Welpiath ci Jɔn cithiei ke gɔɔr 19 - Lek Jot de Jecu Kritho 1940

¹ Go Pilato Yecu lar ku dui.

² Ku nai lathkeer kou ne ye gol, ku tɛɛuki enom, ku piɔthki alanh alian ne yekɔu;

³ ku yiki lɔ enɔŋ en, ku jamki, Yi Aram, Meleŋ de Judai! ku biɔkki ne kecin.

⁴ Go Pilato bɛɛr lɔ biyic, ku yook keek, Ye ŋɛmka, abɛi enɔŋ week, bak nyic lan cin en awany ca yok enɔŋ en.

⁵ Go Yecu lɔ ke ceŋ gol de kou ku alanh alian ne yekɔu. Go Pilato ke yɔɔk, Ye ŋɛmka raan!

⁶ Na ci bany ke ka ke Nhialic ku atoc ye ŋem, e ke cot jamki, Yi piatka. Go Pilato ke yɔɔk, Ye larka, ku piatka: acin awany ca yok enɔŋ en.

⁷ Go Judai dhuɔk en, Yi wɔ nɔŋ loŋ, ku loŋda ee bi rɔt dhiɛl ne thouic, ne ke yen rɔt cɔk ye Wen de Nhialic.

⁸ Te cii Pilato ye piŋ yejame, go bɛɛr riɔɔc areet;

⁹ ku ber lɔ luaŋ de luɔk, ku thiec Yecu, Ye e yin bɔ eno? Go Yecu cuɔk beer.

¹⁰ Go Pilato yɔɔk, Ye cii ɣa ye bɛɛr? Kuc ɣɛn ke ɣan nɔŋ riɛr pal an yin, ku rir piat an yin?

¹¹ Go Yecu dhuk, Ye kee te cin riɛr tɔ ke yin enɔŋ ɣɛn, te kene e yiɛn yi nhial: yen ran e yin ɣa yin yeneka nɔŋ rɛɛc dit.

¹² Go Pilato piɔu naŋ bi puɔl etɛɛn: go Judai coot jamki, Yi na pɛl yerane; ke yin cie mɛthe de Kaithar: raan ebɛn ye rɔt cɔk ye melek ee teer ke Kaithar.

¹³ Na ci Pilato ye piŋ yejame, ke bii Yecu bei, ku nyuuc ne thony de luɔk nom te ye cɔɔl Nyiɛny de Kur, ku cɔl Gabatha ne thoŋ de Eberuu.

¹⁴ Ku juɛr de ret ee tɔ, ku ye thaa de dhetem. Go Judai yɔɔk, Ye ŋɛmka Meleŋduɔn.

¹⁵ Goki coot, Yi nyaiye, nyaiye, piate. Go Pilato ke thiec, Ye ba Meleŋduɔn piat? Go bany ke ka ke Nhialic dhuk, Yi wɔ cin meleŋ dɛ te cen e Kaithar.

¹⁶ Go yiɛn keek bik lɔ piat. Goki Yecu lar:

¹⁷ go lɔ biyic ke jɔt tiɛm ageerde te cɔl te de Apet, ku cɔl Golgotha ne thoŋ de Eberuu:

¹⁸ ku lek piat thin, ku kɔc kɔk keerou kene yen, ŋɛk ne baŋe ku ŋɛk ne baŋe, ku Yecu cilic.

¹⁹ Ku gar Pilato rin, ku tɛɛu ke ne tiɛm ageer nom. Ku gar ee ye, yecu de nadhareth, meled de judai.

²⁰ Go Judai juec keerinke ciir: te cene Yecu piat thin ee thiak ke baai: ku ci gɔɔr ne thoŋ de Eberuu, ku thoŋ de Romai, ku thoŋ de Girikii.

