Welpiath ci Jɔn cithiei ke gɔɔr 12 - Lek Jot de Jecu Kritho 1940

¹ Na ŋoot akol kedhetem ke ret, go Yecu lɔ Bethani, te tɔ Ladharo thin, man cii Yecu cɔk jɔt rɔt ne thouic.

² Goki luɔi miɛth thei etɛɛn: ku jɔte Martha; ku Ladharo ee ci nyuc ne kɔc yic kɔc ci nyuc kene yen ne agen thok.

³ Go Mari riem de miok nyir, miok piath de weu juec, lar, ku tɔc yen Yecu cok, ku weec cok ne nhim ke enom: ku ci ɣotic thiaŋ ne pol de miok.

⁴ Go Judath Yithkariɔt, ran toŋ de kɔcpiocke, man bi ye nyiɛn, go jam,

⁵ Ye yeŋo cene emiokne ɣɛɛc ne denariɔn thiɛrnyɛny diak, ku yine ke aŋaaŋ gup?

⁶ Aluel ekene, ku kacie kony aŋaaŋ gup; kee ye rueny ku kee tɔ ke bonden, ku yen ka ye tau thin kual,

⁷ Go Yecu jam, Ye pɛlka; nɛke tɛɛu koldien de thiɛk.

⁸ Aŋaaŋ gup aaye tɔ kene week ne nyindhia, ku ɣan cie tɔ wɔne we ne nyindhia.

⁹ Go kɔc juec ke Judai goki nyic ne tɔ eeti: goki bɛn, ku kacie ke de Yecu yetok, aake bɔ bik Ladharo ben ŋem eya, man ci cɔk jɔt rɔt ne thouic.

¹⁰ Go banydit ke ka ke Nhialic goki roth jaam, bik Ladharo cɔk thou eya;

¹¹ ne ke ci kɔc juec ke Judai leu wei ne yen, ku lek Yecu gam.

¹² Ɣɔn miak ke kɔc juec ci bɛn te de miɛth, te cik kek Yecu piŋ ne ci bɛn Jeruthalem,

¹³ goki ker ke akoot loom, ku leki lorki ku cotki, Yi Kothana: Eewuubi thiɛi tɔ kene yen, yen man bɔ ne rin ke Bɛnydit, ye Meleŋ de Yithrael.

¹⁴ Na ci Yecu dan akaja yok, ke nyuc e ekɔu; ne gar cene ye gɔɔr,

¹⁵ Ya duɔna riɔc, nyan de Dhiɔn: ŋem Meleŋdu abɔ ne dan e akaja kɔu.

¹⁶ Keekake ake ken kɔcpiocke ke kan muk: na ci Yecu jal noom, e ke jɔl kenhiim ciɛt yi keekake ake garke ne yen, ku kaaci luɔi yen keekake.

¹⁷ Kɔc eke tɔ kene yen ɣɔn cool en Ladharo bei rɛɛŋ cɔk jɔt rɔt ne thouic, aa kɔc lɛk.

¹⁸ Yenekee cɔk ye loor dun de kɔc eya, ne piŋ cik kek ye piŋ ke ci ekegɛinene loi.

¹⁹ Go Parithai jam ne roth, Yi ŋɛmka dhal cen we dhal da: piny ebɛn ee lɔ ne yecok.

²⁰ Ku kɔc ke Giriki aake tɔ ne keyic, kek kɔc eke ci lɔ duur te de miɛth:

²¹ Goki bɛn enɔŋ Pilip, ran de Bethaida de Galili, ku thiecki, jamki, Yi Bɛny, wɔ nɔŋ piɔth ŋem de Yecu.

²² Go Pilip lɔ lɛk Andereya: ku berki lɛk Yecu, kek yi Andereya kene Pilip.

²³ Go Yecu dhuɔk keek jiɛm, Ye thaa ee bɛn, bene Wen de raan noom.

²⁴ We ya yɔɔk neyic, Ya te cii nyin de raau ya loony tiɔɔp, ku thou, e ke reer abac: ku na ye thou, e ke luɔk ke ye nom dit.

²⁵ Ran ye weike nhiar, abi weike wuɔc; ku ran ye weike maan ne yepinye nom abi weike ya muk agut piir athɛɛr.

