Dutuuc 7 - Lek Jot de Jecu Kritho 1940

¹ Go bɛny diit de ka ke Nhialic thiec, Ye tɔ keekake yiya?

² Go jam, Ye wɛɛt ke awa ku wurcie, piɛŋka. Nhialiny de nuɔm ee tuɔl enɔŋ Abraɣam kukuarda ɣɔn tɔ en ne Methopotamia ku ŋoot ke ken guɔ ceŋ ne Karan,

³ ku yook, Ye jale pinyduɔn, ku wan kɔckuɔn, ku lɔr piny ba nyuɔth yin.

⁴ Go jaal bii bei piny de Kaldaioi lee ceŋ Karan. Ɣɔn ye wun ye ci thou, ke biiye Nhialic yepane pan reer we thine:

⁵ ku cii yin baai ne yepinye, acin tethintet. Ee luel ye bi yiɛn e bi ya kede ku ye ke de mith bi e kuany cok, ee luel yela ke ŋoot ke cin meth.

⁶ Go Nhialic bɛr jam, ye mithke kaabi ceŋ piny lei, ku kaabi ya aluɛk, ku kaabi ya yɔŋ arac ne ruɔn thiɛrnyɛny ŋuan.

⁷ Ku juur bik kek ke luak thin aabake luɔk luk, yenekee luel Nhialic: ye na re e kaabi bɛn bei, bik luɔidie ya loi yepane.

⁸ Ku yin Nhialic Abraɣam luɔi de ŋuɔt. Go Abraɣam Yithak dhieth, ku ŋoot ne nin keebɛt, go Yithak Jakob dhieth, go Jakob kuarkuɔ thiɛr ku rou dhieth.

⁹ Go kuarkuɔ Jothep til, goki ɣaac ku lee bɛr ɣaac pan e Yijep, ku tɔ Nhialic ke ye.

¹⁰ Go bɛi bei ne kadhal e yic kedhia, ku cɔk Paro meleŋ de Yijep mit piɔu enɔŋ en ku nyinyde. Go Paro taau e baanyic bi Yijep ya ŋem ku pande ebɛn.

¹¹ Go pawɛɛr go bɛn pan de Yijep ebɛn ku Kanaan ku kadit dhal kɔc, ku cin ke ciɛm kuarkuɔ.

¹² Ɣɔn ye Jakob ye piŋ rap ne Yijep, ke toc kuarkuɔ.

¹³ Ana ye beer ye tooc keek, ke Jothep nyuth rɔt keek, go Paro jal nyic lan yen ran de yejure.

¹⁴ Go Jothep go wun Jakob thɔn ku cɔɔl kene kɔcke thiɛrdherou ku dhiec.

¹⁵ Go Jakob jal lɔ Yijep ku thou kene kuarkuɔ eya.

¹⁶ Goki jat Cekem ku lek thiɔk ne raŋ cii Abraɣam ɣɔɔc ne riɛr enɔŋ mith ke Emor ran de Cekem.

¹⁷ Ɣɔn aci run de wel thiɔk, wel eke ci Nhialic ke lɛk Abraɣam, ke kɔc kuɔt ne Yijep,

¹⁸ aɣet run tɔ meleŋ dɛ ne Yijep meleŋ kuc Jothep.

¹⁹ Go yemeleŋe kɔckuɔ dhoom ku yɔŋ kuarkuɔ, ye mithken cuat roor bik thou.

²⁰ Go Mothe dhieth ne yerune, ke ye mɛnh ci diik, ku tiek ne pɛi keediak pan e wun.

²¹ Ɣɔn ci e cuat roor, go nyan de Paro kuany, ku dɔp ci mɛnh e dhieth.

²² Mothe ee ci pioc ne nyiny de kɔc ke Yijep ebɛn, ku rir ne welke ku luɔide.

²³ Te cen duɔr ɣet ne run thiɛrŋuan, ke tak yepiɔu bi mithakɛcken lɔ neem, mith ke Yithrael.

²⁴ Go ran tok ŋem ne gum yɔŋ yɔŋe yen go kony, ku guur ran e luc, nɛk ran de Yijep:

²⁵ cɔɔl ne yepiɔu ye nyic kɔc kuny bii Nhialic ke kony ne yeciin, ku kucki.

²⁶ Ɣɔn miak ke beer kɔc ɣɛɛt yok, ku nɔŋ piɔu bi ke maat, go jam, Ye kɔc, we maath. Yeŋo luc we roth?

²⁷ Go ran luc manhe go thany wei ku yook, Ye yeŋa cɔk yi ye bɛnyda ku duluŋda?

²⁸ Nɔŋ piɔu ba a nɔk ci man de ran de Yijep waar?

²⁹ Go Mothe kat ne keewelke, ku ler reer pan e Midian, ku dhieth wɛɛtke keerou thin.

³⁰ Te cii run thiɛrŋuan bɛr lɔ, ke malaika ke tul enɔŋ en roŋ de kuur e Thinai ne liem de mac ne butic.

³¹ Go Mothe ŋem, go gai ne ŋem e ŋem en en. Ana ye leer tethiɔk le ŋem, ke ror de Bɛnydit cot,

³² Ye an ye Nhialiny de kuarkuɔn ku ya Nhialiny de Abraɣam ku Yithak ku Jakob. Go Mothe lath, ku riɔc ne ŋem.

