Epethioi 4 - Lek Jot de Jecu Kritho 1940

¹ Yen ɣɛn, an ran ci mac de Bɛnydit, ɣan laŋ week, ya bak ya cath apiath ci man e cene we cɔɔl,

² ne piɔn luɔi, ku rieu, ku guɔm, ku yaka roth ŋuaan ne nhiɛɛr;

³ ku yaka them bak man de Jɔŋdit ya muk ne duɔt de dɔɔr.

⁴ Guɔp tok atɔ, ku Jɔŋdiit tok, ci man e cene we cɔɔl ne ŋath toŋ de cɔtduɔn;

⁵ Bɛnydiit tok, gam tok, baptinh tok,

⁶ Nhialiny tok ku Wun e kɔc kedhia, yen man tɔ ne kɔc nhiim kedhia, ku ye lui ne kɔc kedhia, ku tɔ ne weyic wedhia.

⁷ Wɔɔk wɔdhia wɔ ci yiɛn athiɛi ci cɔɔk de miɔc de Kritho.

⁸ Yenekee jiɛm en, Ye ɣɔn ler en dhuk en nhial, kee ci ka eke pecke peec, Ku miɔc kɔc.

⁹ (Yewɛte, ler en dhuk en nhial, ne ken kan lɔ ne biak piiny de piny thar eya?

¹⁰ Ee yen man ci lɔ piny yenekee ber dhuk nhial eya te wɛr nhial ebɛn bi keriɛc ebɛn tuɔɔm.)

¹¹ Go kɔk cɔk ye dutuuc, ku cɔk kɔk ye nebii, ku ye kɔk adubiook, ku ye kɔk dupioc;

¹² ne ke bii kɔc cithiei lajik, ne luɔi de awuutic, ne buth de guɔp de Kritho:

¹³ agut te ɣeet wɔ ne man de gamic wɔdhia, ku man de nyiny de Wen de Nhialic, yuku ɣet ne dit de randitic, agut te leu wɔ pek ne dit de Kritho:

¹⁴ buk cuɔk ber ya mith, yeke thieeth tɛɛn ku tɛɛn, ku yeke puɔk ne yom ebɛn yom de pioc, ne dhuɔm de raan, ku koony, ne dɛp de awac;

¹⁵ ee buk yith ya luel ne nhiɛr, ku yuku cil ne keriɛc ebɛn enɔŋ en, yen man ye nom, ye Kritho.

¹⁶ Yen, yeneka ye guɔp ebɛn, te ci biɔk kedhia roth kuɛɛk mɛt ŋɛk ke ŋɛk, ye cil ne kuny de biɔk kedhia, ye yic naŋ riɛr ne ŋɛŋ ye ŋɛk ye ŋaŋ, e ke rɔt jal buth ne nhiɛric.

¹⁷ Yen an luel yekene, ku ya we yɔɔk ne Bɛnydit, ya we cie bɛr cath ci man de Juurkɔk, ne dit de piɔthkuɔn,

¹⁸ keek man ye tɛŋden ke tɔ ne cuɔlic, ku ci ke tɛk wei ne piir de Nhialicic ne kunyden kuc ke kaŋ, ku ne riɛr de kepiɔth;

¹⁹ keek man ci roth gam bik roth ya pɛc kɔr rɛɛc de guɔp bik luɔi col ebɛn ya kook.

²⁰ Ku we kene piɔc ne Kritho yaya;

²¹ na ne cak piŋ, ku ci we piɔc ne yen, ci man ye yic tɔ ne Yecuic:

²² bak ran tueŋ nyai ne wekɔth ne piir ye we kan piir, yen man ye lɔ ke luel ne kɔr de adhuɔm;

²³ ku bak ya jɔt ne tɛŋ yaka tak ne jɔŋdit,

²⁴ ku piɔthka ran jot, man e ci cak cit Nhialic ne piathic ku ciɛk lajik bi ya lajik ne yic.

²⁵ Yen ne raan ebɛn ye lueth nyai ku yaka jam wedhia ne yic ŋɛk ke ran rɛɛr ke yen; wɔ ye kɔc took ne roth.

²⁶ Na yaka ɣok, ke we duɔka rɛɛc ye loi: duɔka akɔl ye cɔk col ke tɔŋ ŋoot ne piɔu:

²⁷ ku duɔka durieth ye pat ne wepiɔth.

²⁸ Ne ran ye kual ce ber kan ya kual: aŋuan man ete cen ya lui ne kepiath ne yeciin, bi ya naŋ ke bi ya miɔc aŋaaŋ.

²⁹ Duɔka jam rac ye cɔk bɔ bei ne wethook, ne ye ya kepiɛth ye kɔc yuum piɔth ku bi kɔc ye piŋ ya yiɛn athiɛi.

³⁰ Duɔka Jɔŋdiit Lajik ye cɔk dhiau piɔu, yen man cene we nuat thook thin agut akol de wɛr.

³¹ Yaka kɛc de piɔu, ku ɣok, ku tɔŋ, ku jam dit, ku jam rac nyai kene guur:

³² ku yaka roth nhiar, ku kacka piɔth ne roth, ku ye ŋɛk ŋɛk pal awac, ci man ci Nhialic we puɔl ne Kritho.