Epethioi 5 - Lek Jot de Jecu Kritho 1940

¹ Yen yaka Nhialic kaar, ci mithkeek nhiɛr;

² ku yaka cath ne nhiɛric, ci man ci Kritho we ya nhiar, ku ci rɔt gam ne wɔɔk, ye ke ci miac ku ye ke de koc enɔŋ Nhialic bi ya ŋuac ke mit.

³ Ku bɛɛl, ku luɔi rac ebɛn, ku wek, duɔkake cɔk ye gɔk ne weyic, ci man yen piath enɔŋ kɔc cithiei;

⁴ ku cin acuɔl, ka jam beel, ka aleŋ rac, keeka ce piath ne piŋ; a kee lɛc eka ŋuan.

⁵ Yekene anyiɛcka necok, acin abal, ka ran nɔŋ acuɔl, ka ran ye wak, man ye ya medur de ka ke piny nom, nɔŋ dit ne ceŋ de Kritho ku Nhialicic.

⁶ Ne ye ciɛn ran ye we dhoom ne wel ke ciɛlic: ne ke ye Nhialic ɣok enɔŋ mith ye wel tɛɛr ne keekake.

⁷ Yen duɔka ye mat wene keek;

⁸ ne ke ci we kan ya cuɔl, ku cak bɛɛr ɣɛɛr ne Bɛnyditic emane: yaka cath ci mith ke ɣɛɛr,

⁹ (luɔk de ɣɛɛr ee ya piath nyin, ku lejik ku ye yic,)

¹⁰ ku yaka ka ye Benydit yuum piɔu loi;

¹¹ ku duɔka ye mat wene luɔi de cuɔl cie luɔk; aŋuan bii we ke ya waai.

¹² Ku ka yiike loi neluɔɔŋ aaye rac ne luɛl.

¹³ Ku kaŋ kedhia ka ci waai aaye nyuɔɔth ne ɣɛɛr: ne ke ye ka ci nyuɔɔth kedhia ɣɛɛr.

¹⁴ Yen, aluel, Ye pace, yin man nin, ku jɔt rɔt ne thouic, ku Kritho abi yi ya meer.

¹⁵ Yaka roth ŋem bak ya cath apiath, ci kɔc nyic kaŋ, ku cakka cit kɔc ci nhiim mum.

¹⁶ Yaka kakuɔn dai loi, ne rɛɛc rɛɛcne keeakolke.

¹⁷ A duɔka wenhiim cɔk mum, ku yaka piɔn de Nhialic nyic ne wenhiim.

¹⁸ Ku duɔka piukeabiɛi ye dek areet bak miɔl, yenekee pɛl de rɔt de kerac; cakka roth ye thiɔŋ ne Jɔŋdit;

¹⁹ yaka ket, yaka Bɛnydit piɔny ne wepiɔth;

²⁰ yaka Nhialic Wun leec ne kaŋ kedhia ne rin ke Yecu Kritho Bɛnydiitda;

²¹ yaka roth gam ne rieu rieu we Kritho.

²² We diar, yaka tɔ ne riɛr de roorkuɔnic, ci man tɔ we ne ke de Bɛnyditic.

²³ Ne ke ye moc yen ya nom de tiik, ci man ye Kritho eya yen nom de kanitha, ku ci rɔt cɔk ye duluɛŋ de guɔp.

²⁴ Ku ci man tɔ kanitha ne riɛr de Krithoic, ne yene ye cɔɔk de diar eya enɔŋ roorken ne keriɛc ebɛn.

²⁵ We roor, yaka diarkuɔn nhiar, ci man ye Kritho kanitha nhiar eya, ku gɛm rɔt ne yen;

²⁶ bi cɔk lajik te cen en waak ne piu kene wɛt,

²⁷ bi kanitha cɔk ye kede, kanitha de nuɔm, cinic acuɔl, ku ken rɔt ruɔt, ku cinic kɔk yinya; ee bi ya lajik ku ye yic ciɛn awac.

²⁸ Yenekee cɔɔk bii roor diarken ya nhiar eya ci man de gupken. Ran ye tiŋde nhiar e kee rɔt nhiar:

²⁹ ne ke cin en ran ye riŋde kan maan; aye dɔp ku yen kok, yenekee cɔɔk de Kritho eya ke kanitha;

³⁰ ne ke ye wɔ ya ka ke yeguɔp, ku yeku ka ke riŋde ku yomke.

³¹ Yeluɔine abii raan wun ya waan ku man, ku le ceŋ kene tiŋde; ku jɔlki ya riiŋ tok keerou.

³² Yekene ee kediit ci kum: an ye jam ne Kritho ku ne kanitha.

³³ Yen ye ŋɛk ne week ye tiŋde nhiar ci man de yeguɔp; ku ne tiik ye monyde riɛu.