Dutuuc 9 - Lek Jot de Jecu Kritho 1940

¹ Go Thaulo dhiac ke nyin bi kɔcpioc Bɛnydit ke lɔ nɔk, go lɔ enɔŋ bɛnydiit de ka ke Nhialic,

² leer ku thiec thon bi laar luaŋ de Damathko, ye na tɔ kɔc, yi roor kene diar, kɔc ke Dhol, e kaabike rek, ku leere ke Jeruthalem.

³ Ana ye ciɛth aye duur ye ɣeet Damathko: ke ruer e ruɛr nhial yuil piny:

⁴ go yuik, ku piŋ ror yook e yela, Ye Thaulo, Thaulo, yeŋo yin a ŋet?

⁵ Go thiec, Ye yin ŋa, Bɛnydit? Go jam, Ye ɣan Yecu man ye ŋete eka:

⁶ jɔt rɔt, ku lɔr bei, yin bi lɔ lek ke ba dhiil ne luɔi.

⁷ Go kɔc cath kene ye goki kɔɔc, ku cik kethook kuek, piŋki ror ku cin ran ŋemki.

⁸ Go Thaulo rɔt jɔt piiny; ku ye liep yenyin, ke ce piny ŋem; goki ɣɔm ku leerki Damathko.

⁹ Go dhiac akol keediak ke ce yiɛn, ku cii ciɛm, ku cii dek.

¹⁰ Ku ranpioce ee tɔ ne Damathko, cɔl Anania; go Bɛnydit yɔɔk ne nyuɔth, Ye Anania. Go jam, Ye ɣan eke, Bɛnydit.

¹¹ Go Bɛnydit yɔɔk, Ye jɔt rɔt ku lɔr dhol cɔl Lacith, ku thiec ɣon de Judath lan tɔ ran cɔl Thaulo, ee ran de Tartho, alaŋ;

¹² ku kee ran cɔl Anania ŋem ne bɔ, bi ecin ben kan enɔŋ en bi bɛr yin.

¹³ Go Anania dhuk, Ye Bɛnydit, aca piŋ nenɔŋ kɔc juec yerane, ya ci karɛc dit loi nenɔŋ kɔc lajiik ke Jeruthalem:

¹⁴ ku kanɔŋ riɛr eene riɛr de banydit ke ka ke Nhialic bi kɔc rek kedhia kɔc gam rinku.

¹⁵ Go Bɛnydit yɔɔk, Ye lɔ ɣɔu dholdu: yerane ee tony ca lɔc bi rincie laar ne Juurkɔk nhiim ku meleek, ku mith ke Yithrael:

¹⁶ aba nyuɔth kajuec benke gum ne rincie.

¹⁷ Go Anania jaal, ku ler ɣot, ler ku kɛn ecin enɔŋ e, ku jiɛm, Ye Thaulo wanmaath, Bɛnydit Yecu, man ci tuɔl enɔŋ yin dhol e bii yin thin aci a tuɔc ba bɛr yin, ku bi yi nyuɔc ne Jɔŋdiit Lajik.

¹⁸ Go ka cit nyim loony piny ne yenyin, go jal yin. Go rɔt jɔt ku baptith;

¹⁹ ku ciɛm, go guɔp jal riɛr. Ku ceŋ akol kɔk kene kɔcpiocke tɔ ne Damathko.

²⁰ Go kɔc dai lɛk ne luek ke gueer yic ye Yecu kee Wen de Nhialic.

²¹ Go kɔc ci welke piŋ goki gai, ku jamki, Yi cie ran waar ye kɔc ŋet ne Jeruthalem yekene, kɔc gam keerinke? ku cie yekene yene bii yen eene bi ke laar e ke ci rek ne bany ke ka ke Nhialic nhiim?

²² Go Thaulo jal lɔ ke rir, ku diɛŋ Judai nhiim, Judai ceŋ Damathko, ye kɔc guut ye yekene yenekee Kritho.

