath lɔc, baŋ ci bi nyaai enɔŋ en.