Eberuu 9 - Lek Jot de Jecu Kritho 1940

¹ Man tueŋ ee nɔŋ luɔi ci taau de duɔr, ku kee nɔŋ terieue, terieue de yepinye nom.

² Ee nɔŋ akema e ci juir, ketueŋ, ee nɔŋic camadaan, ku nɔŋic agen, ku nɔŋic mono; te ye cɔɔl Telajik.

³ Ku te beer alanh ci gɛɛŋ de rou, nɔŋic akema ye cɔɔl Lajiŋ de Lajiik;

⁴ nɔŋic agen de wɛnhjini de nyum de wal nyir, ku kiboto de mat ci buɔr piny ne wɛnhjini, ku tɔ tony de wɛnhjini nɔŋic mana ne yeyic ku wan de Aron ɣɔn ci nyok, ku jɔl ya kur ke mat;

⁵ ku kaac cerubiim ke nuɔm ne yenom kumki thooc piny thony de kac de piɔu; ku keekake aacukke leu ne kat nyin kedhia.

⁶ Na ci keekake jal juir yala, ke bany ke ka ke Nhialic aaye jal lɔ ne akema tueŋic, leki duɔr loi;

⁷ akema de rou aye bɛnydiit de ka ke Nhialic lɔ thin yetok, ee naatok ne run tok, ku kacie lɔ te cin riɛm, riɛm ye gam ne rɔt, ku ne awany de kɔc:

⁸ ku kaye Jɔŋdiit Lajik nyooth, ye dhol lɔ telajik areet aŋoot ke kene guɔ cɔk tiɛc, aŋoot akema tueŋ ke kaac;

⁹ ke ye ya parabol de yemane, ee wɔ lɛk ne gɛm yene miɔc gam ku koc, ka ce ran ye duur leu bik cɔk lacar, ne ke de nyiny de piɔu,

¹⁰ ne ke ye kek ya ka ke luɔi de raan (kek yi riiŋ ku ka ke dek, ku waak kuɔtic), cike taau agut kolden de beer piny.

¹¹ Ku Kritho ee jal ya Bɛnydit de ka ke Nhialic de kapiɛth bi bɛn, ne akema de gueer diit lacap, ne ce loi ne cin, acie ke de yecaŋe,

¹² ku cii ye ke de riɛm de buɔɔth ku dɛɛu ke ɣɔk; ee ke de riɛmde, yenekee leer en telajik naatoŋ lɔrir, ke ci wɛɛr athɛɛr loom.

¹³ Na ye rim ke buɔɔth ku rim ke mioor, ku ŋenh de dan e weŋ ye puɔk ne ran rac guɔp, ku yeki yeran rɛɛce cɔk ɣer leejik ne yeguɔp,

¹⁴ ke riɛm de Kritho, man ci rɔt gam ne Jɔŋdiit ye ceŋ athɛɛr, mioc rɔt Nhialic te cin acuɔl, cii nyinyduɔn de piɔu bi ya waak ne luɔi ci thou bak Nhialiny ye piir ya luɔi?

¹⁵ Ku yekene ayen ya medoor de man jot, bi thon cen thou ne wɛɛr de kɔc rɛc ekee tɔ ne man thɛɛric, bi kɔc ci cɔɔl bik kek keciluel de adiit athɛɛr bik ya loom.

¹⁶ Te yen naŋ ciɛn, ke ran e loi yen ee rɔt dhiɛl ne thouic.

¹⁷ Ciɛn ee tɔ ke riɛr te nɔŋ en thou: ye naŋ riɛr te ŋoote ran e cien ke piir?

¹⁸ Yen man tueŋ ee kene cɔk lɔcar te cin riɛm.

¹⁹ Ɣɔn ye Mothe cok ke looŋ kedhia lɛk kɔc kedhia, e kee ye rim ke dɛɛu ku buɔɔth loom kene piu, ku nhiɛm thith, ku kithop, ku weer en ke kitap ku kɔc kedhia,

²⁰ ku jiɛm, Ye yekene ee riɛm de mat, man cii Nhialic cɔɔl ne week.

²¹ Ku weer akema kene tony kedhia ke luɔi eya ne riɛm ci emane.

²² Ku lek de loŋ ayan duɔr jam, Ya kaŋ kedhia aaye waak ne riɛm, ku kee ciɛn pɛl te cin riɛm ci kuer.

²³ Yen ee piath bi kɛɛr de ka ye tɔ pan nhial bi ke ya cɔk ɣer ne kayinla; ku kee piath eya bi ka ke pan nhial ne gupken bi ke ya cɔk ɣer ne koc war keekake.

²⁴ Kritho aken lɔ telajiŋ ci loi ne cin, thoŋ kene yetelajiŋne; ee lɔ pan nhial yetok, ku go tuɔl ne Nhialic nom ne wɔɔk.

²⁵ Ku kee ken rɔt gam naacikut; ci man ye bɛnydiit de ka ke Nhialic lɔ telajik ne run ku run kene riɛm cie kede.

²⁶ Nee yinla, e kee te ci dai ya gum elan e ciɛke piny. Ku kee guɔ tuɔl emane ne thok de run bi rɛɛc nyaai ne ke cen koc ne rɔt.

²⁷ Ku kacit man e cene kɔc taau bik ya thou naatok, ku jɔl luk biooth;

²⁸ yenekee cɔɔk de Kritho eya, cene e gam naatok bi rɛɛc de juaac bi ɣaac, ku kabi bɛɛr tuɔl ne ke de rou, ke cin guɔp rɛɛc, enɔŋ keek kek kɔc ye tiit bi ke luɔk.