Welpiath ci Luk cithiei ke gɔɔr 1 - Lek Jot de Jecu Kritho 1940

¹ Kɔc juec aa gar de ka ci roth jal dhiɛl ne wɔyic them ne gaar,

² ci man e yin kek ke wɔ, ke keek man eke ye duleek ke nyin ku yiki awuut ke wɛt,

³ wen aca kaŋ kedhia kan kɔɔr cok aba ke guɔt, ke jal tak ya piɛth enɔŋ ɣɛn eya ba yi gar kaŋ e ke tiiŋ kecok, yin Theopilan diit piath areet;

⁴ ba kaŋ cok nyic cok kek ka eke cene ke yi wɛɛt.

⁵ Ɣɔn ne akol ke Kerod, meleŋ de Judaya, ke bɛny de ka ke Nhialic ee tɔ cɔl Dhakaria, ran de kuan de Abija: ku ye tiŋde ye nyan de nyiir ke Aron, ku ke ye cɔɔl Elithabeth.

⁶ Ku kaake lɔjik ne Nhialic nyin keerou, yiki looŋ ke Bɛnydit kuany yic e ke ce kɔth.

⁷ Ku kaake cin meth, ne kee ci Elithabeth ror, ku cik dhiɔp areet keerou.

⁸ Na ɣɔn ye loi luɔiden de bɛny de ka ke Nhialic ne Nhialic nom ne luɔi de nyinde,

⁹ ci man yen ya luɔi de bɛny de ka ke Nhialic, ke nyum de wal nyir ne yekalu de Bɛnyditic tɔ ne yeyeth ne yekole.

¹⁰ Ku dun diit de kɔc ee laŋ ne baŋ biyic te nyope wal nyir.

¹¹ Go malaika de Bɛnydit tuɔl ku kɛɛc ne baŋ cuec de kan de nyum de wal nyir.

¹² Na wen ye Dhakaria ye ŋem en, ke lɔ piɔu etuk, dɔm riɔc.

¹³ Go malaika yɔɔk, Ye duɔna riɔc, Dhakaria: ŋaldu ee piŋ; ku Elithabeth tiŋdu abi yi dhiɛth wa, ku kaba cak cɔk ye Jɔn.

¹⁴ Ku yin bi piɔu lɔyum, ku juaac abi piɔu miɛt te dhiethe ye.

¹⁵ Abi yic thiɛk ne Bɛnydit nyin, ku kaci bi ya dek e piukeabiɛi ka miau; ku kabi thiɔŋ ne Jɔŋdiit Lajik, elan e bii en bei ne manic.

¹⁶ Ku kabi mith juec ke Yithrael wɛl nhiim Bɛnydit Nhialinyden.

¹⁷ Ku kabi ya ŋɔɔr ne yenom ne riɛr ku jɔŋ de Elija, ku bi wurken wɛl piɔth ne mithken gup, ku bi kɔc reec wel bi ke wɛl piɔth ne nyiny de kɔc piathic, bi kɔc juir juir ke bɛn de Bɛnydit.

¹⁸ Go Dhakaria go malaika yɔɔk, Ye ba yekene nyic yade? ɣan eke ye ran ci dhiɔpe, ku ci tiŋdie ci dhiɔp eya.

¹⁹ Go malaika gam yook, Ye ɣan ekee Gabriɛl, ɣan ye kɔɔc ne Nhialic nom, ku an ci tuɔc ba bi jam wɔne yin, ba yi ben lɛk yethoŋ piɛthe.

²⁰ Yen ŋem, yin bi ciɛn yithok, jam acii bi leu, agut akol bi keekake roth dhiɛɛl, ne ke ken yin welcie gam, wel bi roth dhiɛɛl ne kolden.

²¹ Ku kɔc aa Dhakaria tiit, gɛiki ne ke gɛɛu en ne yekaluic.

²² Ɣɔn ye bii bei, ke ci jam ye leu ke keek: goki nyic lan e nɔŋ en ke e ci e lɔny ne yekaluic: ne ke yen ke nieu, ku cin te jam.

²³ Na ɣɔn, aci akolkeek ke luɔi thok, ke lɔ pande.

