Welpiath ci Jɔn cithiei ke gɔɔr 17 - Lek Jot de Jecu Kritho 1940

¹ Go Yecu keekake luel, ku liec nhial jiɛm, Ye Awa, akɔl ee bɛn; nom Wendu, bi Wendu yi ya noom eya:

² cit man cin e yiɛn riɛr ne raan ebɛn: bi kɔc kedhia yiɛn piir athɛɛr, kɔc cake yiɛn en.

³ Yekene yenekee piir athɛɛr, bik yi ya nyic ke yin e Nhialiny toŋ yic, ku Yecu Kritho man ca tuɔc.

⁴ Yin ca noom ne piny nom, ku an ci luɔi thol, luɔi ca yiɛn an ba ya loi.

⁵ Emane, yin Awa, nom an ne guɔpdu ku ne nuɔm thɛɛr e tɔ ke yi ku ɣan ɣɔn ŋot e piny ke liu.

⁶ Rinku aacake nyuɔth kɔc cake yiɛn ɣɛn ne kɔc ke piny nom yic: aye kɔcku, ku kaacake yiɛn a; ku kaye welku muk.

⁷ Ku kanyicki ke kaŋ kedhia cake yiɛn ɣɛn ye ya kaku:

⁸ Wel cake yiɛn ɣan aacake yiɛn ke, ku kaacikke loom ku kanyicki neyic ke ne ɣan bɔ bei enɔŋ yin, ayeki gam ke yin ee tuuc a.

⁹ An ye lɔŋ ne keek: an cie lɔŋ ne kɔc ke piny nom, aaye keek man cake yiɛn ɣɛn; keeka ye kaku.

¹⁰ Kacie kedhia aaye kaku, ku kaku aaye kacie: ku an ye nom ne keek.

¹¹ Ku an ce beer ya tɔ ne piny nom, ku keekɔcke aye tɔ ne piny nom, ku an lɔ enɔŋ yin. Awa Lajik, ye kɔc ca yiɛn a muk ne rinku yic, bik ya tok, ci manda.

¹² War ta ɣan wɔ ke ne piny nom, aake ya muk ne rinku yic, kɔc cake yiɛn a: aake ya gel, acin toŋden mar a bi liu, a kee wen de mar de kaŋ yetok; bi kecigɔɔr bi ya yic.

¹³ Emane an lɔ enɔŋ yin; ku an luel keekake ne piny nom, bi yumden de piɔu bi ya yic ne keyic.

¹⁴ Aacake yiɛn wɛtdu; ku kaaman kɔc ke piny nom ke, ne ke cik ke ye ka ke piny nom, ci man can ye ke de piny nom.

¹⁵ Yin caa laŋ ya ba ke bɛi bei ne piny nom, ee ba ke gel ne kerac.

¹⁶ Kaacie ka ke piny nom, ci man can ye ke de piny nom.

¹⁷ Ye ke cɔk lajik ne yiicdu: wɛtdu ee ya yic.

¹⁸ Acit man cin a tuɔc ne kɔc ke piny nom yic, yenekee cɔɔk tuɔc an keek ne kɔc ke piny nom yic.

¹⁹ Ku keeka yan ke rɔt cɔk lajik, bi ke ya cɔk lajik eya ne yith yic.

²⁰ Ku an cie lɔŋ ne keekɔcke kepɛc, an ye lɔŋ eya ne kɔc bi ɣa ya gam ne wɛtden;

²¹ bik ya ya tok kedhia; ci man yin tɔ ne ayic, yin Awa, ku ya tɔ ne yiyic, ku keek eya abi ya tɔ ne wɔyic: bii kɔc ke piny nom gam ke yin ci ɣa tuɔc.

²² Ku nuɔm ca yiɛn ɣɛn, aca yiɛn keek; bik ya ya tok, ci man ye wɔ tok;

²³ Ɣan ye tɔ ne keyic, ku yin ne ayic, bik ya lajik e ke ye tok; bii kɔc ke piny nom ya nyic ke yin ci ɣa tuɔc, ku ya ke nhiar, ci man yin ɣa nhiar.

²⁴ Yin Awa, an nɔŋ piɔu bi keekɔc cake yiɛn anke bik ya tɔ te yan tɔ, bik nuɔmdie bik ya ŋem, nuɔm ca yiɛn ɣɛn ne nhiɛr e nhiɛr yin ɣɛn ɣɔn aŋoot piny ke liu.

²⁵ Yin yin Awa lajik, kɔc ke piny aake kuc yi, ku yin ee nyiɛc; ku keekɔcke aake nyic tuuc cin ɣa tuɔc.

²⁶ Ku kaacake lɛk rinku, ku kaabake ya lɛk; bi nhiɛr cin ɣa nhiar bi ya tɔ ne keyic, ku ya tɔ ne keyic.