Kolothai 1 - Lek Jot de Jecu Kritho 1940

¹ Paulo, metuny de Yecu Kritho ne piɔn de Nhialic, ku Timotheo wanmaathda,

² aalek kɔc cithiei ku mɛɛth nɔŋ adot ne Krithoic kɔc tɔ ne Kolothai: Yi keewuubi athiɛi ya tɔ kene week ku dɔɔr de Nhialic Awada.

³ Wɔ ye Nhialic leec, Wun de Yecu Kritho Bɛnydiitda, ku yuku lɔŋ ne nyindhia ne week,

⁴ ne piŋ cii wɔ we piŋ ne gam ye we Yecu Kritho gam, ku ne nhiɛr ye we kɔc lajik nhiar kedhia.

⁵ Yenekee ye we lui ne ŋath ci tɔɔu nhial tit week. We ci yeŋathe kan piŋ ɣɔn piŋ we wɛt de yic de welpiath.

⁶ Keewelpiɛthke aa bɛn enɔŋ week, ne cit thiɛi cik kek thiɛi ne piny nom ebɛn, ku lokki ku leki e ke juec, acit man lok ke ku leki e ke juec ne weyic, agut kol cii we thiɛi de Nhialic kan piŋ ku nyiɛcka neyic;

⁷ acit man cii we ye piŋ ne Epapara thok, awun nhiar mɛt kene wɔ, awun nɔŋ piɔu adon de Kritho, tɔ ne nyindaic.

⁸ Yenekee lek wɔɔk ne nhiɛrduɔn tɔ ne Jɔŋdiit Lajikic.

⁹ Ku wɔ ye dhiac ke wɔ ye Nhialic lɔŋ ne week, aɣet kol e piŋ wɔ nhiɛrduɔn, ku kɔrku bi we thiɔŋ ne nyiny de piɔnde, bak ka ke Nhialic kedhia ya nyic ku yaka ke muk apiath;

¹⁰ bak ya cath apiath ne kɔc nyin ci mith ke Bɛnydit, ku bak ya kamit ne Nhialic piɔu, bak ya luɔk ne luɔi piath ebɛn, ku ciɛlka ne nyiny de Nhialicic.

¹¹ We bi cɔk rir ne riɛr ebɛn, ci man de riɛr de nuɔmde, bak piɔth ya liɛr, bak kaŋ kedhia ya guum ne yum de piɔu,

¹² ku yaka Wun leec, ci wɔ cɔk piath a goku baŋ adonydɛn de kɔc cithiei tɔ ne ɣɛɛric ya loom.

¹³ Ee wɔ luak bei ne riɛr de cuɔlic, ku leer wɔ ne ceŋ de Wenden nhiɛric;

¹⁴ yen man ye wɔ naŋ weer, pɛl de karɛckuɔ:

¹⁵ ku ye ke thoŋ guɔp ke Nhialiny cie ŋem, ku ye wɛnkaai de ke ci cak ebɛn.

¹⁶ Kaŋ kedhia aake cake ne yeyic, kanhial ku kapiiny, ka yeke ŋem ku ka cike ye ŋem, naa thoc ke meleek, naa riir ke bany, naa riir ke dok, naa riir kɔk; kaŋ kedhia aake cake ne yen, ku kaaye ya kake.

¹⁷ Ku yenekee ŋaar ne kaŋ nhiim kedhia, ku kaŋ kedhia aaye mat ne yeyic.

¹⁸ Ku yenekee nom de guɔp, man ye ya kanitha: yenekee gɔc, ku kee ya aŋɔɔrbei ne thouic; bi ya kɔɔc ne kaŋ nhiim kedhia.

¹⁹ Ee ye ke de miɛt de Wun piɔu ye bi ya tɔ ke thiaŋ ebɛn;

²⁰ bi rɔt dhuɔk keriɛc ebɛn ne yen, te cen dɔɔr loi ne riɛm de tiɛm ageerde; lan yen kapiiny, ku lan yen kanhial, e kaaye dhuk ne yen.

²¹ Ku week, we ye kɔc eke cike tɛk wei ɣɔn, ku yaka ya kɔc ke ater ne tɛŋduɔn ne luɔi rɛɛcduɔn, we ci jal bɛɛr dhuɔk en,

²² ne guɔpdeic ne thonde, bi we gam ke we ci lajik ku ciɛnka acuɔl ku ciɛnka awac ne yenom:

²³ na yaka dhiac ke we ye ceŋ ne gamic, ke we yaka kɔɔc ke we ci roth ye wek, ku cak roth ye ɣooc ne ŋath de welpiathic ka cakke piŋ, ka eke yeneke keriɛc ebɛn ci cak ne piny nom wɛɛt; ka cene ke ɣa cɔk ye awunden, ɣan Paulo.

²⁴ Emane ɣan ye guɔmdie yuum piɔu ne keduɔn, ku an ye te ye dak de ka ye Kritho dhal aya thiɔŋ nom ne ɣaguɔp ne ke de guɔpde, man ye ya kanitha;

²⁵ ke cene ɣa cɔk ye awut, ci man de lony de Nhialic ci yiɛn ɣɛn ne keduɔn, bi wɛt de Nhialic bi rɔt dhiɛɛl,

²⁶ kecikum e ci thian ne run ku kuat kedhia ee jal nyuɔth kɔc cithiei emane,

²⁷ kɔc eke ci Nhialic ke piɔu miɛt bi ke nyuɔth baany de nuɔm de yekecikumne ne Juurkɔk yic, man ye Kritho ne weyic, ku ye ya ŋath de nuɔm:

²⁸ yen man yuku luel, ye wɔ raan ebɛn waai, ku ye wɔ raan ebɛn wɛɛt ne nyic ebɛn, buk raan ebɛn ya gam ke lɔcar ne Krithoic.

²⁹ Ku yeneka yan lui eya, ya them ci man de luɔide, luɔiden ye lui ne ɣaic ne riɛr gok.