Eberuu 12 - Lek Jot de Jecu Kritho 1940

¹ Yen wɔɔk eya, na ci wɔ jal buɔr piny ne piol diit de duleek, ke ne wɔ nyiɛi kethiek ebɛn, ku rɛɛc ye wɔ dai tuɔŋ, ku yuku teer ne riŋ tueŋ ne piɔth lir,

² ku yuku Yecu ɣoi man ye gamda gɔɔc ku ye cɔk lɔcap, yen man e gum tiɛm ageer ne yum de piɔu ci taau tueŋ ne yenom, tɔɔn en yicliɛr, ku jɔl lɔ reer ne ciin cuec de thony de Nhialic.

³ Yen yaka dot ye ke ci ter de kɔc rac guum, ter cik kek ter ne gupken, bak ya cuɔk ye dak, ku cak ye niar ne tiipkuɔn.

⁴ Terduɔn aken riɛm guɔ cooth ye we ɣeet wene rɛɛc:

⁵ ku we ci nhiim maar ne yook, yook ye we jaam ci wat, Ye wendie, duɔne dui de Nhialic ye dhɔlic, Ku duk ye dak te yen yin ŋuuk;

⁶ Ran nhiɛr Bɛnydit aye waai, Ku kee wat yup wɛɛt yeke loom.

⁷ Ee wɛi yeneka ye we gum; Nhialic ee we luɔi ci wat; ye wen yinde ye tɔ wen cii wun ye waai?

⁸ Ku na yaka ciɛn wɛi, ke ci tɛk kɔc kedhia, ke we ye ya adhiethleer, ku we cie cok ya wat.

⁹ Anda, ku wurkuɔk eke dhieth wɔɔk aake ye wɔ waai, ku yuukue riɛu: yen cii ŋuan buk roth ya yiɛn Wun e tip, buk ya piir?

¹⁰ Aaye wɔ waai ne nin diaak neyic ci man piɛth en enɔŋ keek; ku kee wai wɔ ne piathda, buk ya naŋ biandɛn de lajiŋde.

¹¹ Wɛi ebɛn acie duɔr lɔyum emane, ee ya dhieu: ku kee jal luɔk ne ka ke dɔɔr miak enɔŋ keek kek kɔc eke yeke waai, agut lajik.

¹² Yen yaka ciin jat nhial ciin ye nook, ku nhiɔl ci ruai;

¹³ ku yaka dhol lacith loi ne cokkuɔn, bi ŋɔl cuɔk ye piɛk wei dholic, bi ya cɔk dem.

¹⁴ Yaka dɔɔr biɔɔth wene kɔc kedhia, ku lajiŋ cin ran lɔ Bɛnydit kan ŋem te cin en:

¹⁵ ku yaka nyin tiit kɛlke bi naŋ ran dɛɛk athiɛi de Nhialic: ku duɔke nɔŋ meei de akɛc ye kul bi we nuan, ku bi juaac cool;

¹⁶ kɛlke bi naŋ abal, ka ran de acuɔl, ci man de Ethau, man ɣɔn ɣɔɔc ditde ne cuin de aduɔk.

¹⁷ Ayaka nyic ɣɔn beer en rɔt dhuɔk dit de athiɛi, ee ben jai (ne ciɛn te de wel de piɔu ne ci yok), ɣɔn ciɛk en e kɔl ne dhieu.

¹⁸ We ken bɛn te de kuur ye leu ne jak, ku ye dep ne mac, ku te de cuɔl ku muɔɔth, ku yomdit,

¹⁹ ku kuɔth de tuŋ, ku awuɔɔu; ke na yi piŋki ye, e ke laŋ duɔeke bi bɛɛr lɛk wɛt dɛ:

²⁰ aake ce loŋ ci luel leu ne guɔm, Ya na cak ya lɛi e jak kuur, e kabiooke ne kur;

²¹ ku ke ci tuɔl ee ya ya riɔc, a go Mothe jam, Ye ɣan cii riɔcdit dɔm ku lɛth ɣa;

²² we we bɔ kuur de Dhiɔn, ku bak pan de Nhialiny ye piir, Jeruthalem de pan nhial, ku bak ne rɛm ke malaikai cike leu ne kuɛn yic,

²³ ku bak ne amatnom de raan ebɛnic ku ne kanithaic kanitha de wɛɛtdit cike gɔɔr pan nhial, ku nenɔŋ Nhialic Duluŋ de raan ebɛn, ku tenɔŋ tiip ke kɔc piɛth cike cɔk lɔcap,

²⁴ ku tenɔŋ Yecu medoor de man jot, ku tenɔŋ riɛm ye weer ke ŋuɛɛne jamde ne riɛm de Abel.

²⁵ Ŋɛmka duɔka ran ye we jaam ye rɛɛc. Na ne kek ken poth, ɣɔn rɛɛc kek ran ci ke nyiɛn ne tiɔp nom, ke wɔɔk eya wɔ ci bi poth, wɔ kɔc ye roth nyaai enɔŋ en ye ke ye kɔc nyiɛn pan nhial:

²⁶ yen man ye rorde piny tieŋ: ku kee jal guɔ jam emane, luel, Ye kabi bɛr tɔ, ɣan bi piny bɛɛr cɔk mɛt, ku kacie ye yetok, ee agut nhial eya.

²⁷ Ku yewɛte, Ya kabi bɛr tɔ, anyooth nyiɛi de keeka yeke metka, ci ka cike cak, bi ka keneke met bik ya doŋ.

²⁸ Yen, na yuku ceŋ cie leu ne met loom, ke ne wɔ ye naŋ athiɛi, bii wɔ luɔi lɔyum ne Nhialic piɔu ya gam, ne rieu ku ne riɔc:

²⁹ ne ke ye Nhialinyda yen ya many ye kaŋ dɛɛp.