Welpiath ci Jɔn cithiei ke gɔɔr 3 - Lek Jot de Jecu Kritho 1940

¹ Ran de Parithai ee tɔ ɣɔn cɔl Nikodemo, ye bɛny de Judai.

² Go lɔ enɔŋ Yecu ne wɛɛric, ler ku yook, Ye Rabi, wɔ nyic yin ke yin e dupiony ci bɛn enɔŋ Nhialic. Acin ran leu kagɛiyeke ne luɔi ci man loi yin ke te ci Nhialic tɔ ke ye.

³ Go Yecu dhuk, Ye yin ya yɔɔk neyic, Ya na ci raan bere dhieth, e kace ceŋ de Nhialic leu ne ŋem.

⁴ Go Nikodemo thiec, Ye bi ran ci dit bɛr dhieth ade? Leu dhuk ne adhienh de manic ku bere dhieth?

⁵ Go Yecu dhuk, Ye yin ya yɔɔk neyic, Ya na ci raan bi dhieth ne piu ku ne Jɔŋdit, e kace lɔ e ceŋ de Nhialicic bi leu.

⁶ Ke ye dhieth ne riiŋ yenekee ya riiŋ, ku ke ye dhieth ne Jɔndit yenekee ya wei.

⁷ Duɔne gai ne jam e jam an enhia, Ya yin bi bɛr dhiil ne dhiɛth.

⁸ Yom ee put te ye tak, ku yin awuɔude piŋ, ku ye te yen bɛn ku te yen lɔ kuc: yeneka raan ebɛn, ran ye dhieth ne Jɔndit, ee yenya.

⁹ Go Nikodemo gam, ku thiec, Ye bi ekene leu e ŋo?

¹⁰ Go Yecu bɛr thiec, Ye yin ye dupiony de Yithrael ku kuc kaake wude?

¹¹ Yin ya yɔɔk neyic, Ya wɔ ye jam ne ka nyicukue, ku yuku kɔc lɛk ka cukke ŋem; ku we ce lekda ye gam.

¹² We ca lɛk ka ke piny nom, ku kaakɛnka ke gam, ku bak gam wuɔde te lɛk an week kanhial?

¹³ Acin ran ci kan lɔ pan nhial, a ke yen man e bɔ piny nhial, ye Wen de raan ye tɔ pan nhial.

¹⁴ Ku kacit man ɣɔn ci Mothe keroor jat nhial rokic, yenekee caŋ bene Wen de raan dhiɛl jat nhial:

¹⁵ bi ran ye ye gam bi cuɔk ye thou, ku bi ya naŋ piir athɛɛr.

¹⁶ Nhialic ee kɔc nhiar e piny nom, ku miɔc kɔc e Wantoŋden e bɔbei, bi ran ye ye gam bi cuɔk ye thou, ku bi ya naŋ piir athɛɛr.

¹⁷ Nhialic ee ce Wende tuuc ne piny nom bi kɔc ke piny nom bi luɔkwei; ee tuc bi kɔc bi luɔk.

¹⁸ Ran ye ye gam aci ye luɔkwei: ran ci ye ye gam aci thol ne lukwei, ne gam ken en gam ne rin ke Wantoŋ e bɔbei de Nhialic.

¹⁹ Ku kene yenekee lukwei, ye ɣɛɛr ci bɛn ne piny nom, ku kɔc aanhiar cuɔl areet ne ɣɛɛr ne luɔi rɛɛcden yiki loi.

²⁰ Raan ebɛn ye kerac loi ee ɣɛɛr maan, ku ci ye bɛn enɔŋ ɣɛɛr, duɔke luɔide bi ya waai.

²¹ Ku ran ye yic loi ee bɛn enɔŋ ɣɛɛr, bi luɔide ya nyuɔth, luɔi ye loi ne Nhialic.

²² Na ci keekake thok ke Yecu lɔ piny de Judaya kene kɔcpiocke; ku ceŋ thin ke ke, ku ye kɔc baptith.

²³ Ku Jɔn ee ye kɔc baptith eya ne Ainon thiak e Thalim, ne tɔ e tɔ piu juec thin. Goki lɔ, ku ye ke baptith.

²⁴ Jɔn ee ŋot ke kene guɔ tau ɣon de dom e kɔc.

²⁵ Go kɔcpioc Jɔn ke ter kene Judai ne ke de waak.

²⁶ Goki lɔ enɔŋ Jɔn, ku yookki, Ya Rabi, ran waar tɔ ke yin ne Jordan kɔu lɔŋti, ran e yin duleŋde, ee kɔc baptith, ku kɔc kedhia aye lɔ enɔŋ yen.

²⁷ Go Jɔn jam, Ye kacin ke ye raan leu ne lɔm, te cene ye yin e nhial.

²⁸ Ku week, we ye duleekcie ne ke ya luel, Ya ɣan cie Kritho, ku an ee tuuce tueŋ ne enom.

²⁹ Ran nɔŋ nya, yenekee ran de thiek: ku mɛthe de ran thiek, ye kɔɔc ku piŋ, ee piɔu lɔyum areet ne ror de ran thiek: yene miɛtdien de piɔu ee jal ya yic.

³⁰ Abi ya lɔ ke dit, ku an bi ya lɔ ka koor.

³¹ Yen man e bɔ nhial abi ya tɔ nhial ne kaŋ kedhia; yen man ye ke de piny ee ya ke de piny, ku ye jam ne ka ke piny: yen man e bɔ pan nhial abi ya tɔ nhial ne kaŋ kedhia.

³² Ke ci ŋem ku piŋ, yeneka yen kɔc lɛk; ku kacin ran ye lekde gam.

³³ Ran ye lekde gam ee cin de adok taau, ye Nhialic ee yic.

³⁴ Yen man ci Nhialic tuɔc ee wel ke Nhialic luel: ku kacii ye yiɛn Jɔŋdit ne riɛm.

³⁵ Wun ee Wende nhiar, ku kee kaŋ tau e eciin kedhia.

³⁶ Ran ye Wa gam ee naŋ piir athɛɛr. Ran ci wel ke Wa ye loi aci piir bi ya ŋem: ku ɣok de Nhialic ee dhiac ke ye.