Eberuu 13 - Lek Jot de Jecu Kritho 1940

¹ Ne nhiɛr de mɛɛth ne ye dhiac.

² Duɔka nhiim ye maar ne nhiɛr de alɛi: yeluɔie acii kɔk malaikai ya gɔɔŋ ke kucki.

³ Yaka wenhiim ciɛt ne kɔc ci mac, yaka ciɛt ka ci mac wene keek; ku ne kɔc ye luɔi rɛɛc, ci man yen week ne gupkuɔn.

⁴ Ne thiek ye naŋ rieu ne kɔc yic kedhia, ku ne agen ebɛn cie cuɔl: ne ke bi Nhialic abɛɛl ku mekoor luɔkwei.

⁵ Yaka liu ne nhiɛr de weuic, ku yaka pek ne ka ye tɔ kene week: ne ke cen e luel ne guɔpde, Ye yin caa bi kan ya pal wei, ku kacin ke kan ɣan yin ya waan.

⁶ A wɔ ye jam ne ŋeenydit, Wu Bɛnydit yenekee ya mekunydie; a ɣan ci bi ya riɔc: Yeŋo bii raan ya luɔi ɣɛn?

⁷ Yaka wenhiim ciɛt ne kɔc eke ye we dɔk, kɔc eke ye we lɛk wɛt de Nhialic; yaka thok de piirden tak, ku yaka gamden kaar.

⁸ Yecu Kritho ee dhiac ke thoŋ, waar ku ne yekole, ee yic ku agut en awɛdɛ.

⁹ Duɔka roth cɔk ye nyaai ne pioc peei dɛ kuɔtic: ee piath bi piɔu ya cɔk kaac ne athiɛi, ku cii ye ya riiŋ, ke kene kɔc eke ye ye loi piath yok.

¹⁰ Wɔ ye naŋ kan de koc, ke ce piath bik ya cam kek kɔc ye akema luɔi.

¹¹ Ne ke yene gup ke lai, lai yeneke riɛmden laar telajik ne bɛnydiit de ka ke Nhialic ne ye miɔc puk rɛɛc, yeneke nyop ne biak biyic.

¹² Yen Yecu eya, ee gum ne thok biak biyic, bi kɔc ya cɔk lajik ne riɛmde.

¹³ Yen ciithku enɔŋ en ne biak biyic, ku yuku lɛɛtde guum.

¹⁴ Wɔ ye ciɛn panomdɛn de ceŋ eene, ee ceŋ bi bɛn eka yuku kɔɔr.

¹⁵ Yen ne kede ye wɔ cɔk yin Nhialic miɔc de lɛc ne nyindhia, ke ye ya ke ye bɛn bei ne thook ye rinke gam.

¹⁶ Ku duɔka nhiim ye maar ne luɔi de kac de piɔu ku kuny: yekoc yinlane aye Nhialic piɔu lɔyum.

¹⁷ Yaka wel ke kɔc ye we dɔk yaka ke gam, ku yaka roth pal keek: ne ke ye kek daai ne ke de tiipkuɔn, ci kɔc bi kuen; bik yekene ya loi ne yum de piɔu, ke cie dhien de piɔu: ne kee cii yekene rɔt tiiŋ kene week.

¹⁸ Yaka lɔŋ ne wɔɔk: ne ke ye wɔ ye nyicic, ke wɔ nɔŋ nyiny piɛth de piɔu, kɔrku buk ya piir ke wɔ lajik ne kaŋ kedhia.

¹⁹ Ku week we yake yɔɔk areet bak yekene ya loi, bi ɣa dai dhuɔk week.

²⁰ Emane Nhialiny de dɔɔr, man ci adubiok diit de thok bɛr jɔt ne thouic ne riɛm de mat athɛɛr, yen man ye Yecu Bɛnydiitda,

²¹ eeyabi we ya cɔk lɔcap ne kepiathic ebɛn bak piɔnde ya loi, ku ye kepiath loi ne wɔyic, kepiɛth ye lɔyum ne yenyin, ne Yecu Kritho; eeyabi nuɔm bi ya tɔ kene yen athɛɛr wada. Amen.

²² Ku we ya yɔɔk, mɛɛthcie, Ya yaka yook de wɛt guum: ne ke can we gar ne wel lik.

²³ Nyiɛcka lan cene Timotheo wanmaathda cene ye lony, ran bii wɔ we lɔ ŋem etok, te dɔc en bɛn.

²⁴ Mathka kɔc kedhia kɔc ye we dɔk, ku kɔc cithiei kedhia. Kɔc ke Yitalia aaye week muɔɔth.

²⁵ Eeyabi athiɛi bi ya tɔ kene week wedhia. Amen.