²¹ Go bany ke ka ke Nhialic ke Judai Pilato yɔɔk, Yi duk gar, Wu Meleŋ de Judai; gar, wu kee jam, Ye ɣan ye Meleŋ de Judai.

²² Go Pilato dhuk, Ye ke ca gɔɔr aca gɔɔr.

²³ Na ci lathkeer Yecu piat, e ke ler alathke, ku tekki ke ne ŋuan, ŋɛk ke biakde ne keek kedhia; ku alanhden e kɔu eya: ku alanh e kɔu ee cin koc thok, ee cuec nhial gut piny.

²⁴ Goki jam ne roth, Yi dukku ret, carku, lan ben ya ke de ŋa: bi kacigɔɔr bik ya yith ci luel, Ya ka yaake ceŋ aacikke tek, Ku cɔrki ne alɛthcie. Keekake acii lathkeer ke loi.

²⁵ Ku kaac yi man ne tiɛm ageer de Yecu lɔɔm, kene manlɛne, Mari tiŋ de Kleopath, ku Mari Magdalene.

²⁶ Te cii Yecu man ŋem ku kac ranpioce nhiɛr ne yelɔɔm, go man yɔɔk, Ye tiik, ye wendu ŋem!

²⁷ Ku ber ranpioce yɔɔk, Ye ye moor ŋem! Ku yethane acii ranpioce ye lar pande.

²⁸ Ɣɔn ne yekene cok go Yecu jal nyic ke kaŋ kedhia ci jal thok, bi kecigɔɔr bi ya yic, ku jiɛm, Ye an ci yal.

²⁹ Ku tɔ tony thiaŋ ne binegar: goki ponj ci thiɔŋ ne binegar goki luɔt ne kithop nom, ku cookki ne yethok.

³⁰ Na ci Yecu ye loom ye binegar, ke jam, Ye kee thok: ku gut enom piny, jɔl thook.

³¹ Go Judai, ne ye Juɛr, kɛlke gup bi nook nhial ne tiɛm ageer kɔu ne akol de thabath (yethabanhe ee ye kol dit), goki Pilato thiec bi ke dhoŋ kuɔl, ku bi ke jat wei.

³² Go lathkeer lɔ, ku dhoŋki kuɔl ke ran tueŋ, ku ka ke ran dɛ ci piat kene yen:

³³ ku yi bik enɔŋ Yecu, goki yɔk ne ci guɔ thou, goki cuɔk dhoŋ kuɔl:

³⁴ ku ran toŋ de lathkeer aci e gut lɔɔm ne toŋ, go riɛm kueer bei ku piu nelantoŋtɛi.

³⁵ Ku ran ci e ŋem ee ya lek, ku lekde ee yic: ku kanyic ke ci yic luel, bak ya gam eya.

³⁶ Keekake aacike loi bi kecigɔɔr bi ya yic, Ya kacin yuɔmden bi dhoŋ.

³⁷ Ku ber dɛ ci gɔɔr jam, Ye kabik liec yen man cik thɔr.

³⁸ Ɣɔn ne keekake cok go Jothep de Ari mathaya, ee ye ranpioce de Yecu, ne muɔny ne riɔc riɔc en ne Judai, go Pilato thiec bi guɔp de Yecu lar: go Pilato gam en. Go lɔ, ku loom guɔp de Yecu.

³⁹ Ku bɔ Nikodemo eya, man e ci kan bɛn enɔŋ Yecu ne wɛɛric, ku bii riɛm ke thumurnai ku aloei cike liap keethiɛrnyiɛny.

⁴⁰ Goki guɔp de Yecu loom, ku dutki ne alanh linon ku wal nyir, ci luɔi de Judai de thiak.

⁴¹ Ku te e piɛte yen ee nɔŋ genen; ku tɔ raŋ jot ne genenic, cin ran ci kan thiɔk thin.

⁴² Goki Yecu kan thin ne tɔ tɔ Juɛr de Judai: ku ne thiɔk thiɔke raŋe.