Dutuuc 8 - Lek Jot de Jecu Kritho 1940

¹ Go Thaulo thonde gam. Ku ŋet dit ee rɔt jɔt ne yekole ne kanitha tɔ ne Jeruthalem; ku kɔc kedhia aa thiɛi wei ne piiny ke yi Judaya ebɛn kene Thamaria, ku dɔŋ dutuuc thin kepɛc.

² Go kɔc piath Thepano thiɔk, ku cɔlki wuɔi ne yen.

³ Go Thaulo kanitha cam, ye lɔ ne ɣoot kedhia, ku thel kɔc bei, roor ku diar, ku leer ke ɣon de dom.

⁴ Ku kɔc ci thiai aa wɛt caath ne bɛi yic weet kek kɔc.

⁵ Go Pilip lɔ pan e Thamaria le kɔc lɛk Kritho.

⁶ Go kɔc juec keyith wɛl wel ke Pilip te cik kek ye piŋ, ku ŋemki ciit cike loi.

⁷ Ku kɔc juec nɔŋ jak rac aacii jak ke bɛn bei, ku cotki ne cɔt dit: ku kɔc juec kɔk ci duany ku kɔc ci ŋɔl aacike cɔk dem.

⁸ Go kɔc piɔth miɛt areet yepane.

⁹ Ku ran toŋ cɔl Thimon ee tɔ ye tiɛt de yepane ɣɔn, ran ci kɔc ke Thamaria cɔk gɛi, ye luel ye ye bɛny dit.

¹⁰ Go kɔc juec keyith wɛl e agut kɔc thii ku bany, jamki, Yi yerane kanɔŋ riɛr de Nhialic, kee riɛr dit.

¹¹ Goki keyith wɛl e ne run juec cen ke cɔk gɛi ne luɔi de tiit.

¹² Ɣɔn yi gamki wel piɛth ke Pilip ciir keek ne ceŋ de Nhialic ku ne rin ke Yecu Kritho, e ke baptithke, yi roor kene diar.

¹³ Go yeThimon mane go gam eya: go baptith ku dhiɛc kene Pilip; te cen e ŋem ne loi ciit ku kagɛiyeke, ke gɛi.

¹⁴ Na ci dutuuc tɔ ne Jeruthalem ye piŋ ke Thamaria ci wɛt de Nhialic gam, goki Petero ku Jɔn tuɔc:

¹⁵ goki lɔ ku lɔŋki ne keek bik Jɔŋdiit Lajik kap:

¹⁶ aake kenke guɔ nyuɔc: aake baptith ne rin ke Yecu Kritho kepɛc.

¹⁷ Go Petero ke Jɔn goki kecin kan e kenhiim, goki Jɔŋdiit Lajik kap.

¹⁸ Na ɣɔn ŋem Thimon e ne ye kɛn de dutuuc cin yene bii Jɔŋdiit Lajik, ke bii weu,

¹⁹ ku jiɛm, Ye yiɛne ɣɛn yeriɛre, bi ran ban acin ya kan e enom bi Jɔŋdiit Lajik ya kap.

²⁰ Go Petero yɔɔk, Ye riɛrku aabi riak kene yin ne thooŋ e thooŋ yin en wu ba miɔc de Nhialic ɣɔɔc ne weu.

²¹ Yin ce mɛt we wɔɔk ne yewɛte. Yin ce piɔu lajik ne Nhialic nyin.

²² Wel yipiɔu ne yekerɛɛce, ku lɔŋ Nhialic lan ben thooŋ e thooŋ yin en ne yipiɔu puɔl.

²³ Yin ŋɛm, yin tɔ wene kekec de keth, ku yin cii karɛc duut.

²⁴ Go Thimon dhuk, Ye laŋka Nhialic duɔke ka enhia luɛleke bi bɛn enɔŋ an.

²⁵ Te cik kek kɔc lɛk wɛt de Nhialic, goki dhuk Jeruthalem, ku leki weet ne bɛi juec ke Thamaria.

²⁶ Go malaika de Nhialic go Pilip yɔɔk, Ye jɔt rɔt ku lɔr ciɛm dhol e Jeruthalem lɔ lɔ Gadha, dhol rokic.

²⁷ Go rɔt jɔt ku leer. Ku ŋem, ran de Aithiopia, ye biɔny nɔŋ riɛr dit, ran de Kandake tiɛŋbɛny de kɔc ke Aithiopia, ci taau ne weuke yic, go lɔ Jeruthalem lee lɔŋ;

²⁸ ku lee dhuk emane nyuuc ne arabiyaic luel wel ke Yithaya nebi.

²⁹ Go Jɔŋdit Pilip yɔɔk, Ye ɣet enɔŋ en, ku matke arabiya wene yen.

³⁰ Go Pilip riŋ enɔŋ en piŋ luɛl luel en wel ke Yithaya nebi, ku thiec, Ye nyic keeka luelkeke?

³¹ Go jam, Ye ba ke leu ne nyic yade te cin en ran nyuuth ɣa? Ku lɛŋ Pilip bi kɛɛc nhial bi nyuc ne yelɔɔm.

³² Te e luel ne waragaŋ de Nhialic eke, Ee thel ci amal lee nɔk; Ku cii yethok kuek, Ci dan amaal man ye mim te teeme raan nhim:

³³ Ɣɔn tɔ yen ne yɔŋic go luɔkwei: Ŋa bi rinyde nyuɔɔth? Weike aa nyaai ne piny nom.

³⁴ Go biɔc Pilip yɔɔk jiɛm, Ye yin laŋ, luel nebi keewelke ne ŋa? ye yeguɔp ka ye ran dɛ?

³⁵ Go Pilip ethok kuek weet ne Yecu ciɛk ne keewelke.

³⁶ Te ciɛth kek dholic, goki ɣet te nɔŋ piu; go biɔc jam, Ye ŋem, ye piu eke; yeŋo pen ɣa ne baptith?

³⁷ Go Pilip jam, Ye na game ne yipiɔu ebɛn, e kacin ke pen yi. Go dhuk jiɛm, Ye an gam Yecu Kritho ye Wen de Nhialic.

³⁸ Go arabiya cɔk kaac. Goki lɔ piny keerou lek ne piu yic, yi Pilip ke biɔc, go baptith ne Pilip.

³⁹ Ɣɔn yi bik bei ne piu yic, ke Jɔŋdit mɛr Pilip wei; ku cii biɔc ber ŋem, go leu dhol ke mit piɔu.

⁴⁰ Go Pilip yok ne Adhoto, ne tek ne bɛi kedhia weet en ke kɔc ne welpiath agut en Kaithareia.