²³ Na ci akol juec thok, ke Judai e ke mɛt yi bik Thaulo nɔk:

²⁴ ku nyic Thaulo kepiɔth. Ku yiki thook lɔ tiit ne akol yic ku weer yic bik nɔk.

²⁵ Go kɔcpiocke goki nyaai ne wɛɛric, leki ku cookki biyic ne pany nom, ku tiiŋki piny ne akup.

²⁶ Ɣɔn ye ci lɔ Jeruthalem, ke them mat kene kɔcpiocke: goki riɔc kedhia ne yen, cik gam ne ye ranpioce.

²⁷ Go Baranaba laar enɔŋ dutuuc, leer ku lek keek ne ŋem cen Bɛnydit ŋem dholic, ku jam cen jam ke yen, ku weet cen kɔc wɛɛt ne Damathko ne piɔn rir ne rin ke Yecu.

²⁸ Go Thaulo dhiac kene keek, ye lɔ biyic ku lee dhuk Jeruthalem,

²⁹ weet kɔc ne piɔn rir ne rin ke Bɛnydit: ku jiɛm teer wel kene Judai ke Giriki; goki piɔth naŋ bik nɔk.

³⁰ Go wanmathke goki nyic, goki laar Kaithareia, ku toocki Tartho.

³¹ Go kanitha dɔɔr ne Judaya ebɛn ku Galili ku Thamaria, go riɛr; ku ciɛth ne rieu de Nhialicic, ku ne duɔt de piɔu de Jɔŋdiit Lajikic, go jal dit.

³² Ku tɔ, ye Petero cath ne bɛi kedhia ku leer enɔŋ kɔc lajiik ceŋ Luda eya.

³³ Go ran toŋ cɔl Ainea yok thin, ran ye tɛc ne athinic ne run keebɛt, ran bec areet.

³⁴ Go Petero yɔɔk, Ye Ainea, Yecu Kritho acɔk yin dem: jɔt rɔt, ku dol athindu. Go rɔt dai jɔt.

³⁵ Go kɔc kedhia kɔc ceŋ ne Luda ku Tharon goki ŋem, goki kepiɔth wɛl Bɛnydit.

³⁶ Ɣɔn ne Jopa tiŋpioce cɔl Tabitha ee tɔ, ku ci wel ne thoŋ de Giriki cɔl Doruka: tiŋ ci thiaŋ ne luɔi piɛth yen kɔc ŋɔŋ gup kony.

³⁷ Ku tɔ ne keeakolke, bec en keek, ku thou: goki waak, ku tɛɛuki ɣon nhial.

³⁸ Ku Luda athiaak ke Jopa, go kɔcpiocke Petero piŋ ne tɔ thin, goki tuɔc kɔc keerou ku yookki, Yi duɔne gaau ne bɛn enɔŋ wɔɔk.

³⁹ Go Petero rɔt jɔt, ku leer enɔŋ keek. Ɣɔn ye ci lɔ, ke leere ɣon nhial: ku kaac diarjɔɔk ne yelɔɔm, e ke dhiau, ku nyuthki alɛth ke kɔu ku alɛth kɔk ci Doruka ke cuec waar ŋoot en ke tɔ ke ke.

⁴⁰ Go Petero ke ciɛc biyic kedhia, ku tuk enhiɔl ku lɛŋ; ku puk enom guɔp, ku jiɛm, Ye Tabitha, jɔt rɔt. Go yenyin liep; go Petero ŋem, go yethar cok.

⁴¹ Go Petero cuɔk yeciin, ku miit nhial; ku cɔɔl kɔc lajik ku diarjɔɔk, ku yin ke ne ci piir.

⁴² Ku yekene acii Jopa nyic ebɛn: go kɔc juec Bɛnydit gam.

⁴³ Go Petero ceŋ ne Jopa ne nin juec ɣon de Thimon aten de biok.