²⁴ Na ɣɔn ke Elithabeth ke liac, go rɔt ya thian ne pɛi keedhiec, jiɛm,

²⁵ Ye luɔi de Bɛnydit eke, cen a ŋem, bi lɛɛt yene ɣa laat ne kɔc bi liu.

²⁶ Ɣɔn ne pɛɛi de dhetem ke malaika Gabriɛl ee ci Nhialic tuɔc pan toŋ de Galili cɔl Nadhareth,

²⁷ tooc enɔŋ dhueny ken thɔny ke roor thiɛk ran e ye cɔɔl Jothep, ran de dhien de Dabid; ku dhuec e ye cɔɔl Mari.

²⁸ Go malaika bɛn ɣot enɔŋ en, ku jiɛm, Ye aram, yin man ci thiei, Bɛnydit ee tɔ ke yin, yin eka ci thiei ne diar yic.

²⁹ Na wen ye ŋem en, go nom lɔ cɔt areet ne welke, ku ciit enom ne luɛl de cok ke yethiɛce.

³⁰ Go malaika yɔɔk, Ye duɔna riɔc, Mari: ne ke ci we nhier we Nhialic.

³¹ Ku ŋem, yin bi liac, ku dhieth wa, ku kaba cak cɔk ye Yecu.

³² Ku kabi yic thiɛk, ku kabi ya cɔɔl Wen de Nhialiny Dit: ku kabi Bɛnydit Nhialic yiɛn thony de kuɛre Dabid:

³³ ku kabi ya Bɛny de pan e Jakob athɛɛr; ku ceŋde abi ciɛn ethok.

³⁴ Go Mari malaika thiec, Ye bi ekene tuɔl yede, ke an kuc rɔt wɔ roor?

³⁵ Go malaika gam yook, Ye Jɔŋdit abi yi lɔny, ku riɛr de Nhialiny Dit abi yi buɔr piny: ku yeke ba dhiethe abi ya cɔɔl kelajik, Wen de Nhialic.

³⁶ Ku ŋem, Elithabeth ruandu, ee liac eya e wa ke ci dhiɔp: pɛike aye dhetem ne yepɛɛiye, ke ne ye luel ya ci ror.

³⁷ Acin wɛt toŋ de Nhialic ye tɔ ke ce rir.

³⁸ Go Mari jam, Ye ŋem, an ye nyanawun de Bɛnydit; ne tɔ ci man de luɛldu. Go malaika jal jaal.

³⁹ Na ɣɔn ke Mari jɔt rɔt, ku dɔc lɔ piny de kur, leer pan toŋ de Juda;

⁴⁰ ku leer ɣon de Dhakaria, ku mɛɛth Elithabeth.

⁴¹ Na wen, ye Elithabeth ye piŋ muɔth de Mari, ke meth wel rɔt ne yeyic, ku nyuc Jɔŋdiit Lajik nyuc Elithabeth piɔu:

⁴² go yeyic yaat areet, ku jiɛm, Ye keeyabi thiɛi ya tɔ kene yin, ku ke ba dhieth ee thiei.

⁴³ Yen yeŋo ekene enɔŋ ɣɛn, kee ye man e Bɛnyditdie ben nɛɛm ɣɛn?

⁴⁴ Piŋ, elan e ya piɛŋ muɔthdu, ke meth wel rɔt ne ɣayic ne yum de piɔu.

⁴⁵ Eeyabi thiei ye yen man ci gam: ne ke bi wel roth dhiɛɛl wel cike lɛk e ne Bɛnydit.

⁴⁶ Go Mari ket, Ye Piɔndie ye Benydit leec:

⁴⁷ Ku tiɛpdie acan piɔu miɛt ne Nhialic Duluɛŋdie.

⁴⁸ Nhialic adai piiny ne nyanawunden ŋɔŋ guɔp: Ŋɛmka, run kedhia riɛc kedhia aabi ya jam yi ci ɣa thiei ne Nhialic.

⁴⁹ Duceŋ rir ee kerir loi enɔŋ an; Ku rinke aalajik.

⁵⁰ Kacden de piɔu ee tɔ ne kuat de kuat, Ee tɔ ne kuan de kɔc ye riɛu:

⁵¹ Ee riɛr nyuɔɔth ne koŋde; Ee kɔc dit piɔth thiɔi ne tɛŋ de piɔthken;

⁵² Ee kɔc rir ciec ne ɣɔn ke thocken: Ku kee kɔc ŋɔŋ gup ku kɔc kor piɔth jat nhial.