³³ Go Nhialic yɔɔk, Ye dɛk war ne yicok; yete kɛɛc yin thine ee piny lajik.

³⁴ An ci kadhal kɔccie ŋem kɔc tɔ pan e Yijep, ku keŋden aca piŋ, ku an ci bɛn piny ba ke luɔk. Emane bar, yin ba tuɔc pan de Yijep.

³⁵ YeMothene, cik jai wen ku jamki, Ya yeŋa cɔk yi ye bɛny ku duluk? yerane acii Nhialic tooc bi ya bɛny ku ye duluɛk bi kɔc luɔk ne ciin de malaika ci tuɔl enɔŋ en ne butic.

³⁶ Aacii yerane ke bɛi bei ne ke cen kagɛieke loi ku ciit ne Yijep ku Bar Thith ku rokic ne run thiɛrŋuan.

³⁷ YeMothene yenekee yook mith ke Yithrael, Ye Nhialic abi nebi cɔk jɔt rɔt ran de mithakɛckuɔn cit an.

³⁸ Yenekee tɔ ne kɔc yic kɔc ci gueer rokic ɣɔn jiɛme malaika kene yen ne kuur e Thinai, ku tɔ kuarkuɔ eya. Yerane ee looŋ ye piir kap bi ke yiɛn wɔ.

³⁹ Yerane acii kuarkuɔ welke jai, goki piɛk wei ku dhukki piɔth Yijep,

⁴⁰ ku yookki Aron, Ya cak jak bik wɔ ya ŋɔɔr. YeMothene ci wɔ bɛi bei ne Yijep akuc wɔ ke ci bɛn enɔŋ en.

⁴¹ Goki dan e weŋ thɔɔth ne kaakolke, ku ye kek roth lɔ kɔc ne yenom, ku mitki piɔth ne ke cik kek ye loi ne kecin.

⁴² Go Nhialic rɔt dhuɔk wei, ku yin ke dun nhial bik keden loi, ci man e cene e gɔɔr ne kitap de nebii, Ye ne we bii ɣɔk enɔŋ an ɣɔk yakake nɔk ku ka ye we ke roth kɔc Run thiɛrŋuan ɣɔn rokic, We dhien de Yithrael?

⁴³ Guɔka akema de Molok jɔt, Ku kuel de jɔŋ cɔl Repan, Ka cak loi bak ke lɔŋ: We ba laar Babulon ne yekɔu bian lɔya.

⁴⁴ Kuarkuɔ aake nɔŋ akema de lek ɣɔn rokic, ci man e lek Nhialic e Mothe bi loi ci cɛŋ ci ŋem.

⁴⁵ Akemane ee bii kuarkuɔ kene Jocua ɣɔn kɛp kek piny de juur ci Nhialic ke ciɛc wei ne kuarkuɔ nyin agut run ke Dabid,

⁴⁶ ran lee Nhialic piɔu yum, go thiec bi te bii Nhialiny de Jakob ɣap thin yok.

⁴⁷ Go Tholomon luaŋ de Nhialic loi.

⁴⁸ Nhialiny Dit acie ceŋ ne ɣoot eke loike ne kɔc cin, ci man e luele nebi ye,

⁴⁹ Ye pan nhial yenekee thonydie, Ku piny nom eka yan acok thiir: Ye ɣon cit ŋo bak luɔi ɣa? ee luel Bɛnydit yeya: Ku ye teno ban lɔŋ thin?

⁵⁰ Cie ɣan ee cak kaŋ kedhia ne ɣacin?

⁵¹ We kɔc rir piɔth ku kene piɔthkuɔn ŋoot yic ku yith yic, we dhiac ke we tɛr wene Jɔŋdiit Lajik. Aluɔika ci man e ye kuarkuɔn e loi.

⁵² Ye nebi no kene kuarkuɔn yɔŋ? goki kɔc nɔk ɣɔn kɔc nyuuth kɔc ne bɛn bii Toŋ Lajik bɛn, Toŋ cak nyiɛn ku nakka bi thou.

⁵³ We ci looŋ kap looŋ cii malaika ke we piɔc, ku cak ke loi.

⁵⁴ Na cik keewelke piŋ, go wel ke gut piɔth, goki nyiɛi kelec.

⁵⁵ Go Thepano ci thiɔŋ ne Jɔŋdiit Lajik, go nhial liec areet, go riɛr de Nhialic ŋem kene Yecu ne kaac ne ciin cuec de Nhialic,

⁵⁶ go jam, Ye ŋɛmka, nhial aŋɛm ne ci liepic, ku Wen de raan ne kaac ne ciin cuec de Nhialic.

⁵⁷ Goki coot ne cɔt dit, ku thanyki keyith, ku riŋki enɔŋ en netok,

⁵⁸ ku domki bɛi baai, ku biok ne kur. Go duleek alɛthken taau piny ne ran thin cɔl Thaulo cok.

⁵⁹ Goki Thepano biok ne kur, ku dhiɛc ke cot ku jiɛm, Ye Bɛnydit Yecu, lom tiɛpdie.

⁶⁰ Ku tuk enhiɔl, ku coot ne cɔt dit, Ye Bɛnydit duɔne ekerɛɛce dhuk keek. Na ci yekene luel, ke nin.