Jakob 5 - Lek Jot de Jecu Kritho 1940

¹ Piɛŋka, we kɔc ci bany, dhiauka ku kuɔika ne kakuɔn dhal we bɔ enɔŋ week.

² Baanyduɔn ee riak, ku alɛthkuɔn aaci kɔm ke cam.

³ Jiniikuɔn ku riɛrkuɔn aa keth, ku kethden abi we nyiɛn, ku bi gupkuɔn cam ci mac. We ci weu juec taau ne akol ciɛn.

⁴ Ŋemka, ariop de kɔc ke luɔi eke tem dumkuɔn, ku cak pɛn ke ne adhuɔmduɔn, ee kuui: ku kuui de kɔc ke tem ee lɔ ne yith ke Bɛnydiit de Rɛm yic.

⁵ We ci ya ceŋ ne kapiath yic ne piny nom, ku cak ka yaeke kɔɔr loom: we ci roth dɔp akol e nɛk.

⁶ We ci toŋ lajik luɔkwei, ku nakka; aci rɔt ye kony ne week.

⁷ Yaka bɛn de Bɛnydit tiit, watmɛthcie! ke we ce ŋueny. Ŋemka tiɛt ye wun e dom kapiɛth ye luɔk ne piny nom tiit, ku cii ye ŋueny, agut te tuenye deŋ kɛr ku deŋ ruɔt.

⁸ Duɔka ye ŋueny eya; yaka ŋeeny: bɛn de Bɛnydit ee thiɔk.

⁹ Duɔka roth ye luum, watmɛthcie, duɔke we bi luɔkwei: Ŋemka, duluk akaac ɣot thok.

¹⁰ Yaka nebii kaar, watmɛthcie, ne guɔm ku cuɔk ŋueny, nebii eke ye jam ne rin ke Bɛnydit.

¹¹ Ŋɛmka, ayuuke cɔɔl ka ci thiei, kek kɔc ci gum. We ci ŋueny ne kene Job ŋueny piŋ, ku we ci thok de luɔi de Bɛnydit ŋem, thiaŋ yen thiaŋ ne piath ku kac de piɔu.

¹² Ke dit ne kaŋ kedhia, watmɛthcie, ee duɔka roth ye kueŋ ne kanhial ku kapiiny ku kueŋ riɛc ebɛn: ne ouduɔn ye ya ou, ku ne aa ye aa; duɔke we bi yuik ne lukwei.

¹³ Tɔ raan ne weyic ran nɔŋ ke guum? ne ye lɔŋ. Ye raan piɔu lɔyum? ke ne ye ket ne lɛc.

¹⁴ Tɔ ran tok ne weyic? ne ye roordit ke kanitha cɔɔl; ku ne ke laŋ ne yen, ku tɔcki ne miok ne rin ke Bɛnydit:

¹⁵ ku kabii lɔŋ de gam luɔk yen man tok, ku kabii Bɛnydit jat nhial; ku na ci karac loi, e kaabi pal e.

¹⁶ Yen yaka karɛckuɔn gam ne roth, ku ye ŋɛk lɔŋ ne ŋɛk, bak ya dɛm. Lɔŋ de raan ne yepiɔu ebɛn ran lajik ayen ke dit leu ne luɔi.

¹⁷ Elija ee ye ran e ci cak ci wɔɔk, go lɔŋ areet bi ciɛn deŋ; go deŋ ciɛk tueny ne piny nom ne run keediak ku pɛi keedhetem.

¹⁸ Ku ber lɔŋ; go deŋ tuɔc nhial, go kaŋ cil piiny.

¹⁹ Watmɛthcie, na ye raan yec wei ne yicic ne week, ku lee ran tok dɔk;

²⁰ ke ne nyic ke ran ye ran ye kerac loi dɔk dholden de awac, kabi tiɛp luɔk ne thouic, ku kabi karɛc juec ya kum.