Kolothai 2 - Lek Jot de Jecu Kritho 1940

¹ Eeyabak themdiit yan them ne week ya nyic, ku ne kɔc ke Laodikia, ku kɔc kedhia kɔc ken ɣɛn guɔ ŋem nyin;

² bi ke ya duut piɔth, ne ke ceneke mat yic ne nhiɛr, ku ne baany ebɛn baany de naŋ adot de nyiny de kaŋ, bi kecikum de Nhialic ya nyic, man ye Kritho,

³ yen man cene baany ebɛn de nyiny de kaŋ ku naŋ adot thian ne yeyic.

⁴ Yekene yeneka luɛl, bi ya ciɛn ran ye we dhuɔm wei ne wel yen ke we kuɛm nhiim.

⁵ Na cak guɔp ya liu, ke ɣan ye tɔ wɔne week ne tiɛp, ya piɔu lɔyum ku ya daai ne kɔɔcduɔn, ku cuɔk wɛk de gamduɔn ne Krithoic.

⁶ Yen na cak Yecu Kritho Bɛnydit loom ci emane, ke we yaka cath thin,

⁷ ke we ci mei cuɔɔk ku cak roth yiɛk ne yeyic, ku cak nuɛt ne gamduɔnic, ci man e cene we piɔc, ku yaka kuɛth ne lɛc.

⁸ Yaka roth ŋem kɛlke ran dɛ bi we ya riɔk ne nhiɛrden de nyic ku wel ke ciɛlic ke dhuɔm, ye ya wel ke raan, ku ke de piny nom, ke cie Kritho:

⁹ yen man ye thiaŋ de Nhialic guɔp ceŋ ne yeyic,

¹⁰ ku we ye cɔk thiaŋ ne yen, ku yenekee nom de baany ebɛn ku riɛr:

¹¹ ku yenekee cɔkne week ye aŋualɛɛi, ke cie ŋuɛlɛɛi de cin; ye ya nyiɛi de guɔp de riiŋ, ne ŋuɛlɛɛi de Kritho;

¹² ku we ci thiɔk wene yen ne baptinhduɔn, ku we ci bɛɛr jɔt eya wene yen ne gam ne luɔi de Nhialic, man e jɔt en ne thouic.

¹³ Ku week, we kɔc ci thou ne karɛckuɔn, ku ne ke ye we abor ne wegup, we eka luɛl keek, ya kee we piir etok wene yen, ɣɔn pɛl yen wɔ karɛckuɔ kedhia;

¹⁴ ku wɛɛr looŋ cike gɔɔr wei eke ye ter kene wɔɔk, ku yiki wɔ peen, ku kaacike ɣooc dholic, ku piɛɛt ke ne tiɛm ageer kɔu;

¹⁵ ɣɔn ye ci bany kene rir wuɔc wei, e kee jɔlke nyuɔɔth egek, ci ke tiam ne yen.

¹⁶ Yen ne ye ciɛn ran ye we luk ne riiŋ, ka ne dek, ka ne ke de kol de miɛth dit, ka ne yuil de pɛɛi, ka ne thabath:

¹⁷ ka ye ya atiapaai ke ka bi bɛn; ku guɔp ee ya ke de Kritho.

¹⁸ Ne ye ciɛn ran ye riopduɔn peec ne kuur de piɔuden tɔ ke ye, ku duɔr de malaikai, ran ye ceŋ ne kaŋ yic ka yeke ŋem, ku ye piɔu dit ne ciɛlic ne tɛŋden de guɔp,

¹⁹ ku cii Nom ye muk arir, man ye guɔp ebɛn cɔk dit, ke ye miɔɔc ku duut etok ne yomnyin ku rar, ne dit de Nhialic.

²⁰ Na cak thou wene Kritho enɔŋ ka ke piny nom, ke yeŋo ye we roth duɔt ne looŋ yic, ci ka ceŋ ka ke piny nom yic,

²¹ cit yi duɔka ye dɔm, duɔka ye thieep, duɔka ye jak,

²² (keekake kedhia aa ka ye yec wei), ci luɛl de looŋ ku weet de raan?

²³ Ku keekake kaa ka ci roth caal kene nyiny de kaŋ ne duɔr de piɔu, ke kuur de piɔu, ku wɛi de guɔp; ku kaa ka ye ciɛn kony ne jany de luɔi rɛɛc de guɔp.