Jakob 2 - Lek Jot de Jecu Kritho 1940

¹ Watmɛthcie, duɔke gam de Yecu Kritho Bɛnydiitda, Bɛnydiit de dheeŋ, ye dot ke we ye kɔc kuany yic.

² Na bɔ raan teduɔn ye guɛr, ran ceŋ katim de jini ku alɛth piath, ku bɔ ran ŋɔŋ guɔp eya kene alɛth rac;

³ ku riɛuka ran ceŋ alɛth piath, ku jamka, Wuɔ nyuɔce ete piɛthe; ku yɔɔkka ŋaaŋ, Wuɔ kaace eeti, ka nyuɔce ne thony thin de acok;

⁴ ke we ken taŋduɔn tek, ku jalka ya duluuk ke tɛŋ rac?

⁵ Piɛŋka, watmɛthcie nhiarke? Ken Nhialic ke lɔc, kek kɔc ŋɔŋ ne ka ke piny nom, bik ya bany ne gam, ku bik ya adiit ke ceŋ e ci luel ye bi yiɛn kɔc ye ye nhiar?

⁶ Ku we ken aŋaaŋ riɛu. Ce bany ke kaŋ we ye yɔŋ ku yiki we thɛl ne ɣɔn ke luk ne gupken?

⁷ Cik rin piath ye laat, rin ceneke we cak?

⁸ Na yaka loŋ de melek loi, ci man de kecigɔɔr, Ye ye ran rɛɛr ke yi nhiar ci man de yiguɔp, e kayaka loi apiath:

⁹ ela ku yaka kɔc kuany yic, ke we ye kerac loi, ku ci we luɔkwei ci kɔc ci yeloŋe dhoŋ.

¹⁰ Raan ebɛn ran ye looŋ tiit kedhia, ku leer ke kɔth ne kethi, e kee looŋ dhoŋ kedhia.

¹¹ Yen man ci e luel, Ye duɔne lɔ we tiŋ de ran dɛ, ku ce tiik lɔ ke mony dɛ, ee jam eya, Ye duɔne ran dɛ nɔk a bi thou. Yen na cii cak lɔ we tiŋ de ran dɛ, ku nɛk ran dɛ, ke yin ci looŋ jal doony.

¹² Yaka jam, ku yaka loi, ci kɔc bi ya luk ne loŋ de tat.

¹³ Luk ee ciɛn kac de piɔu enɔŋ en ye ran ken kac de piɔu nyuɔth: dheeŋ de kac de piɔu awar luk.

¹⁴ Piɛth yede, watmɛthcie, te jiɛme raan ye nɔŋ gam, ku cin luɔi? ke leu gam ne luak?

¹⁵ Na cin wanmuuth ka nyankui ke ceŋ ku cin ke ciɛm,

¹⁶ ku yook ran toŋ de week keek, Ye laka ne dɔɔr, eewuubak ɣooc ku kuɛthka, ku kɛnka ke yiɛn ka dɛeke ne kegup; ke piath yede?

¹⁷ Yenekee cɔɔk de gam, na cin luɔi, e kee thou ne guɔpde.

¹⁸ Ee yic, ŋɛk abi jam, Ye yin nɔŋ gam, ku an nɔŋ luɔi: nyuɔthe ɣa gamdu te cinic luɔi, ku luɔidie aban yi nyuɔth gamdie thin.

¹⁹ Aye gam wu Nhialic ee tok; apiath; aye jak rac gam eya, ku lɛthe ke.

²⁰ Ba nyic, Yin ran cin nom, ke gam cin luɔi ye guut.

²¹ Ne Abraɣam kukuarda kene luel ya leejik ne luɔi, ɣɔn gɛm en wende Yithak ne kan de koc nom?

²² Acak ŋem ke gam ci mat ke luɔide, ku gam ee lajik ne luɔi:

²³ Ku kecigɔɔr ee ya yic ci luel, Ya Abraɣam ee Nhialic gam, go ya yene ye lajiŋde, ku ye cɔɔl mɛthe de Nhialic.

²⁴ Ayaka ŋem ke ran ye lajik ne luɔide, ku kacie gamde yetok.

²⁵ Yenekee cɔɔk de Rakab tiɛŋabal. Kene luel ya lejik ne luɔide, ne gɔŋ e cen dutuuc gɔɔŋ ku tooc ke wei ne dhol dɛ?

²⁶ Guɔp cinic wei ee thou, yenekee cɔɔk de gam cin luɔi yen thou.