Welpiath ci Jɔn cithiei ke gɔɔr 4 - Lek Jot de Jecu Kritho 1940

¹ Na ci Bɛnydit ye nyic ke ci Parithai piŋ ya Yecu aber kɔcpiocke cɔɔl ku yor ke nhiim ci Jɔn, ku wɛr Jɔn,

² (ku yen Yecu ne guɔpde aken kɔc baptith, a kaye kɔcpiocke),

³ go jal ne Judaya, ku ber lɔ Galili.

⁴ Ku bii teek ne Thamaria.

⁵ Go lɔ pan de Thamaria cɔl Thukara, thiak ke piny thin ci Jakob yiɛn wende Jothep.

⁶ Ku yinh de Jakob ee tɔ eeti. Yen Yecu ee ci dak ne cathde go nyuc ne yith nom, ku kee ye thaa de dhetem.

⁷ Go tiŋ de Thamaria bɛn bi bi gem ne piu. Go Yecu yɔɔk, Ye cɔk ɣa dek.

⁸ Kɔcpiocke aake ci lɔ bei bik lɔ ɣooc e miɛth.

⁹ Go tiŋ de Thamaria yɔɔk, Ye yeŋo yin a thiɛc piu ke yin ye Juda, ke an ye tiŋ de Thamaria? (Ke Judai cie mat kene kɔc ke Thamaria.)

¹⁰ Go Yecu gam ku yook, Ye na nyic miɔc de Nhialic, ku nyic ran ye yi yɔɔk, Ye cɔk ɣa dek; ke kee te ca lim, ku kee te ci yi yiɛn piu ye piir.

¹¹ Go tiik jam, Ye Bɛny, kacin ke bin ke gem, ku yith amecic; ba keepiu ye piirke ya bɛi teno?

¹² Ye yin e dit ne Jakob kuarda, man ci wɔ yiɛn yith, ku ye dek thin yen e guɔpde ku mithke ku ɣɔkke?

¹³ Go Yecu bɛr yɔɔk, Ye ran ye dek ne keepiuke abi bɛr ya yal.

¹⁴ Ku ran ye dek ne piu ban ke ye miɔc aci bi ya yal athɛɛr. Piu bake yiɛn en aabi ya yinh de piu eyic bik ya cil eke ye piir athɛɛr.

¹⁵ Go tiik yɔɔk, Ye Bɛny, yiɛne ɣɛn keepiuke, duɔke an bi ya yal, ku ca ber ya bɛn etene ba bi gem.

¹⁶ Go Yecu yɔɔk, Ye lɔ cɔl monydu, ku baka etene.

¹⁷ Go tiik dhuk ku yook, Ye an cin moc. Go Yecu jam, Ye yin ci jam apiath, jiɛm yin, Wu an cin moc.

¹⁸ Yin e nɔŋ roor keedhiec; ku ran tɔ ke yin emane acie monydu. Yekene eka cin yic luel.

¹⁹ Go tiik jam, Ye Bɛny, yin nyiɛc ke yin e nebi.

²⁰ Kuarkuɔ ake ye duur ne yekuure, ku we ye jam, Wuɔ kɔc aabi dhiɛl ya lɔ duur Jeruthalem.

²¹ Go Yecu yɔɔk, Ye tiik, ye ɣa gam, kabi bɛn, ke we ci Wun door ne yekuure, ku ne Jeruthalem.

²² We ye ke yaka kuc door: wɔ ye ke yeku nyic door. Luak ee ya ke de Judai.

²³ Ku ke bɛn, a katɔ emane, ke kɔc ye ye door ne yith bi Wun ya door ne wei ku yic: Wun ee kɔc cit ke kɔɔr, bik ye ya door.

²⁴ Nhialic ee Wei; ku kɔc ye ye door abik ya door ne wei ku yic.

²⁵ Go tiik jam, Ye kanyiɛc Mathia abi bɛn (ye cɔɔl Kritho): na ci bɛn, e kabi wɔ lɛk kaŋ kedhia.

²⁶ Go Yecu yɔɔk, Ye an eka jam wɔne yin, an eke yen.

²⁷ Na wen ke kɔcpiocke bɔ, ku gɛiki ne ke jiɛm en ke tiik; ku cin ran thiec e, Ye yeŋo kɔr? ka, Yeŋo ye luel we ye?