²⁶ Na ye raan a luɔi, ke ne ye ɣa biɔth; ku te yan tɔ, abi awundie aben ya tɔ eya: na ye raan a luɔi, e kabi Awa ya yiɛn rieu.

²⁷ An dhiau piɔu emane; ku ba jam yade? Awa, luak ɣɛn ne yethane. Ku yekene yenekee bii ɣɛn aɣet yethane.

²⁸ Awa, nom rinku. Go ror bɛn nhial jiɛm, Ye kaca noom, ku kaba bɛɛr ya noom.

²⁹ Go kɔc kaac piŋ en, goki jam yi kee mar e deŋ: ku dhuk kɔk, Yi kee malaika e jam ke ye.

³⁰ Go Yecu dhuk jiɛm, Ye yerore ee ce bɔ ne ɣɛn, ee bɔ ne week.

³¹ Luŋ de yepinye nom atɔ emane: ku emane bɛny de yepinye nom abi nyaai.

³² Ku ɣɛn, na bi a jat nhial piiny, ke ɣan bi raan ebɛn ya bɛi enɔŋ ɣɛn.

³³ Ee jam yela, ee nyooth thon ben thou.

³⁴ Go kɔc dhuɔk en, Yi kacuk piŋ ne looŋ yic ya Kritho abi ya tɔ athɛɛr: ku yeŋo luel yin en, Wu Wen de raan abi dhiɛl jat nhial? Yeŋa ye Wen de raan?

³⁵ Go Yecu ke yɔɔk, Ye ɣɛɛr ee yuul ne weyic. Yaka cath, te tɔ ɣɛɛr ke we, kɛlke cuɔl bi we cooth: ran ye cath ne cuɔlic ee te yen lɔ kuc.

³⁶ Te tɔ ɣɛɛr ke week, ke we yaka ɣɛɛr gam, bak ya wɛɛt ke ɣɛɛr. Yecu ee luel keekake, ku jiɛl, ku le rɔt thian ne keek.

³⁷ Ku nee cak kajuec gɛi kek loi ne keyic, e kaadhiac ke cik gam:

³⁸ bi wɛt de Yithaya nebi bi ya yic, wɛt e ci luel, Ye Bɛnydit, ŋa ci lekda gam? Ku ci koŋ de Bɛnydit nyuɔth ŋa?

³⁹ Ku cik leu ne gam ne ekene, ne wɛt ci Yithaya bɛɛr luel,

⁴⁰ Ye kaacike cɔɔr, ku yin ke piɔth akak; Kɛlke bik ya ŋem ne kenyin, ku mukki ne kepiɔth, Ku bik roth wel, Ku cak ke dem.

⁴¹ Yithaya ee luel keekake ne ŋem cen nuɔmde ŋem; a kee jam ne yen.

⁴² Go kɔc juec goki ya gam agut bany eya; ku cik gamden ye ɣɛɛt bei ne ke de Parithai, kɛlke ke bi ya ciɛc biyic ɣon de gueer:

⁴³ ne ke ye ke lɛc de kɔc cɔk wɛr lɛc de Nhialic ne kepiɔth.

⁴⁴ Go Yecu coot ku jiɛm, Ye ran ye ɣa gam, acie ɣan e ye gam, ee yen man ci a tuɔc.

⁴⁵ Ku ran ye ɣa ŋem, ee yen man ci a tuɔc e ye ŋem.

⁴⁶ An ci bɛn ke ɣan ye ɣɛɛr de piny nom, bi ran ye ɣa gam bi ya ciɛk tɔ tecol.

⁴⁷ Na ye raan welcie piŋ, ku cii ke ye muk, e kacaa luk: an ee ce bɔ ba kɔc ke piny nom ben luk; an ee bɔ ba kɔc ke piny nom ben luɔk.

⁴⁸ Ran ye ɣa jai ku cii welcie ye gam anɔŋ toŋ ye ye luk: yewɛt ca luele yeneka bi ye luk ne kol ciɛn.

⁴⁹ An ce jam ne ke de guɔpdie; ee Awa man ci a tuɔc yenekee ɣa yiɛn loŋ, ba ya luel ku ban ya jam.

⁵⁰ An ye loŋde nyic ke ye piir athɛɛr: yen ka ya luel aaka ye Awa ke lɛk ɣɛn, keeka yake luel.