Epethioi 1 - Lek Jot de Jecu Kritho 1940

¹ Paulo, metuny de Yecu Kritho, ne piɔn de Nhialic, alek kɔc cithiei tɔ ne Epetho, ku kɔc nɔŋ gam adot ne Yecu Krithoic:

² Ye athiɛi ku dɔɔr tenɔŋ Nhialic Awada ku tenɔŋ Bɛnydit Yecu Kritho, eeyabik ya tɔ kene week.

³ Eeyabi athiɛi ya tɔ kene Nhialic Wun de Bɛnydiitda Yecu Kritho, yen man ci wɔ thiei ne athiɛi ebɛn de wei ne kanhial ye tɔ ne Krithoic:

⁴ ci man e cen wɔ lɔc ne yen aŋoot piny ke liu, buk ya lajik, ku yuku ciɛn awac ne yenom ne nhiɛric:

⁵ ku ci wɔ kan meek bi wɔ dɔp en ci wat ne Yecu Kritho, ci man yen lɔyum ne yepiɔu,

⁶ ne lɛc de nuɔm de athiɛide, man cen wɔ miɔc ne Toŋ Nhiɛɛr.

⁷ Ye yen man ci wɔ naŋ wɛr ne riɛmde, ku pɛl de karɛckuɔ, ne baany de athiɛide,

⁸ ci cɔk dit ne wɔnhiim ne nyic ebɛn ku dot.

⁹ Ku ci wɔ nyuɔth keden ci kum de piɔnde, ci man yen lɔyum ne yepiɔu,

¹⁰ bi kaŋ kedhia mat netok ne Krithoic ne thok de ruɔn bɔ, kanhial, ku kapiiny; ne yen,

¹¹ yen man cene wɔ cɔk ye adiit, ku ci wɔ meek ne piɔn de yen yen man ye keriɛc ebɛn loi ci tɛŋ de yepiɔu;

¹² buk ya tɔ ne lɛc de nuɔmdeic, kek wɔ man ci kan naŋ ŋɔth ne Krithoic:

¹³ ye yen man ci we wɛt de yic piŋ eya, welpiɛth ke luaŋduɔn, — ye yen man cak gam eya, ku ci we nuat ne Jɔŋdiit Lajik ne ci luel;

¹⁴ yenekee wɔ nyuɔth ke buk loom, buk ka yukuke muk nenɔŋ Nhialic buk ke kap, ne lɛc de nuɔmde.

¹⁵ Yen an ci gamduɔn de Bɛnydit Yecu aca piŋ, gam yaka nyuɔth kɔc cithiei kedhia,

¹⁶ ku an ci lɛc ne week ye puɔl, we yake kueen rin ne lɔŋdieic;

¹⁷ ya bi Nhialiny de Bɛnydiitda Yecu Kritho, Wun ne nuɔm, ya bi we ya yiɛn jɔŋ de nyic ku nyuuth ne nyiny nyic we yen.

¹⁸ Eeyabi nyiin ke wepiɔth ya yin, bak ŋath de cɔtde bak nyic, ku bak baany de nuɔm de ditde tɔ ne kɔc cithiei yic bak nyic,

¹⁹ ku riɛr gok diitde tɔ kene wɔɔk, wɔ kɔc ye gam, ci man ye riɛr diitde lui,

²⁰ ke ye loi ne Krithoic, ɣɔn jɔt en en ne thouic, ku cɔk nyuc ne ciɛn cuenyde ne ɣan tɔ nhial,

²¹ ye ceŋ ebɛn wuɔr ku riɛr de dok, ku riɛr, ku baany, ku rin cike cak kedhia, ku kacie yerune yetok, ee agut run bɔ.

²² Ku kee keriɛc ebɛn taau ne yecokic, ku cɔk ye nom de keriɛc de kanitha,

²³ man ye guɔpde, thiaŋden ye kaŋ kedhia thiaŋ.