⁵³ Ee kɔc ci kuk thiɔŋ ne miɛth mit: Ku nyiɛŋ kɔc nɔŋ weuken juec.

⁵⁴ Ee Yithrael awunde kony, Ben kac de piɔu ya ciɛt enom.

⁵⁵ Acit man e jiɛm en ke kuarkuɔ, Yi Abraɣam ku mithke athɛɛr.

⁵⁶ Go Mari reer kene ye ne pɛi keediak, ku beer dhuk pande.

⁵⁷ Na ɣɔn ke pɛi ke Elithabeth keek ke liec ci thok; go wa dhieth.

⁵⁸ Go kɔc ke panden kene ruɛike, goki piŋ ne cii Nhialic kacden de epiɔu cɔk dit enɔŋ en yeya; goki piɔth miɛt kene yen.

⁵⁹ Na ɣɔn, aci akol keebɛt thok, e ke bɔ bik meth bi ŋoot; ku yii bik cɔɔl Dhakaria, ne rin ke wun.

⁶⁰ Go man ke gam ku yook ke, Ye kacie ye; kabi cɔɔl Jɔn.

⁶¹ Goki yɔɔk, Yi kacin ran toŋ de dhienduɔn ci kan ciɛk ne keerinka.

⁶² Goki wun nieu, bi rin bene ke ye cak luel.

⁶³ Go ke thiɛc waragak, ku gɛɛr, jiɛm, Ye yenekee Jɔn. Goki gai kedhia.

⁶⁴ Go thok rɔt liep elantoŋtɛi, ku lony liep, go jam, leec Nhialic.

⁶⁵ Go kɔc ke baai kedhia tɔ ne kelɔm go ke dɔm e riɔc: ku yethoŋe ee thiɛi ne piny de kur de Judaya ebɛn.

⁶⁶ Ku raan ebɛn, ran ci yethoŋe piŋ, ee keekake muk ne yepiɔu, yiki jam, Yi bi yemanhe ya ŋo wada? Ciin de Bɛnydit ee tɔ ke yen.

⁶⁷ Go Dhakaria wun nyuɔc ne Jɔŋdiit Lajik, go ket, jiɛm,

⁶⁸ Bɛnydit abuk piɔny, Nhialiny de Yithrael; Ee mithke neem ku wɛɛr keek,

⁶⁹ Tuŋdɛn de luaŋ de wɔɔk aci cɔk bɔ, Tuŋ de dhien de Dabid, de awunde;

⁷⁰ Acit man thɛɛr ɣɔn: cɔk en roordit lajik ye thoŋde;

⁷¹ Luaŋ cen wɔ luɔk, ne ciin de kɔc ye wɔ maan gup kedhia;

⁷² Bi piɔu ya kac ne wurkuɔ gup, Bi yenom ya ciɛt ne manden lajik;

⁷³ Kueŋ cen mel kueeŋ enɔŋ Abraɣam kuɛreda,

⁷⁴ Bi wɔ luɔk ne kɔc nɔŋ ater kene wɔ, Ku bi kede ya cɔk loiku, ku cuk bi riɔc,

⁷⁵ Ku buk ceŋ ke wɔ lajik ne yenom ne akol bii wɔ ke piir.

⁷⁶ Yin wendie, yin bi ya cɔɔl nebi de Nhialiny Dit: Yin bi Bɛnydit ŋɔɔr ba dhɔlke juir yic;

⁷⁷ Ba kɔcke nyuɔth luak, Luaŋ cen ke luɔk ne nyiɛi de karɛcken,

⁷⁸ Ne kac kɔc Nhialic piɔu ne wɔ, Ee run de piny cɔk bɔ nhial bi wɔ bi neem,

⁷⁹ Bi kɔc nyuc tecol ku ne tiɛp de thouic bi ke meer; Ku bi wɔ ya dak cok dhol de dɔɔr.

⁸⁰ Go meth go dit ku le ke rir ne jɔŋ lajik, ku ceŋ roor agut te bene ye nyuɔth Yithrael.