²⁸ Go tiik tonyden de piu nyaŋ wei, ku jiɛl ler bei, ku yook kɔc,

²⁹ Ye baka, ŋɛmka ran ci a lɛk kaŋ kedhia ka ca loi thɛɛr agut ci emane. Cie Kritho ekene?

³⁰ Goki lɔ biyic baai, biki enɔŋ yen.

³¹ Ne kaam ŋoot kek wei ke lɛŋ kɔcpiocke, jamki, Yi Bɛny, came.

³² Go ke yɔɔk, Ye an nɔŋ miɛth ba cam ku kakuɔcka.

³³ Go kɔcpiocke roth thiec, Ya nɔŋ ran ci e yiɛn ke ciɛm?

³⁴ Go Yecu ke yɔɔk, Ye miɛthdie yenekee luɔi de wel ke piɔn de yen man ci a tuɔc, ku bi luɔide thol.

³⁵ Cak ye luel, Wuɔ pɛi kaŋoot keeŋuan bene ke rap tem? Ŋɛmka, we ya yɔɔk, Ya jatka wenyin, ku ŋɛmka dum. Kaa guɔ ɣɛɛr bi ke tem.

³⁶ Ran ye ke tem aya ariɔp loom, ku ye ka ci luɔk kuɔt nhiim ne piir athɛɛric, bi ran ye pur ku ran ye tem bik piɔth ya miɛt etok.

³⁷ Ku yejame kee yic, Ye tok ee pur, ku dɛ ee tem.

³⁸ We ca tuɔc ba ka keneke loi lɔ tem. Kɔc kɔk aa lui, ku lɔɔkka roth ne luɔidenic.

³⁹ Ku kɔc juec ke kɔc ke Thamaria ke yepane kaa gam ne jam de tiik, yook en ke, Ye kee ɣa lɛk kaŋ kedhia ka cake loi thɛɛr agut ci emane.

⁴⁰ Na wen ci kɔc ke Thamaria bɛn enɔŋ en, ke laŋki bi reer ke ke: go ceŋ thin ne akol keerou.

⁴¹ Ku kɔc juec kɔk aa gam ne welke;

⁴² ku yookki tiik, Ya wɔ ye gam, ku kacie jamdu; ee piŋ ci wɔ ye piŋ ne gupkuɔ, ku nyicku ke ye Kritho neyic, Duluɛŋ de kɔc kedhia.

⁴³ Na ɣɔn ne akol keerou ke jiɛl leer Galili.

⁴⁴ Yecu e guɔpde ee jam, Ye nebi acie riɛu pinyde.

⁴⁵ Na wen ci bɛn Galili, go kɔc ke Galili loor. Aake ci ka cike loi ŋem te de miɛth ne Jeruthalem: aake ci lɔ te de miɛth eya.

⁴⁶ Go Yecu bɛr bɛn Kana de Galili te cen piu waar e ke ye piukeabiɛi. Ku bɛny ee tɔ nɔŋ wenden bec ne Kapernaum.

⁴⁷ Na ci Yecu piŋ ne ci bɛn bei ne Judaya leer Galili, go lɔ enɔŋ en, ku lɔŋ bi bɛn bi wende bi cɔk dem. Ee ci duɔr thou.

⁴⁸ Go Yecu yɔɔk, Ye na kɛnka cit ŋem ku kagɛiyeke, e kacak gam.

⁴⁹ Go bɛny jam, Ye Bɛny, bar, duɔke mɛnhdie bi thou.

⁵⁰ Go Yecu yɔɔk, Ye dhuɔkne tedu: wendu kapiir. Go raan wel cii Yecu ke lɛk e gam ku leer tede.

⁵¹ Ku na ye ciɛth ye leer bei, go aluɛkke loor, ku yookki, Ya wendu kapiir.

⁵² Go ke thiec ne thaa gɔl en piir. Goki yɔɔk, Ya war ne thaa dherou yenekee jiɛl alɛɛth e eguɔp.

⁵³ Go wun nyic ke ye thaa waar yooke Yecu ye, Ye wendu kapiir; ku kee ci gam kene kɔcke kedhia.

⁵⁴ Kaŋ aaya rou, kagɛiyeke ci Yecu ke loi te cen bɛn bei ne Judaya leer Galili.